އެންމެ ޒަމާނީ ވަސީލަތްތައްވެސް ޖޭމް ކުރުމުގެ ޤާބިލުކަން އެބަހުރި: ޗީފް އޮފް ޑިފެންސް

އެންމެ ޒަމާނީ ވަސީލަތްތައްވެސް ޖޭމް ކުރުމުގެ ޤާބިލުކަން ދިވެހި އަސްކަރިއްޔާގައި އެބަހުރިކަމަށް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.

މިނިވަންދުވަހު ރާއްޖެޓީވީން ގެނެސްދިން ކަވަރޭޖަށް ދެއްވި ޚާއްސަ އިންޓަރވިއުއެއްގައި ޝަމާލް ވިދާޅުވީ، "ކްރޮސް-ބޯޑަރ" ޓެރަރިޒަމަކީ މިހާރު އެންމެ ބޮޑު އެއް ނުރައްކާ ކަމަށެވެ. އެއީ ހުރިހާ ޤައުމެއްގެ ސަލާމަތީ މުއައްސަސާތަކަށްވެސް އޮތް އެންމެ ބޮޑު އެއް ނުރައްކާކަމަށް ޝަމާލް ވިދާޅުވިއެވެ.

ޝަމާލް ވިދާޅުވީ، މެއި 6 ޙަމަލާގައި ރާއްޖެއިންވެސް އެ ނުރައްކާތެރިކަން ތަޖުރިބާ ކޮށްފައިވާ ކަމަށެވެ. އެފަދަ މައްސަލަތަކުގައި ޤައުމީ ދިފާއީ ބާރަށް އޮންނަ މަސްއޫލިއްޔަތަކީ ކަމެއް ދިމާވެއްޖެނަމަ އެކަމަށް އަޅަންޖެހޭ ފިޔަވަޅުތައް އެޅުންކަމަށް ޝަމާލް ވިދާޅުވިއެވެ.

އޭގެ އިތުރުންވެސް ޓެރަރިޒަމްގެ ކުށްތައް މަދު ކުރުމަށްޓަކައި ކުރަންޖެހޭ ބައެއް ކަހަލަ "ޕްރިވެންޓިވް" މަސައްކަތްތައްވެސް ކުރަންޖެހޭކަން ޝަމާލް ފާހަގަ ކުރެއްވިއެވެ. އެ މަސައްކަތްތަކަށް ބޭނުންވާ ޤާބިލުކަން އިތުރު ކުރުމަށްވެސް ގިނަ މަސައްކަތްތަކެއް ކުރެވިފައިވާކަމަށް ޝަމާލް ވިދާޅުވިއެވެ.

ޝަމާލް އިތުރަށް ވިދާޅުވީ، އިމްޕްރޮވައިޒްޑް އެކްސްޕްލޯސިވް ޑިވައިސަސް (އައިއީޑީ) ފަދަ ހަތިޔާރާއި ގުޅޭ ތަމްރީނުތައް ދިނުމާއި، އެފަދަ ޙާލަތްތަކުގައި ނުކުންނަ ޓީމުތަކަށް ވަސީލަތްތައް ފޯރުކޮށްދިނުމަށް ގިނަ މަސައްކަތްތަކެއް ކުރެވިފައިވާ ކަމަށެވެ.

ޝަމާލް ވިދާޅުވީ ޓެރަރިޒަމްގެ ޙަމަލާއަކަށް ކުރިމަތިލުމަށްޓަކައި މިހާރު އެތައް ގުނައަކަށް ސިފައިންގެ ޤާބިލުކަން އިތުރު ކުރެވިފައިވާ ކަމަށެވެ. މިހާރު އެ މަސައްކަތްތަކަށް ބޭނުންވާ އެންމެ ޒަމާނީ ހަތިޔާރުތައްވެސް ހޯދާފައިވާކަން ޝަމާލް ފާހަގަ ކުރެއްވިއެވެ.

ޤައުމީ ދިފާއީ ބާރުގެ ޤާބިލުކަން އިތުރު ކުރެއްވުމަށް ސިފައިންގެ އެންމެ މަތީ ވެރިޔާ ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ކުރައްވާ މަސައްކަތްޕުޅު ފާހަގަ ކުރައްވައި ޝަމާލް ވަނީ ރައީސަށް ޝުކުރު ދަންނަވާފައެވެ،

 ޝަމާލް ވިދާޅުވީ، ގައުމީ ދިފާއީ ބާރުގެ އެންމެ އިސް އޮޕަރޭޝަނަލް ސަރވިސްއަކީ ކޯސްޓްގާޑްކަމަށެވެ. އަދި ރާއްޖޭގެ ގައުމީ ދިފާއީ ބާރަކީ ނިސްބަތުން އެހެން ގައުމުތަކާއި އަޅައިބަލާއިރު ކުޑަ ބާރެއް ކަމުގައިވިޔަސް, ދައުރު ވަރަށް ފުޅާކަމަށް ޝަމާލް ވިދާޅުވިއެވެ.