އަފްޣާނިސްތާން: ބައިނަލްއަގުވާމީ އެކަހެރި ކަމާއެކު އާލަމީ ފަގީރުކަމުގައި

ބައިނަލްއަގުވާމީ މުޖުތަމައުން އަފްޣާނިސްތާނާ ދެކޮޅަށް ދަތިކުރުމުގެ ފިޔަވަޅު ތަންފީޒު ކުރަމުން ދަނީ އެ ގައުމުގެ ކޮންޓްރޯލްގައި، ހަތިޔާރުއެޅި ހަނގުރާމަވެރިންގެ ޖަމާއަތެއް އޮތުމުން ކަމަށް ބުނެއެވެ. ނަމަވެސް، އަފްޣާނިސްތާނުގެ ވެރިރަށް ކާބުލްގެ ރަށްވެހިން ބުނާ ގޮތުގައި އެ ފިޔަޅުތަކާއެކު ކުރިމަތިލާން ޖެހިފައިވަނީ މާބޮޑު ތަކުލީފަކާއެވެ. ދަތިކުރުމުގެ ފިޔަވަޅުތަކުގެ ސަބަބުން އިގުތިސާދު އިނދަޖެހެމުންދާ ވަރަކަށް، އިންތިހާ ފަގީރުކަމާއި ބަނޑުހައިހޫނުކަމުގެ ތެރެއަށް ވެއްޓިގެން ދަނީ އާންމު ރައްޔިތުން ކަމަށް، ކާބުލްގެ ރަށްވެހިން ފާހަގަކުރެއެވެ.

އދގެ އަންދާޒާތަކަށް ބަލާއިރު އަފްޣާނިސްތާނުގެ އާބާދީގެ 95 އިންސައްތަ މީހުންނަށް ވަނީ ކާބޯތަކެތީގެ ދަތިކަން ކުރިމަތިވެފައެވެ. އަދި، މުޅި އާބަދީގެ 2 ބައިކުޅަ 1 ބައި މީހުންނަށް ވަނީ އިންތިހާ ބަނޑުހައިހޫނުކަމާވެސް ކުރިމަތިލާން ޖެހިފައެވެ.

ހަމަޖެހުމާއި ސަލާމަތްތެރިކަން އޮތެއް ކަމަކު، ހުރިހާ ކަމެއް ފުރިހަމަ ވީ ނޫން ކަން، ކާބުލްގެ ރަށްވެހިންގެ ވާހަކަތަކުން އެނގިގެން ދެއެވެ.

އޯގަސްޓް 2021ގައި ތާލިބާން ޖަމާއަތުން ކޮންޓްރޯލް ނެގި އަފްޣާނިސްތާނުގެ ގިނަ ރައްޔިތުންގެ ޝަކުވާއަކީވެސް ހަމަ އެއީއެވެ.

ފާއިތުވީ 20 އަކަށް އަހަރު ދުވަހު، އެމެރިކާ ސިފައިން އަފްޣާނިސްތާނަށް އަތްގަދަކޮށްގެން އުޅުނު ދުވަސްވަރު، އެ ގައުމުގެ އިގުތިސާދުގެ 80 އިންސައްތަ ހިއްސާ ކުރީ ބޭރުގެ ފަންޑުންނެވެ. ނަމަވެސް މިދިޔަ އަހަރު ކުއްލި ގޮތަކަށް އެމެރިކާ ސިފައިން އަފްޣާނިސްތާނުން ފައިބައިގެން ދިއުމާ އެކުގައިހެން އެ އެހީ ހުއްޓުމަކަށް އައެވެ. އިނދަޖެހެމުން ދިޔަ އަފްޣާނިސްތާނުގެ އިގުތިސާދު، ބައިނަލްއަގުވާމީ ވިއުގާއިން މުޅުން ވަކިކޮށްލެވުނެވެ.

އެމެރިކާ ޑޮލަރު އަފްޣާނިސްތާނަށް ޓްރާންސްފާ ކުރުން ވަގުތުން ވަގުތަށް މަނާ ކުރިއެވެ. އަފްޣާނިސްތާނުގެ އަމިއްލަ ފައިސާ ޖެހުން ހުއްޓުމަކަށް ގެނައެވެ. ބައިނަލްއަގުވާމީ ފެންވަރުގައި މުހިންމު މާލީ މުއާމަލާތްތަކެއް ކުރާ ނިޒާމް ނުވަތަ ސޮސައިޓީ ފޮ ވޯލްޑްވައިޑް އިންޓަބޭންކް ފައިނޭންޝަލް ޓެލެކޮމިއުނިކޭޝަން (ސްވިފްޓް) އިން އަފްޣާނިސްތާނު ވަކިކޮށްލިއެވެ. ބައިނަލްއަގުވާމީ މާލީ މުއާމަލާތްތަކުގެ ބޮޑު ބައެއް ހިއްސާ ކުރަނީ ސްވިފްޓްއިންނެވެ.

ބައިނަލްއަގުވާމީ މައިދާނުގައި އަފްޣާނިސްތާނުގެ އިގުތިސާދު އެކަހެރި ކޮށްފައި އޮތް އޮތުމަށް ކައިރި މުސްތަގުބަލެއްގައި ބަދަލެއް އަތުވެދާނެ ކަމަކަށް ނުބެލެވެއެވެ. އަފްޣާނިސްތާނުގައި "އާލަމީ" އިންތިހާ ފަގީރުކަން ފެތުރިގެން ހިނގައިދާނެ ކަމުގެ ބިރު އެބަ އޮތްކަން އދއިން ފާހަގަ ކުރެއެވެ. ވޯލްޑް ބޭންކުން ކަނޑައަޅާފައިވާ އިންތިހާ ފަގީރުކަމުގެ މިންގަނޑަކީ، ދުވާލެއްގެ މައްޗަށް 1.9 އެމެރިކާ ޑޮލަރު ނުޖެހުން ކަމަށް ވާ އިރު، އެ ހާލަތަށް ވުރެ ދަށުގައި މި އަހަރު އަފްޣާނިސްތާނުގެ 97 އިންސައްތަ މީހުން ދިރިއުޅޭނެ ކަމަށް އދއިން އަންދާޒާ ކުރެއެވެ.