ނަރުދޫ ފަހު މެޗުންވެސް ބަލި

އެމްޓީސީސީ ނޯތު ލީގު/ ދެވަނަ ޑިވިޝަން ގްރޫޕް ބީގައި ށ. ނަރުދޫ ރަމްޒު ސްޕޯރޓްސް އެކަޑަމީ ކުޅުނު ފަހު މެޗުންވެސް ބަލިވެ, މޮޅަކާ ނުލައި ނިންމާލައިފިއެވެ.

މެޗަށް ނުކުއިތްއިރުވެސް ނޯތު ލީގުގެ އެއްވަނަ ޑިވިޝަންގެ ފުރުސަތު ގެއްލިފައި އޮތް ނަރޫދޫ ފަހު މެޗުގައި ފުނަދޫ އަތުން ބަލިވީ 7-0ގެ ތަފާތު ބޮޑު ނަތީޖާއަކުންނެވެ. ކުޅުނު ހުރިހާ މެޗަކުންވެސް މޮޅުވެ އެއްވަނާގައި ފުނަދޫން ޖެހި ހަތް ލަނޑުގެ ތެރެއިން ފުރަތަމަ ތިން ލަނޑު ޖަހައި ހެޓްރިކް ހެދީ މުހައްމަދު އަގީލްއެވެ. ހަތަރުވަނަ ލަނޑާއި, ފަސްވަނަ ލަނޑު ޖެހީ އަލީ ރިޒްވީންއެވެ. ފަހު ދެ ލަނޑު ޖެހީ އަބްދުﷲ ޒަމީންއާއި އިބްރާހީމް ސައީދުއެވެ.

މިގްރޫޕްގެ އެއްވަނަ ޓީމްގެ ގޮތުގައި ފުނަދޫ، އަދި ދެވަނަ ޓީމްގެ ގޮތުގައި ނޯތު ލީގު އެއްވަނަ ޑިވިޝަނުން ޖާގަ ހޯދީ ފޯކައިދޫއެވެ.