ހިނގާ ފަރާތްތަކުގެ ރައްކާތެރިކަމަށް ހުޅުމާލޭގައި ޓްރެފިކް ލައިޓުތަކެއް ބަހައްޓަނީ
23 ޖުލައި 2022 | ހޮނިހިރު 12:27ހުޅުމާލޭގައި އާއްމުކޮށް ގިނައިން މީހުން މަގު ހުރަސްކުރާ ސަރަހައްދުތަކުގައި މި ލައިޓުތައް ބަހައްޓާނެ
އެޗްޑީސީން ހުޅުމާލޭގައި ޓްރެފިކް ލައިޓް ހަރުކުރަނީ
މަގުމަތީގައި ހިނގާފައި އުޅޭ ފަރާތްތަކުގެ ރައްކާތެރިކަން ކަށަވަރުކުރުމަށް ހުޅުމާލޭގައި އެ ފަރާތްތަކަށް ހާއްސަ ޓްރެފިކް ލައިޓްތައް ބެހެއްޓުމުގެ މަސައްކަތް ފަށައިފިއެވެ.
މި މަސައްކަތް ނިންމައި އާދީއްތަ ދުވަހު އެ ލައިޓްތަކުގެ ޚިދުމަތް ފަށަން ވަނީ ނިންމައިފައެވެ. މިއީ ކުރިއަރާފައިވާ ޤައުމުތަކުގައި މަގު ހުރަސް ކުރާ ފަރާތްތަކަށް ހާއްސަކޮށްގެން ބަހައްޓާ "ޕެޑެސްޓްރިއަން ކްރޮސިން ލައިޓް"ތަކެކެވެ.
މި ލައިޓުތައް ހުޅުމާލޭގައި އާއްމުކޮށް އެންމެ ގިނައިން މީހުން މަގު ހުރަސް ކުރާ ސަރަހައްދުތަކުގައި ބަހައްޓާނެއެވެ. އެޗްޑީސީން މައުލޫމާތު ދޭ ގޮތުގައި އަދި މި ލައިޓުތައް ބަހައްޓަނީ ހުޅުމާލެ ފުރަތަމަ ފިޔަވަހީގައެވެ.
މި ޓްރެފިކް ލައިޓްތައް ބެހެއްޓުމުގެ އެންމެ މުހިންމު އެއް ބޭނުމަކީ ހުޅުމާލެއަކީ މަގު ހުރަސް ކުރާ ފަރާތްތަކަށާއި އުޅަނދުފަހަރު ދުއްވާ ފަރާތްތަކަށް ރައްކާތެރި ތަނަކަށް ހެދުން ކަމަށް އެޗްޑީސީން ބުންޏެވެ. އަދި މީގެ ސަބަބުން މަގު ހުރަސް ކުރާ ފަރާތްތަކަށް ލުއި ފަސޭހަތަކެއް ވެގެންދާނެ ކަމަށް ވެސް އެ ކުންފުނިން ބުންޏެވެ.
ޕެޑެސްޓްރިއަން ކްރޮސިން ލައިޓަކީ މަގު ހުރަސް ކުރަން ބޭނުންވާ ފަރާތްތަކުން ފިތަކަށް ފިއްތާލުމުން މީހުން މަގު ހުރަސް ކުރާކަން އަންގައިދޭގޮތައް ހަދާފައިވާ ލައިޓެކެވެ. ފިތަށް ފިއްތާލުމުން މަގުމަތީގައި ދުއްވާ އެހެން އުޅަނދުތަކަށް މަޑުކުރެވޭނެ ވަގުތު ލިބޭއިރު މަގު ހުރަސް ކުރުމަށް ވެސް ވަގުތުކޮޅެއް ލިބޭނެއެވެ.
މަގު ހުރަސް ކުރަން ރައްކާތެރިކަން މި ލައިޓުން އަންގައިދޭއިރު މަގު ހުރަސްކުރުން ރައްކާތެރި ނޫންކަން ވެސް ހުރަސް ކުރާ ފަރާތްތަކަށް އެ ލައިޓުން އެނގޭނެއެވެ.
ހުޅުމާލޭގައި އެންމެ ގިނައިން މީހުން މަގު ހުރަސްކޮށް އުޅޭ އެއް ސަރަހައްދަކީ ހުޅުމާލެ ހޮސްޕިޓަލު ސަރަހައްދެވެ. އެ ސަރަހައްދުގައި ޓްރެފިކް ލައިޓެއް ވަނީ ބަހައްޓައިފައެވެ.
ހަފްތާ ބަންދުތަކުގައި ހުޅުމާލޭގައި ދުއްވާ އުޅަނދުތަކުގައި އާއްމުން ގިނައެވެ. އެގޮތުން، ހުކުރު ހޮނިހިރު ދެ ދުވަހު ހަވީރު ވަގުތު ހުޅުމާލެއަށް ދާ މީހުން ވަރަށް ގިނަ ކަން ވަނީ ފާހަގަ ކުރެވިފައެވެ. އެހެންކަމުން މި ޓްރެފިކް ލައިޓުތައް ވެގެންދާނީ މަގުމަތީގެ އަމާންކަން މިހާރަށްވުރެ ބޮޑަށް ކަށަވަރުކޮށްދޭނެ އެއްޗަކަށެވެ.
ހުޅުމާލޭގެ މަގުތަކަކީ އާއްމުންނަށް ރައްކާތެރިތަނަކަށް ހެދުމަށް އެޗްޑީސީން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން، މަގު ހުރަސް ކުރާ ފަރާތްތަކަށް ހާއްސަ ޓްރެފިކް ލައިޓުތަކުގެ އިތުރުން ހުޅުމާލޭގައި އަނދިކަމަށް ފާހަގަ ކުރެވޭ މަގުތަކުގައި ބައްތި ހަރުކުރުމުގެ މަސައްކަތް ވެސް އެ ކުންފުނިން އަންނަނީ ކުރަމުންނެވެ.
