ރަފީނިއާގެ ލަނޑާއެކު ބާސެލޯނާއިން ރެއާލް މެޑްރިޑް ބަލިކޮށްފި

ކުރިއަށް އޮތް ސީޒަނަށް ތައްޔާރުވުމުގެ ގޮތުން ކުޅުނު އެކުވެރިކަމުގެ މެޗުގައި ބާސެލޯނާއިން ރެއާލް މެޑްރިޑުގެ މައްޗަށް ކުރި ހޯދައިފިއެވެ.

ދެ ޓީމުން ވެސް މުހިންމު ގިނަ ކުޅުންތެރިންނާއެކު ކުޅުނު މި މެޗު ބާސާއިން ކާމިޔާބުކުރީ 1-0 ންނެވެ. މި މެޗުގައި ރެއާލްގެ ކަރީމް ބެންޒީމާ ކުޅެފައެއް ނުވެއެވެ. އެހެންނަމަވެސް އެ ޓީމުގެ މުހިންމު ގިނަ ކުޅުންތެރިންނަށް ކޯޗު އަންޗެލޮޓީ ވަނީ ފުރުސަތު ދީފައެވެ. ރެއާލާ ދެކޮޅަށް ކުޅުނު މެޗުގައި ބާސާއިން ވަނީ ދާދި ފަހުން އެޓީމާ ގުޅުނު ރޮބާޓް ލެވަންޑޯސްކީ ފުރަތަމަ 11 ގައި ހިމަނާފައެވެ. މިއީ ބާސާއަށް ބަދަލުވި ފަހުން ލެވަންޑޯސްކީ އެޓީމަށް ކުޅެދިން ފުރަތަމަ މެޗެވެ.

މެޗުގެ ހަމައެކަނި ލަނޑު 27 ވަނަ މިނެޓުގައި ޖެހީ ބާސާގެ ބްރެޒިލް ފޯވާޑް ރަފީނިއާއެވެ. މިއީ ރަފީނިއާ ބާސާއަށް ޖަހައިދިން ދެވަނަ ލަނޑެވެ. މީގެ ކުރިން ބާސާއިން އިންޓަ މިއާމީއާ ދެކޮޅަށް ކުޅުނު މެޗުގައި ވެސް އޭނާ ވަނީ ލަނޑެއް ޖަހާފައެވެ. އަދި އެ މެޗުގައި ރަފީނިއާ ވަނީ ދެ ލަނޑު ޖެހުމަށް އެހީތެރިވެދީފައެވެ. އެ މެޗަށްފަހު ރަފީނިއާ ބުނީ ބާސާގެ މުޅި ޓީމު މިހާރު އޮތީ ވަރުގަދަކޮށް ކަމަށާއި، ރެއާލަށްވުރެ ވެސް ބާސާ ވަރުގަދަ ކަމަށެވެ. މީގެ އިތުރުން އޭނާ އޭރު ބުނީ ދެން އޭނާ އެންމެ ބޭނުންވަނީ ރެއާލާ ދެކޮޅަށް ކުޅެ، ލަނޑު ޖަހަން ކަމަށެވެ.

އެކުވެރިކަމުގެ މެޗެެއްގައި ދެން ބާސާ ނުކުންނާނީ މި މަހުގެ 27 ވަނަ ދުވަހު އިޓަލީގެ ޔުވެންޓަސްއާ ދެކޮޅަށެވެ. އެކުވެރިކަމުގެ ފަހު މެޗުގައި ބާސާ ނުކުންނާނީ އެންވައި ރެޑް ބުލްސްއާ ދެކޮޅަށެވެ. މި މަހުގެ 27 ގައި ރެއާލް ނުކުންނާނީ ސީއެފް އެމެރިކާއާ ދެކޮޅަށެވެ. އޭގެ ފަހުން މި މަހުގެ 30 ވަނަ ދުވަހު ރެއާލް ނުކުންނާނީ ޔުވެންޓަސްއާ ދެކޮޅަށެވެ.