އިންސާފު ހޯދަން ޝީރީންގެ އާއިލާއިން ބައިޑަންގެ ބައްދަލުވުމަކަށް އެދި މަޖިލީސް ދޮށަށް!

ފަލަސްތީނުގައި އިޒްރޭލުން ހިންގަމުން ދިޔަ ރެއިޑެއް ކަވަރު ކުރަމުން ދަނިކޮށް ބަޑި ޖަހާ މަރާލާފައި ވާ އަލްޖަޒީރާގެ ނޫސްވެރިޔާ، ޝީރީން އަބޫ އަގުލީގެ އާއިލާއިން، އެމެރިކާގެ ރައީސް ޖޯ ބައިޑަންއާ ބައްދަލު ކުރުމަށް ޑިމާންޑް ކޮށްފިއެވެ.

ފަލަސްތީނުގެ އެމެރިކާ ދަރިކޮޅަށް ނިސްބަތްވާ ޝީރީންގެ އާއިލާއިން ދަނީ، ޝީރީންގެ މަރަށް އިންސާފު ހޯދުމަށް ޑިމާންޑްކޮށް، ވަރުގަދަ ހަރަކާތްތަކެއް ހިންގަމުންނެވެ. އެ އާއިލާ މިހާރު ތިބީ އެމެރިކާގެ ވޮޝީންގްޓަންގައެވެ. އެމެރިކާގެ ގާނޫނު ހަދާ މަޖިލީހުގެ އިދާރާ ނުވަތަ ކެޕިޓަލް ބިލްޑިންގ ސަރަހައްދުގައި އެއްވެ ތިބި އާއިލާގެ މެންބަރުން ބުނި ގޮތުގައި އެ އާއިލާއިން ވޮޝިންގްޓަންއަށް ދަތުރު ކުރީ، ޝީރީންއަށް އިންސާފު ހޯދުމަށް ވަކާލާތު ކުރުމުގެ ގޮތުން ބައިޑަންއާއި ބައްދަލު ކުރުމަށެވެ.

މި މަހުގެ މެދަކާ ހިސާބުގައި ބައިޑަން އިޒްރޭލަށް ކުރެއްވި ދަތުރުފުޅުގައިވެސް ޝީރީންގެ އާއިލާއިން ވަނީ ބައިޑަންއާއި ބައްދަލު ކުރަން ބޭނުން ވެގެން ހުށަހަޅާފައެވެ. ނަމަވެސް އާއިލާއަށް އެކަން ކާމިޔާބެއް ނުވިއެވެ.

އެތައް ގޮތަކުން ފަލަސްތީނުގެ ރައްޔިތުންނާއި އަރަބީންގެ ހިތްތައް ފަތަހަ ކުރި ޝީރީން، މި ދުނިޔެއަށް ފަހު ނޭވާ ދޫކުރީ އިޒްރޭލުގެ ބަޑީގެ ހަމަލާއެއް އޭނާގެ މޫނަށް އަމާޒުވެ، މެއި 11 ވަނަ ދުވަހުއެވެ. އޭރު އޭނާ ދިޔައީ ޖެނީންގައި އިޒްރޭލުން ހިންގަމުން ދިޔަ ރެއިޑެއް ކަވަރު ކުރަމުންނެވެ. ހަބަރު ކަވަރު ކުރަން ދަމުން އޭނާ ވަނީ އަލްޖަޒީރާގެ ކަމާ ބެހޭ ފަރާތަށް ރެއިޑްގެ މައުލޫމާތު ދީފައިވެއެވެ. ސީން އަށް ގޮސް މަންޒަރު ސާފުވުމުން ހަބަރުގެ ތަފްސީލުތައް ދޭނެ ކަމަށް ބުނެ މެސެޖެއް ކުރިތާ މާ ގިނައިރުތަކެއް ނުވެ، ފަލަސްތީނުގެ މަސްރަހުން ދެން ތިލަވެގެން ދިޔައީ އިޒްރޭލު އަސްކަރީ ހަމަލާއެއްގައި ޝީރީން، މި ދުނިޔެއާ ވަކިވެފައިވާ މަންޒަރެވެ.

ޝީރީންގެ "މަރުގެ އެތިފަހަރަކަށް" ވި ވަޒަން އޮތީ ވަރަށް ބޮޑަށް ހަލާކުވެފައި ކަމަށާ، އެ ވަޒަނަކީ އިޒްރޭލުން ނުވަތަ ފަލަސްތީނުން ޖެހި ވަޒަނެއްތޯ ކަށަވަރުކޮށް ނިންމަން ނޭނގޭ ކަމަށްވެސް އެމެރިކާއިން ދާދި ފަހުން އާންމު ކުރި ރިޕޯޓެއްގައި ވެއެވެ. އެ ހަމަލާއަކީ އިޒްރޭލުގެ ބާރުތަކުން ދިން ހަމަލާއަކަށް ވުން ގާތް ކަމަށާ، ނަމަވެސް އެ ހަމަލާއަކީ ކަނޑައެޅިގެން ޝީރީންއަށް އަމާޒުކޮށްގެން، ގަސްތުގައި ދިން ހަމަލާއެއް ނޫން ކަމަށްވެސް އެމެރިކާއިން ވަނީ ބުނެފައެވެ.

އެމެރިކާގެ ރިޕޯޓަށް ފަލަސްތީނުން ދެކޮޅެވެ. އަދި ޝީރީންއަށް ހަމަލާ ދީފައި ވަނީ އޭނާއަށް އަމާޒު ކޮށްގެން ގަސްތުގައި ކަމަށް ފަލަސްތީނުން ބުނެއެވެ. ނަމަވެސް އެ ތުހުމަތަށް އިޒްރޭލުން އިންކާރު ކުރެއެވެ.

ހަބަރުތައް ކަވަރު ކުރުމުގައި ސީދާ މައިދާނުގައި ހުރެގެން ރިޕޯޓްތައް ގެނެސްދެމުން ދިޔަ ޝީރީންއަށް މަސައްކަތުގެ މައިދާނުގައި އިޒްރޭލުގެ އަސްކަރީ ސިފައިންގެ ފުށުން އެތައް ފުރައްސަރާއެއް ސިލްސިލާ ގޮތެއްގައި ކުރިމަތިވިއެވެ. މަސައްކަތުގެ މައިދާނުގައި ޝީރީން އެންމެ ބޮޑު އިސްކަމެއް ދިނީ ފަލަސްތީނަށް ވެރިވެގެންފައިވާ އިޒްރޭލުގެ އިސްތިއުމާރީ ބާރުތަކުން ހިންގަމުން ދާ ޖަރީމާތައް ހާމަކޮށްދިނުމަށެވެ. އެގޮތުން ގަސްތުގައި މީހުން މެރުމާއި، ފޭރުމާއި، ޔަހޫދީއްޔާތު ފެތުރުމަށް ހިންގާ ޖަރީމާތަކާއި، ނަސްލީ ތަފާތު ކުރުންތައް ތިލަ ކޮށްދެމުން ދިޔައެވެ. އަދި ޒައޮނިސްޓުންގެ ދޮގުތައް ބަޔާންކޮށްދެމުންދިޔައެވެ.

ޝީރީންގެ އާއިލާއިން ދަނީ އެ މަރުގެ މިނިވަން ތަހުގީގެއް ހިންގުމަށް ގޮވާލަމުންނެވެ.