އަތޮޅުތެރޭގެ އެންމެ ބޮޑު ހައުސިންގ ޕްރޮޖެކްޓު ހިންގަނީ ކުޅުދުއްފުށީގައި: މޭޔަރ
23 ޖުލައި 2022 | ހޮނިހިރު 13:18އާތިފް ވިދާޅުވީ މި ސަރުކާރުން ކުޅުދުއްފުށީގެ ތަރައްގީއަށް ގިނަ މަސައްކަތްތަކެއް ކުރަމުން އަންނަ ކަމަށް
ކުޅުދުއްފުށި ސިޓީ ކައުންސިލްގެ މޭޔަރ މުހައްމަދު އާތިފް
އަތޮޅުތެރޭގައި މިހާތަނަށް ކުރިއަށްގެންދާ އެންމެ ބޮޑު ހައުސިންގ ޕްރޮޖެކްޓް ހިންގަނީ ކުޅުދުއްފުށީގައި ކަމަށް އެ ސިޓީގެ މޭޔަރ މުޙައްމަދު އާތިފު ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީގައި ވާހަކަދައްކަވަމުން މޭޔަރ އާތިފު ވިދާޅުވީ ކުޅުދުއްފުއްޓަށް ދިމާވެފައިވާ އެންމެ ބޮޑު އެއް މައްސަލައަކީ ބޯހިޔާވަހިކަން ކަމަށެވެ. އެގޮތުން، މިހާރުން މިހާރަށް ވެސް ބޯހިޔާވަހިކަން ބޭނުންވާ 1200 އާއި 1500 އާ ދެމެދުގެ އާއިލާ އެބަތިބިކަން އޭނާ ފާހަގަ ކުރެއްވިއެވެ.
ކުޅުދުއްފުށީގައި އެންމެ ފަހުން ހައުސިންގ މަޝްރޫއެއް ކުރިއަށްދިޔައީ 2011 ވަނަ އަހަރުކަން ފާހަގަ ކުރައްވައި މޭޔަރ ވިދާޅުވީ އެ މަސައްކަތް ވެސް ސަރުކާރު ބަދަލުވުމާއެކު މަޑުޖެހުނު ކަމަށެވެ. އަދި ކުރީ ސަރުކާރުން އެކަމަށް އިސްކަމެއް ނުދޭ ކަމަށާއި ނަމަވެސް މި ސަރުކާރު ވެރިކަމާ ހަވާލުވެ އެތަނުގެ މަސައްކަތް ވެސް އަލުން ފަށާފައިވާ ކަން އޭނާ ފާހަގަ ކުރެއްވިއެވެ. އެގޮތުން، އޭގެ ތެރެއިން 40 ރޯހައުސް މިހާތަނަށް ނިންމައި ހަވާލުކޮށްފައިވާއިރު ބާކީހުރި 105 ރޯހައުސްގެ މަސައްކަތް ނިމެން ކައިރިވެފައިވާ ކަމަށް އާތިފު ވިދާޅުވިއެވެ.
އާތިފު ވިދާޅުވިގޮތުގައި މިހާރު މަރާމާތް ކުރަމުންދާ ރޯހައުސްތައް އަންނަ އޮގަސްޓް މަހު ނިންމާލެވޭނެއެވެ.
އާތިފު ވިދާޅުވީ މި ސަރުކާރުން ކުޅުއްފުށީގެ ތަރައްގީއަށް ގިނަ މަސައްކަތްތަކެއް ކުރަމުން އަންނަ ކަމަށެވެ. އެގޮތުން ދާދިފަހުން ހަވާލު ކުރި އެ ރަށުގެ 400 ހައުންސިންގ ޔުނިޓުގެ މަސައްކަތް ފާހަގަ ކޮށްލެވޭ ކަމަށް އޭނާ ވިދާޅުވިއެވެ.
މޭޔަރ ވިދާޅުވީ މި 400 ހައުސިން ޔުނިޓް ބަހާލަނީ 11 ބުރީގެ 5 ޓަވަރަށް ކަމަށެވެ. ކޮންމެ އެޕާޓްމަންޓެއްގައި 1000 އަކަފޫޓު ހުންނައިރު ކޮންމެ އެޕާޓްމަންޓެއްގައި ތިން ކޮޓަރި ހުންނާނެ ކަމަށް ވެސް އޭނާ ވިދާޅުވިއެވެ. އެ މަސައްކަތުގެ ކޮންޓްރެކްޓަރާ ހަވާލާދީ އޭނާ ވިދާޅުވި ގޮތުގައި މި މަޝްރޫއުގެ އަމަލީ މަސައްކަތް އަންނަ އޮކްޓޯބަރު، ނޮވެމްބަރު ހިސާބު މަސައްކަތް ފަށާނެއެވެ.
ސަރުކާރު ޕީއެސްއައިޕީ ބަޖެޓުގައި ހިމަނައިގެން ކުރިއަށްގެންދާ މި ޕްރޮޖެކްޓުގެ މަސައްކަތް ސަރުކާރުން ހަވާލުކޮށްފައިވަނީ ންބޭޒް ޕްރައިވެޓް ލިމިޓެޑްގެ ޖޮއިންޓް ވެންޗަރ ކުންފުންޏެއް ކަމަށްވާ ޓުވެންޓީ ތާރޑް މެޓާލާޖިކަލް ކޮންސްޓްރަކްޝަން ގްރޫޕް ކޯ ލިމިޓެޑާއެވެ. އެ ކުންފުންޏާ މި މަސައްކަތް ހަވާލުކޮށްފައިވަނީ 7 ޖުލައި 2022 ގައެވެ.
ކުޅުދުއްފުށީގެ ތަރައްގީއަށް ސަރުކާރުން ކުރަމުން އަންނަ މަސައްކަތްތަކުގެ ތެރޭގައި އެ ރަށުގެ މަގުތައް ތަރައްގީ ކުރުމާއި އައު ބަނދަރު ތަރައްގީ ކުރުމާއި ހޮސްޕިޓަލު ތަރައްގީ ކުރުންވެސް ހިމެނެއެވެ.
