ފޯކައިދޫއާއި ފުނަދޫ އެއްވަނަ ޑިވިޝަނަށް
24 ޖުލައި 2022 | އާދީއްތަ 09:57ނަރުދޫއަށް ފުރުޞަތެއް ނެތް
ފޯކައިދޫއާއި ނަރުދޫ ވާދަކުރި މެޗުގެ ތެރެއިން
އެމްޓީސީސީ ނޯތު ލީގު/ އެއްވަނަ ޑިވިޝަނުން ފޯކައިދޫއާއި ފުނަދޫއަށް ޖާގަ ލިބިއްޖެއެވެ.
ފުނަދޫއާއި އެސޯސިއޭޝަން ފޯރ ފޯކައިދޫ ޔޫތް ޑިވެލޮޕްމަންޓަށް ޖާގަ ޔަޤީންވީ މިގްރޫޕްގައި ދެން ހިމެނޭ ނަރުދޫ ރަމުޒު ސްޕޯރޓްސް އެކަޑަމީ ތިން މެޗުންވެސް ބަލިވުމުންނެވެ. ތިން ޓީމް ހިމެނޭ ގްރޫޕުން އެއްވަނަ ޑިވިޝަންގެ ޖާގަ ލިބެނީ އެންމެ ކުރިހޯދާ ދެޓީމަށެވެ. ނަރުދޫ ވަނީ ތިން މެޗުންވެސް ބަލިވެފައެވެ. ތިންވަނަ މެޗުގައި ފޯކައިދޫ އަތުން ބަލިވީ 8-2 ލަނޑުންނެވެ. މެޗުގައި ފޯކައިދޫގެ އިބްރާހީމް މުޝީރު ތިން ލަނޑު ޖަހާ ހެޓްރިކެއް ހެދިއެވެ. މީގެއިތުރުން އަބުދުލް މާލިކު ދެ ލަނޑު ޖެހިއެވެ. ފޯކައިދޫގެ ފުރަތަމަ ދެ ލަނޑު ޖެހީ މުޙައްމަދު ރިޝްވާންއާއި, އަހުމަދު ރިލްވާންއެވެ. ނަރުދޫގެ ދެ ލަނޑު ޖެހީ އަލީ ރަމްޒީއާއި, ހުސެއިން ހަލީމްއެވެ. ނަރުދޫ ކެޓިނަމަވެސް ބާކީ އަދި އެއް މެޗު އެބައޮތެވެ.
މިގްރޫޕްގައި ހިމެނޭ ފުނަދޫ ޔުނިޓީ ސްޕޯރޓްސް އެކަޑަމީން ވަނީ ފުރަތަމަ ކުޅުނު ދެ މެޗުވެސް ކާމިޔާބުކޮށްފައެވެ. ފޯކައިދޫ ވަނީ ތިން މެޗުގެ ތެރެއިން ދެ މެޗު ކާމިޔާބުކޮށްފައެވެ.
