ދިވެހި ދިފާއީ ބާރު ކުޑަނަމަވެސް، ދައުރު ވަރަށް ފުޅާ – ޝަމާލް

އެހެން ގައުމުތަކާއި އަޅައިބަލާއިރު، ދިވެހި ދިފާއީ ބާރަކީ ކުޑަ ބާރެއް ކަމަށާއި، އެހެންނަމަވެސް ދިވެހި ދިފާއީ ބާރުގެ ދައުރު ވަރަށް ފުޅާކަމަށް ޗީފް އޮފް ޑިފެންސްފޯރސް މޭޖަރ ޖެނެރަލް އަބްދުﷲ ޝަމާލު ވިދާޅުވެއްޖެއެވެ.

ޗީފް އޮފް ޑިފެންސްފޯސް މޭޖަރ ޖެނެރަލް އަބްދުﷲ ޝަމާލް މިހެން ވިދާޅުވީ، މިނިވަންދުވަހުގެ މުނާސަބަތުގައި ރާއްޖެޓީވީން ކުރިއަށް ގެންދާ ޚާއްސަ ކަވަރޭޖުގައި ވާހަކަފުޅުދައްކަވަމުންނެވެ. ޝަމާލް ވިދާޅުވީ، ގައުމީ ދިފާއީ ބާރުގެ އެންމެ އިސް އޮޕަރޭޝަނަލް ސަރވިސްއަކީ ކޯސްޓްގާޑްކަމަށެވެ. ގައުމީ ދިފާއީ ބާރުގެ ސްޓްރަކްޗަރ ނުވަތަ ރޯލުތަކަށް ބަލާއިރު، އެހެން ގައުމުތަކުގެ ދިފާއީ ބާރާ ވަރަށް ތަފާތުކަމަށެވެ. އަދި ރާއްޖޭގެ ގައުމީ ދިފާއީ ބާރަކީ ނިސްބަތުން އެހެން ގައުމުތަކާއި އަޅައިބަލާއިރު ކުޑަ ބާރެއް ކަމުގައިވިޔަސް, ދައުރު ވަރަށް ފުޅާކަމަށް ޝަމާލް ވިދާޅުވިއެވެ.

ޝަމާލް ވިދާޅުވީ ރާއްޖޭގެ ގައުމީ ދިފާއީ ބާރުގައި މަދަނީ ދިފާއު ވަރަށް ބޮޑަށް އެބައޮތް ކަމަށެވެ. ނޭވީއެއްގައި ބޭރުގައުމުތަކުގައި ބޯޑަރު ބެލެހެއްޓުމަށް ކަނޑުގެ އެންމެ ބްރައުން ވޯޓާ ހަމައަށް ދާ ކަމަށާއި، ނަމަވެސް ރާއްޖޭގައި ކޯސްޓްގާޑަކީ މެރިޓައިމް ސެކިއުރިޓީއާއި ޑިފެންސްގެ ރޯލުވެސް އަދާކުރާ ޚިދުމަތް ކަމަށެވެ. ހަމައެއާއެކު ކަނޑުމަތީގައި ގާނޫނުތައް ތަންފީޒުކުރުމުގެ ދައުރުވެސް އޮތީ ކޯސްޓްގާޑަށް ކަމަށް ޝަމާލް ވިދާޅުވިއެވެ.  

ޝަމާލް ވިދާޅުވީ ކޯސްޓްގާޑް ފުޅާކުރުމަކީ ދިފާއީބާރުގެ އެންމެ ބޮޑު އެއް އަމާޒު ކަމަށެވެ. އިތުރު ވަސީލަތްތައް ހޯދުމާއި އިތުރު ޕްލެޓްފޯމް ހޯދުން މީގައި ހިމެނޭ ކަމަށާއި، މީގެ ތެރޭގައި ވައިގެ މަގުންނާއި ކަނޑުމަގުން ބޭނުންކުރާނެ އުޅަނދު ހޯދުމާއި، އިންފްރާސްޓްރަކްޗަރއާއި މީހުން ބިނާކުރުމުގެ މަސައްކަތްތައް ކުރަންޖެހޭކަމަށެވެ. މިދިޔަ 2 އަހަރެއްހާ ދުވަހެއްގެ ތެރޭގައި ކޯސްޓްގާޑުގެ ފްލީޓަށް ކޯސްޓްގާޑް ޝިޕް ކާމިޔާބު އިތުރުކުރެވިފައިވާކަންވެސް ޝަމާލް ފާހަގަކުރެއްވިއެވެ.  

ކަވަރޭޖުގައި ވާހަކަދައްކަވަމުން ވައިސް ޗީފް އޮފް ޑިފެންސް ފޯރސް، ބްރިގޭޑިއަރ ޖެނެރަލް އަބްދުއްރަހީމް އަބްދުއްލަތީފް ވިދާޅުވީ، ދިވެހިރާއްޖޭގެ ކަނޑުގެ 99.7 އިންސައްތައަކީ ކަނޑުކަމަށެވެ. އަދި ކަނޑުގެ ސަރަހައްދަކީ މި ގައުމުގެ މިނިވަންކަމަށް ބަލާއިރު އެންމެ މުހިންމު ކަމަށް ބަލަންޖެހޭ ތަންކަމަށެވެ. އެހެންގައުމުތަކާ ޚިލާފަށް ރާއްޖޭގައި ލޭންޑް ބޯޑަރެއް ނެތް ކަމަށާއި، އެހެންކަމުން އަވައްޓެރި ގައުމުތަކާ ގުޅިގެން މަސައްކަތްކުރުން މުހިންމުކަމަށް އަބްދުއްރަހީމް ފާހަގަކުރެއްވިއެވެ. އަދި ގައުމުގެ ސަލާމަތްތެރިކަން އިތުރުކުރުމަށް ކޯސްޓްގާޑު ތަރައްގީކުރުން މުހިންމު ކަމަށްވެސް ވިދާޅުވިއެވެ.