މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ން ދަނޑިކޮށީ ޖަގަހައިގައި ބޭއްވި ޖަލްސާއެއްގައި ރާއްޖޭގެ ރައީސުލްޖުމްހޫރިއްޔާގެ ފުރާނަފުޅަށް ނުރައްކަވާގޮތަށް ޢަމަލުކުރުމަށް ގޮވާލާފައިވާ ކަމަށް ބުނެ ފުލުހަށް ހާޒިރުވާން ޗިޓް ފޮނުވި މައްސަލައިގައި، ފުލުހަށް އޭނާ ހާޒިރު ކުރަނީ ޑިސެމްބަރު 10 ވަނަ ދުވަހުގެ ރޭ ކާނިވާ ސަރަހައްދުގައި އެމްޑީޕީން "ގާނޫނުއަސާސީގެ ދިފާއުގައި" ބޭއްވި ޖަލްސާގައި އޭނާ ހުށަހެޅި "ތީ ބަހުލޫލެކޭ" ލަވައާ ގުޅިގެން ކަމަށް މަރިޔަމް ޔަޝްފާ ހާމަ ކޮށްފިއެވެ.

އަންގާރަ ދުވަހުގެ ހެނދުނު 10:30 އަށް ފުލުހަށް ހާޒިރުވުމަށް އަންގާ، ޔަޝްފާ އަށް ހޯމަ ދުވަހު ޗިޓު ފޮނުވުމާ ގުޅިގެން މި ނޫހުން ކުރި ސުވާލަކަށް ޖަވާބު ދެމުން ރ. ދުވާފަރު ކައުންސިލް މެމްބަރުކަން ވެސް ކުރައްވާ ޔަޝްފާ ވިދާޅުވީ، ނޮވެމްބަރު 11 ވަނަ ދުވަހު ދަނޑިކޮށީ ޖަގަހައިގައި ދެއްކި ވާހަކައަކާ ގުޅިގެން ކަމަށް ބުނެ އޭނާ ފުލުހަށް ހާޒިރުވާން އެންގި އިރު، މަސް ދުވަސް ވެގެން ދިޔައިރު ވެސް އެ ބުނާ މައްސަލަ ބަލާފައި ނުވާ ކަމަށެވެ. ނަމަވެސް އެމްޑީޕީން "ގާނޫނުއަސާސީގެ ދިފާއުގައި ރައްޔިތުން" ނަމުގައި ބޭއްވި ޖަލްސާގައި އޭނާ ހުށަހެޅި "ތީ ބަހުލޫލެކޭ" ލަވައާ ގުޅިގެން ފުލުހަށް ހާޒިރު ކުރަން އެކަން މައްސަލަ އަކަށް ހެދީ ކަމުގައެވެ.

ޔަޝްފާ އަށް ފޮނުވާފައިވާ ޗިޓުގައި ބުނެފައިވަނީ، "2024 ނޮވެމްބަރު 11 ވަނަ ދުވަހުގެ ރޭގަނޑުގެ ވަގުތެއްގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ފަރާތުން ޗާންދަނީމަގުގައި ހުންނަ އެ ޕާޓީގެ ޖަގަހައިގައި ކުރިއަށް ދިއަ ކައުންސިލަރުންގެ ހަރުގެ ޖަލްސާގައި، ރ. ދުވާފަރު، ދޮންވެލި، މަރިޔަމް ޔަޝްފާ ވާހަކަ ދައްކަމުން ދިވެހިރާއްޖޭގެ ރައީސުލްޖުމްހޫރިއްޔާގެ ފުރާނައަށް ނުރައްކަވާގޮތަށް ޢަމަލުކުރުމަށް ގޮވާލާފައިވާ ކަމަށް ތުހުމަތު ކުރެވޭ މައްސަލައިގެ ތުހުމަތުގައި ސުވާލުކޮށް ބަޔާނެއް ނެގުމަށް" ސާޖަންޓް އާދަމް ހަލީމް ކްރިމިނަލް އިންވެސްޓިގޭޝަން ބިލްޑިންގ އަށް ހާޒިރުވުމަށް ޗިޓު ފޮނުވާ ކަމަށެވެ.

ޕޯޑިއަމް ތަކުގައި ވަރަށް ފޯރީގައި ވާހަކަ ދައްކާ ޔަޝްފާ އަކީ ވާހަކައިގެ ތެރޭގައި މީހުން ޝައުގުވެރިވާ ޒާތުގެ ޅެމާއި ބަނދި ހިމަނާ ފަރާތެއްކަން ވަނީ ފާހަގަ ކުރެވިއެވެ.

"ގާނޫނު އަސާސީގެ ދިފާއުގައި" ބޭއްވި ޖަލްސާ ގައި ޔަޝްފާ ހުށަހެޅި "ތީ ބަހުލޫލެކޭ" ލަވަ ސޯޝަލް މީޑިއާ ގައި ވަނީ ވައިރަލްވެ ގިނަ ބައެއްގެ ސަމާލުކަން ލިބިފައެވެ.

ދަނޑިކޮށީ ޖަގަހައިގައި، ވާހަކަ ފެއްޓުމުގެ ކުރިން ޔަޝްފާ ހުށަހެޅި ބަންޖަކީ، "އިމެއް ނެތޭ، މިނެއް ނެތޭ، ދިރެއް ނެތޭ، ބިރެއް ނެތޭ. ގޮތެއް ނެތޭ، ފޮތެއް ނެތޭ، ލަދެއް ނެތޭ، ހަޔާތް ނެތޭ" އެވެ.

ޖަގަހަ ޖަލްސާގެ ވާހަކަ ނިންމާލީ ރައިވަރަކުންނެވެ. އެ ރައިވަރަކީ، "ރައިވަރުން އަހަރެނާ، ފައިނުމާނޭ ހަމަ ހިލާ. އައި ކަމަކު ނިޔަތުގާ، އަނގަ ބެދޭނޭ ދޮގު ބެޔާ. ރައިވަރުން ވާދަކޮށްލަން އައި ސޮރާ، ދޮގު ހަދަން މޮޅު ހޮޅިގަނޑާ. ރައްޔިތުން އިނދަޖައްސާ ކުރަގަނޑާ، ރައްޔިތުން ނިކުމެ ހަވަރަށް ދެމާ."

ޔަޝްފާ ފުުލުހަށް ހާޒިރު ކުރާ އިރު މީގެ ކުޑަ ދުވަސްކޮޅެއް ކުރިން ޓްވީޓެއްގެ ކޮންޓެންޓަކާ ގުޅިގެންވެސް އެމްޑީޕީ ގެ އެކްޓިވިސްޓެއް ފުލުހަށް ހާޒިރުކޮށްފައިވެއެވެ.