ރޮނާލްޑޯގެ ރެކޯޑެއް ޑިބާލާ މުގުރާލައިފި

އިޓަލީގައި ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ހަދާފައިވާ ރެކޯޑެއް އާޖެންޓީނާގެ ޕައުލޯ ޑިބާލާ މުގުރާލައިފިއެވެ.

ޑިބާލާ ވަނީ އިޓާލިއަން ލީގުގެ ޔުވެންޓަސް ދޫކޮށް ރޯމާއަށް ދާދި ފަހުން ބަދަލުވެފައެވެ. އެއާއެކު އޭނާ މުގުރާލާފައިވަނީ މީގެ ކުރިން ރެއާލް މެޑްރިޑު ދޫކޮށް ޔުވެންޓަސްއަށް ރޮނާލްޑޯ ބަދަލުވީއިރު އޭނާ ހަދާފައިވާ އެންމެ ގިނަ ޖަރޒީ ވިކުނު ރެކޯޑެވެ. އިޓަލީގެ ނޫހެއްގައި ބުނެފައިވާ ގޮތުގައި ރޯމާއިން ޑީބާލާ ހޯދުމާއެކު، އޭނާގެ ޖަރޒީ ބާރު މިނެއްގައި ވަނީ އިޓަލީގައި ވިކިފައިކަމަށެވެ.

ޑިބާލާ ވަނީ މީގެ ކުރިން ރޮނާލްޑޯއާއިއެކު ޔުވެންޓަސްއަށް ކުޅެފައެވެ. އޭގެ ފަހުން ރޮނާލްޑޯ ވަނީ ޔުވެންޓަސް ދޫކޮށް ޔުނައިޓެޑަށް ބަދަލުވެފައެވެ. ނިމުނު ސީޒަނުގެ ނިޔަލަށް ޔުވެންޓަސްއާއިއެކު ހަދާފައިވާ އެއްބަސްވުމުގެ މުއްދަތު ހަމަވުމުން، ޑިބާލާ ވެސް ވަނީ ޓީމު ދޫކޮށްލަން ނިންމާފައެވެ. އެއަށްފަހު އޭނާ ވަނީ ހިލޭ ޓްރާންސްފާއެއްގައި ރޯމާއަށް ބަދަލުވެފައެވެ.

އިޓަލީގެ ނޫސްތަކުގައި ރިޕޯޓުކޮށްފައިވާ ގޮތުގައި ރޯމާއިން ޑިބާލާ ހޯދިކަން ރަސްމީކޮށް އިއުލާން ކުރުމާއެކު، އޭނާގެ ޖަރޒީ ގަންނަ ނިސްބަތް ވަނީ އިތުރުވެފައެވެ. އެއީ 2018 ވަނަ އަހަރު ރޮނާލްޑޯ ޔުވެންޓަސް އަށް ބަދަލުވި އިރު، އޭނާގެ ޖަރޒީ ވިކުނު އަދަދެއްވުރެ ބޮޑު އަދަދެއް ކަމަށް ރިޕޯޓުގައިވެއެވެ. ރިޕޯޓުގައިވާ ގޮތުން މިހާތަނަށް ޑިބާލާގެ ޖަރޒީ ވިކުނު ސީދާ އަދަދެެއް ކަށަވަރުވާކަށް ނެތެވެ. ނަމަވެސް، ވަރަށް އަވަހަށް އެ އަދަދު ޔަގީން ކުރެވޭނެ ކަމަށް ބުނެފައިވެއެވެ.

ރޯމާއިން ޑިބާލާ ހޯދީ އެ ޓީމުގެ ކޯޗު މޮރީނިއޯގެ އެދުމެއްގެ މަތިންނެވެ. ޑިބާލާ ވަނީ ޔުވެންޓަސް އަށް އޭނާ ކުޅެދިން 293 މެޗުގައި 115 ލަނޑު ޖަހާފައެވެ. އަދި ޔުވެންޓަސްއާއެކު އިޓާލިއަން ލީގު، އިޓާލިއަން ކަޕް އަދި އިޓާލިއަން ސުޕަ ކަޕް އޭނާ ކާމިޔާބުކޮށްފައިވެއެވެ. މީގެ އިތުރުން އާޖެންޓީނާގެ ޤައުމީ ޓީމުގައި ވެސް ހިމެނޭ ޑިބާލާ ވަނީ ޤައުމީ ޓީމަށް ކުޅެދިން 34 މެޗުގައި ތިން ލަނޑު ޖަހާފައެވެ.