ހުޅަނގުގެ ޑިމޮކްރަސީގެ ރާޅުބާނީ އުފެދުނު އަރަބި ބަހާރުގެ ތެރެއިން މަސްރަހު އެންމެ ހަލަބޮލިވި އެއް ގައުމަކީ ސޫރިޔާއޭ ދެންނެވުމުން ދެބަސްވާނެ މީހަކު މަދުވާނެއެވެ. އެ ގައުމުގެ ސަރުކާރާ ދެކޮޅަށް، މާޗް 15، 2011 ވަނަ ފެށި ސުލްހަވެރި ހަރަކާތް، މުޒާހަރާ އަކަށް ބަދަލުވެ، އެންމެ ފަހުން ވަރުގަދަ ހަނގުރާމައަކަށްވެސް ބަދަލުވީ ބައިނަލްއަގުވާމީ މުޖުތަމައުން ބަލަބަލާ އޮއްވައެވެ. ދާހިލީ ހަނގުރާމައެކޭ ކީ ކަމުގައިވީ ނަމަވެސް، ސޫރިޔާގެ ފަސްގަނޑުގައި ހަނގުރާމަ ކުރުމަށް ބައިވެރި ނުވާ ނަސްލެއް ނުވަތަ އަސްލެއް ނެތޭވެސް ދެންނެވިދާނެއެވެ. ބޮމާއި ބަޑީގެ ހަމަލާތަކުން މުޅި ގައުމު ގުގުމުން ދިޔައެވެ.

ހަނގުރާމައިގެ ވޭންވަރު ފިލާ ނުދަނީސް، ކޮރޯނާވައިރަސް ޑިޒީޒް (ކޮވިޑް-19)ގެ ރިހުންގަނޑާ ކުރިމަތިލާން ޖެހުނެވެ.

ނަމަވެސް، މިހާރު އެ ހަނގުރާމައަށް ޒާތެއްގެ ނިމުމެއް އައިސް، އާންމު ދިރިއުޅުމުގެ ކަންކަމައިގެން އުޅެވޭ ވަރު ވަނީ ވާން ފަށާފައެވެ. ސޫރިޔާގެ ވެރިރަށް ދިމިޝްކުގެ މަގުތަކަށް ބަލާލުމުން އެކަން ހާމަވެއެވެ. ހޫނު މޫސުމުގެ މިއުޒިކީ ކޮންސެޓްތައް އަލުން ބާއްވަން ފަށައިފިއެވެ. ބަލަން ވަންނަ މީހުންގެ އަދަދުވެސް މަދެއް ނޫނެވެ.

4 ދުވަހުގެ މުއްދަތަށް ދިމިޝްކުގައި މިހާރު ކުރިއަށް ގެންދާ މިއުޒިކް ޝޯވއަކީ، އަވަށްޓެރި ލުބްނާނާއި އިރާޤުންވެސް މިއުޒިކީ ފަންނާނުން ޒިޔާރަތްކޮށްގެން ކުރިއަށްގެންދާ އިވެންޓެކެވެ.

ޝޯވގައި ލަވަ ހުށަހަޅާދޭ އެކަކީ، ސޫރިޔާގެ ލަވަކިއުންތެރިޔާ ނާސިފް ޒައިތޫންއެވެ. ޒައިތޫންގެ އުއްމީދަކީ، އެ ޝޯވގެ ސަބަބުން، ސޫރިޔާގެ ރައްޔިތުންގެ ހިތްތަކުގައި އުއްމީދުގެ ހުޅުކޮޅު ރޯވެގެން ދިއުމެވެ.

މި ދުވަސްވަރަކީ ސޫރިޔާއަށްވެސް އިގުތިސާދީ ގޮންޖެހުންތަކާ ކުރިމަތިލާން ޖެހިފައިވާ ދަނޑިވަޅެކެވެ. ޝޯވގެ ޓިކެޓްތަކުގެ އަގު ކަނޑައެޅުމުގައިވެސް އެކަމަށް ވިސްނި ކަމަށް، މީޑިއާ ކޯޑިނޭޓަރު ނޫރު ޝައްތީ ބުންޏެވެ.

ޓިކެޓް ވިއްކަން އިއުލާން ކުރުމާއެކު، 4 ޝޯވގެ ތެރެއިން 2 ޝޯވ ހައުސްފުލްވިއެވެ. ޝޯވ ބަލަން ވަތް މީހަކު ބުނި ގޮތުގައި އަގުތަކަކީ ގަބޫލު ކުރެވޭ ފަދަ އަގުތަކެކެވެ. ވީއައިޕީ ގޮނޑިބަރީގެ ޓިކެޓެއް، ގާތްގަނޑަކަށް 38 ޑޮލަރަށް ހުރި އިރު، އެހެން ޓިކެޓްތަކުގެ އަގު އުޅެނީ 7 ޑޮލަރާއި 9 ޑޮލަރާ ދެމެދުގެ އަގުތަކެއްގައެވެ.