ސަފީރު ބޭރުކޮށްލުމުން ދެކުނު އެފްރިކާ އިން ނުރުހުން ފާޅުކޮށްފި
ރައީސްގެ އޮފީހުން ނެރުނު ބަޔާނެއްގައި ބުނެފައި ވަނީ، އެމެރިކާ އިން ސަފީރު ބޭރުކުރުމަކީ ހިތާމަވެރި ކަމެއް ކަމަށާއި، ދެ ޤައުުގެ ދެ މެދުގައި ޑިޕްލޮމެޓިކް އަދަބުތައް ހިފެހެއްޓުމަށް ގޮވާލާ ކަމަށް.
2013 ވަނަ އަހަރުގެ މާޗް މަހުގެ 18 ވަނަ ދުވަހު ނިއުޔޯކް ސިޓީގައި އޮތް ޝެއަރޑް އިންޓަރެސްޓްގެ 19 ވަނަ އަހަރީ އެވޯޑްސް ގާލާ ގައި އިބްރާހިމް ރަސޫލް ވާހަކަ ދައްކަވަނީ
އެމެރިކާ އިން ދެކުނު އެފްރިކާގެ ސަފީރު ބޭރުކުރުމުން އެކަމާ ނުރުހުން ފާޅުކޮށް، އެ ޤައުމުން ހިތާމަ ކުރާ ކަމަށް ބުނެފި އެވެ.
ދެކުނު އެފްރިކާގެ ރައީސްގެ އޮފީހުން ނެރުނު ބަޔާނެއްގައި ބުނެފައި ވަނީ، އެމެރިކާ އިން ސަފީރު ބޭރުކުރުމަކީ ހިތާމަވެރި ކަމެއް ކަމަށާއި، ދެ ޤައުުގެ ދެ މެދުގައި ޑިޕްލޮމެޓިކް އަދަބުތައް ހިފެހެއްޓުމަށް ގޮވާލާ ކަމަށެވެ.
އެމެރިކާގެ ސްޓޭޓް ސެކްރެޓަރީ މާކޯ ރޫބިއޯ ވިދާޅުވި ގޮތުގައި ސަފީރު އިބްރާހިމް ރަސޫލް އަކީ، ނަސްލީ ހަމަނުޖެހުން އުފެއްދުމަށް މަސައްކަތްކުރާ ސިޔާސީ މީހެކެވެ. އަދި އެމެރިކާގެ ރައީސް ޑޮނަލްޑް ޓްރަމްޕް އަށް ނަފްރަތު ކުރާ މީހެއް ކަމަށް ވިދާޅުވެ، އޭނާ އަށް އެމެރިކާ ގައި މަރުހަބާ ނުކިޔާނެ ކަމަށް ވިދާޅުވި އެވެ.
ދެކުނު އެފްރިކާގެ ރައީސް އޮފީހުން ނެރުނު ބަޔާނު ގައި ބުނެފައި ވަނީ، ދެކުނު އެފްރިކާ އިން އެމެރިކާއާ އެކު އޮންނަ ގުޅުން ވަރުގަދަ ކުރުމަށް މަސައްކަތް ކުރާނެ ކަމަށެވެ. އަޕާޓައިޑްއާ ދެކޮޅަށް މަސައްކަތް ކުރެއްވި ބޭފުޅެއް ކަމަށްވާ ރަސޫލް ބޭރު ކުރެއްވުމާ އެކު، އެމެރިކާ އާއި ދެކުނު އެފްރިކާއާ ދެމެދުގައި އުފެދިފައިވާ ގުޅުމާ މެދު ކަންބޮޑުވުންތައް އިތުރުވެފައިވެ އެވެ.
ފާއިތުވި މަހު، ދެކުނު އެފްރިކާގެ ދަނޑުވެރިންގެ ބިންތައް އަތުލުމަށް ހުއްދަކުރާ ޤާނޫނެއް އޮތް ކަމަށް ބުނެ، ޓްރަމްޕް ވަނީ އެމެރިކާގެ އެހީ ހުއްޓާލައްވާފައި އެވެ.
އަދި ފާއިތުވި ހަފްތާގައި، ދެކުނު އެފްރިކާގެ ދަނޑުވެރިންނަށް އެމެރިކާ ގައި ދިރިއުޅުމަށް މަރުހަބާ ކިޔާނެ ކަމަށް ވިދާޅުވެ، ސަރުކާރުން ދަނޑުވެރިންގެ ބިން "އަތުލަމުންދާކަމުގެ" ތުހުމަތު އިތުރަށް ފުޅާކުރައްވާފައިވެ އެވެ.
