ބައިޑަންގެ ފާޑު ވިދާޅުވުން ޓްރަމްޕަށް، ޔޫރަޕުގައި އޮތް އެމެރިކާގެ އިތުބާރު ގެއްލިދާނެ

ޔޫރަޕުގެ ޤައުމުތަކުގެ ލީޑަރުންގެ މެދުގައި އެމެރިކާ އަށް އޮތް އިތުބާރު ގެއްލިދާނެ ކަމަށާއި، އެއީ އިންތިހާ އަށް ކަންބޮޑުވެ ވަޑައިގަންނަވާ ކަމެއް ކަމަށް، އެމެރިކާގެ ކުރީގެ ރައީސް ޖޯ ބައިޑަން ވިދާޅުވެއްޖެ އެވެ.

ބުދަ ދުވަހު ބީބީސީ އަށް ދެއްވި ޚާއްސަ އިންޓަވިޔުއެއްގައި ބައިޑަން ވިދާޅުވީ، ޔުކްރެއިންގެ ސަރަހައްދުން ބައެއް ރަޝިޔާ އަށް ދޫކޮށްލަން ޓްރަމްޕް ތާއީދު ކުރެއްވުމަކީ އެއްވެސް ގޮތަކަށް ޤަބޫލު ކުރެވޭ ކަމެއް ނޫން ކަމަށެވެ. 

ބައިޑަން ވިދާޅުވީ ރަޝިޔާގެ ރައީސް ވްލަޑިމިއާ ޕުޓިން ބޭނުންފުޅު ވަނީ ޔުކްރެއިން އަކީ ރަޝިޔާގެ ބައެއްގެ ގޮތުގައި ހަދަން ކަމަށެވެ. އަދި އެކަމާ ދެކޮޅު ހަދައި، ޕުޓިން ހުއްޓުވަން އުޅޭ ކޮންމެ މީހަކީ "ބުއްދި ސަލާމަތުން" ހުރި މީހެއްގެ ގޮތުގައި ވެސް ޕުޓިން ނުދެކޭ ކަމަށް ވަނީ ވިދާޅުވެފަ އެވެ.

އިތުރަށް ވާހަކަ ދައްކަވަމުން ބައިޑަން ވިދާޅުވީ، ޑިކްޓޭޓަރެއް ނުވަތަ ބަޣާވާތްތެރިއެއްގެ އަތް މައްޗަށް، އޭނާގެ އަމިއްލަ ބިން ނޫން އެހެން ބިންތަކެއް ދޫކޮށްލުމުން އޭނާ ހިތްހަމަ ޖެހޭނެ ކަމަށް އެހެން މީހުންނަށް ޤަބޫލު ކުރެވޭ ގޮތެއް އޭނާ އަށް ވިސްނި ވަޑައި ނުގަންނަވާ ކަމަށެވެ. 

މީގެ އިތުރުން ޔޫރަޕުގެ ޤައުމުތަކުގެ ލީޑަރުން އެމެރިކާގެ ލީޑާޝިޕަށް ކުރަމުން އަންނަ އިތުބާރު ގެއްލިދާނެ ކަމުގެ ކަންބޮޑުވުން އަދި އެކަމުގެ ބިރު އޮތް ކަމަށް ވެސް ބައިޑަން ވަނީ ވިދާޅުވެފަ އެވެ.

އެގޮތުން އެމެރިކާ އަށް އިތުބާރު ކުރެވިދާނެ ތޯ، ނުވަތަ އެމީހުންނާ އެކު އެމެރިކާ އޮވެދާނެެތޯ ސުވާލު އުފައްދާނެ ކަމަށް ވެސް ބައިޑަން ވިދާޅުވެފައިވެ އެވެ. އޭނާ ވިދާޅުވީ ބައިނަލްއަޤުވާމީ މުޖުތަމައުން އެމެރިކާ އަށް ކުރަމުން އަންނަ އިތުބާރު ދަމަހައްޓަން ޖެހޭ ކަމަށެވެ.  

ހަމަ އެހެންމެ، ޔުކްރެއިންގެ މިނިވަން ކަމާއި، އެ ޤައުމުގެ ސިޔާދަތު ހިމާޔަތް ކުރުމަށް އެހެން ޤައުމުތަކާއި، ބައިނަލްއަޤުވާމީ މުޖުތަމައުގެ އެއްބާރުލުން މުހިންމު ކަމަށް ވެސް ބައިޑަން ވިދާޅުވި އެވެ. 

ބައިޑަންގެ ރިޔާސީ ދައުރުގައި އޭނާ ވަނީ ޔުކްރެއިންއާ އެކު ވަރަށް ބޮޑަށް ގުޅުން ބަދަހި ކޮށްފަ އެވެ. އަދި އެކި އެކި ކަންކަމުގައި އެމެރިކާ އިން ވަނީ ޔުކްރެއިން އަށް އެހީތެރިކަން ފޯރުކޮށްދީފަ އެވެ.

މިދިޔަ އަހަރުގެ ފަހު ކޮޅު އޮތް އެމެރިކާގެ ރިޔާސީ އިންތިޚާބުގައި ޑިމޮކްރަޓްސް ޕާޓީގެ ފަރާތުން އެންމެ ފުރަތަމަ ވާދަ ކުރެއްވީ ބައިޑަން އެވެ. ރިޔާސީ ދެ ވަނަ ދައުރެއް ހޯއްދަވަން ބައިޑަން ވާދަކުރައްވަން ޖެހުނީ ވެސް ޓްރަމްޕާ އެވެ.

ނަމަވެސް، ރިޔާސީ ބަހުސް އަށް ފަހު، ބައިޑަންގެ ޤާބިލު ކަމާ މެދު ގިނަ ބަޔަކު ސުވާލު އުފައްދައި، ޚާއްސަކޮށް ޑިމޮރަޓްސް ޕާޓީގެ ތެރޭގައި ވެސް ޚިޔާލު ތަފާތުވުންތަކެއް އުފެދުމުން، ބައިޑަން ވަނީ ރިޔާސީ ރޭހުން ވަކިވެ ވަޑައިގެންފަ އެވެ.