މިއަހަރުގެ ފިތުރު ޒަކާތާއި މިދިޔަ އަހަރުގެ މުދަލު ޒަކާތް ވެސް އޭގެ ޙައްގުވެރިންނަށް ރ. ދުވާފަރު ކައުންސިލުން ބެހި ކަމަށް އިސްލާމިކް މިނިސްޓްރީން ބުނެފިއެވެ.

އެ މިނިސްޓްރީން މިހެން ބުނެފައިވަނީ ދުވާފަރު ކައުންސިލުން މުދަލު ޒަކާތާއި ފިތުރު ޒަކާތް ބަހަން ހަވާލު ކުރި ފައިސާއަށް ޚިޔާނާތްތެރިވެފައިވާ ކަމަށް ލޯކަލް ގަވަރމަންޓް އޮތޯރިޓީން އާއްމުކޮށްފައިވާ ރިޕޯޓާ ގުޅިގެންނެވެ. އެ މިނިސްޓްރީން މިކަމާމެދު ފިޔަވަޅު ނާޅާ ކަމަށް ބުނެ ވެސް ބައެއް މީޑިއާތަކުން ވަނީ ރިޕޯޓްކޮށްފައެވެ.

ޒަކާތުގެ ފައިސާ ޙައްގުވެރިންނަށް ބެހުމަށްފަހު ތަފްސީލު ހިމެނޭ ރިޕޯޓް އަންގާފައިވާ ތާރީހަށް ދުވާފަރު ކައުންސިލުން ހުށަހަޅާފައިވާ ކަމަށް މިނިސްޓްރީން ބުންޏެވެ.

އެ މިނިސްޓްރީން ބުނީ ޒަކާތަކީ ދީނުގެ އެއް ރުކުނަށްވެފައި އަދި ދީނުގެ މަތިވެރި ޝިއާރަކަށްވާތީ، އަބަދުވެސް ޒަކާތުގެ ކަންކަން ވަރަށް ރަނގަޅަށް ބަލަހައްޓާ މޮނިޓަރުކުރަމުން އަންނަ ކަމަށެވެ. އެގޮތުން ކައުންސިލް އިދާރާތައް މެދުވެރިކޮށް ކޮންމެ އަހަރަކު ފިޠުރު އަދި މުދަލު ޒަކާތުގެ ފައިސާ އޭގެ ޙައްގުވެރިންނަށް ރައްދުކޮށްދިނުމުގެ މަސައްކަތް މިނިސްޓްރީން ކުރާއިރު، ކައުންސިލްތައް މެދުވެރިކޮށް ކޮންމެ އަހަރަކު ޒަކާތް ބެހުމަށްފަހު އެ ފައިސާ ބެހިގޮތުގެ ރިޕޯޓްތައް ކައުންސިލްތަކުން ހޯދުމަކީ، މިނިސްޓްރީން ހާއްސަ ސަމާލުކަމެއް ދޭ ކަމެއް ކަމަށް ވެސް ވަނީ ބުނެފައެވެ.

މީގެ އިތުރުން ޒަކާތުގެ ފައިސާއާމެދު އާންމުންގެ ހިތްތަކުގައި ޝައްކު އުފެދޭ ގޮތަށާއި، އާންމު ރައްޔިތުން މިނިސްޓްރީއަށް ކުރާ އިތުބާރު ގެއްލޭފަދަ މޭރުމުން ޚަބަރު ފަތުރާ ފަރާތްތަކުން އެކަން ނުކުރުމަށާއި ކަމާގުޅުންހުރި އިދާރާތަކުން މަޢުލޫމާތު ކަށަވަރުކުރެއްވުމަށްފަހު ނޫނީ މިފަދަ ޚަބަރުތައް އާންމު ނުކުރުމަށް އިސްލާމިކް މިނިސްޓްރީން ވަނީ ނަސޭހަތްތެރިވެފައެވެ. އަދި ޒަކާތް ނެގުމާއި ބެހުމުގެ މަސައްކަތްތައް ކުރިއަށްގެންދަންޖެހޭނީ މާލިއްޔަތު ގަވާއިދާ އެއްގޮތަށްކަމަށް ހުރިހާ ކައުންސިލްތަކައް އަންގާފައިވާ ކަމަށާއި މިނިސްޓްރީގައި ރަޖިސްޓްރީކުރެވިފައިވާ ފަޤީރުންގެ ދަފްތަރުގައި ހިމެނޭ ފަރާތްތަކަށް 2022 ވަނަ އަހަރުން ފެށިގެން މުދަލު ޒަކާތް ބެހުމަށް ހަމަޖެހިފައިވަނީ، އެފަރާތްތަކުގެ އެކައުންޓަށް މިިނިސްޓްރީން ފައިސާ ޖަމާކުރާ ގޮތަށް ކަމަށް ވެސް ވަނީ ބުނެފައެވެ.