ތަޖުރިބާކާރު ފަޑިޔާރުންނަށްވެސް ގޮތް ނިންމަން ދަތި މައްސަލަތަކުގައި މީޑިޔާއިން ކެންގަރޫ ކޯޓުތައް ހިންގަމުން ގެންދާކަމަށް އިންޑިޔާގެ ޗީފް ޖަސްޓިސް އެމް.ވީ ރަމާނާ ވިދާޅުވެއްޖެއެވެ.
ކެންގަރޫ ކޯޓުކަމަށް ބުނެ އުޅެނީ އެއްވެސް ރަސްމީ ހައިސިއްޔަތެއް ނެތް ޒިންމާއެއް އުފުލަން ނުޖެހި، ހިތަށް އެރިހާ ގޮތަކަށް އަމިއްލަ އަމިއްލަޔަށް ހިންގާ "ޝަރީއަތް" ތަކަށް ނުވަތަ ގޮތް ނިންމުމަށެވެ.
އިންޑިޔާގެ ޗީފް ޖަސްޓިސް ހޮނިހިރު ދުވަހު ވިދާޅުވީ އެކި ފަޑިޔާރުންނާ ދެކޮޅަށް ވެސް ސޯޝަލް މީޑިޔާގައި ހިންގަމުންގެންދާ މިފަދަ ކޯޓުތައް ނުވަތަ އަމިއްލަ ޝަރީއަތްތަކުގެ ސަބަބުން އަސްލު ޖުޑީޝަލް މަސައްކަތް އޭގެ ގޮތުގައި ކުރިޔަށްގެންދަން ހުރަސްއެޅިފައިވާ ކަމުގައެވެ. އިންސާފުން ޝަރީއަތެއް ކުރުމަކީ ވަރަށް ބޮޑު މަސްއޫލިއްޔަތެއްކަން ފާހަގަކުރައްވަމުން އޭނާ ވިދާޅުވީ ފަނޑިޔާރުންގެ މަސައްކަތަކީ ފަސޭހަ މަސައްކަތެއް ކަމަށާއި އެމީހުންގެ ދިރިއުޅުމަކީ ހާސްކަމެއް ނެތް ދިރިއުޅުމެއްކަމަށް ބުނެ މީޑިޔާގައި ގެނެސްދޭ ރިޕޯޓްތައް އަޑުއަހަން ފަސޭހަ ނޫން ކަމުގައެވެ. އަދި މައުލޫމާތު ނުހޯދާ، އެއްފަރާތަށް ބުރަވެފައިވާ މިފަދަ ރިޕޯޓްތަކުގެ ސަބަބުން ކޯޓުތަކުން އިންސާފުން މަސައްކަތް ކުރުމަށް ހުރަސްއެޅިފައިވާ ކަމުގައި ޗީފް ޖަސްޓިސް ރަމާނާ ވިދާޅުވިއެވެ.
ޕްރިންޓް މީޑިޔާގައި ދެކެވޭ ވާހަކަތަކަށް ކޮންމެވެސް ވަރަކަށް ޒީންމާ ކުރުވޭ ނަމަވެސް އިލެކްޓްރޯނިކް މީޑިޔާގައި ދެކެވޭ ވާހަކަތައް ދަނީ ވައިގެ ތެރެޔަށް ހިންދިގެން ކަމަށް ޗީފް ޖަސްޓިސް ރަމާނާ ވިދާޅުވިއެވެ. ނިއު މީޑިޔާ ނުވަތަ ސޯޝަލް މީޑިޔާ ވަރަށް ބާރުގަދަ ކަމަށާއި އޭގެ ވަސީލަތްތައް މެދުވެރިކޮށް ދޫކޮށްލާ އެއްޗެއް މާދުރަށް އަދި މާފުޅާކޮށް ފެތުރުމުގެ ގާބިލުކަން ހުރިނަމަވެސް، ރަނގަޅާއި ނުބައި ނުވަތަ ތެދު ދޮގު ވަކިކުރުމުގެ ގާބިލްކަން ނިއު މީޑިޔާއަށްވެސް ލިބިފައިނުވާކަން އޭނާ ފާހަގަކުރެއްވިއެވެ. އަދި މިކަމުގައި އެންމެ ރަނގަޅު ގޮތަކީ މީޑިޔާތައް އަމިއްލަޔަށް "ސެލްފް ރެގުއުލޭޓް" ވުން ކަމަށް ވެސް އޭނާ ވިދާޅުވިއެވެ.
އިންޑިޔާގެ ޖުޑީޝަލް ނިޒާމްގެ މަސައްކަތްތަކަށް އަލިއަޅުވާލައްވަމުން ޗީފް ޖަސްޓިސްވަނީ ކޯޓުތަކުގައި ނުބެލި ގިނަ ދުވަސްވެ ފުނި ޖެހެމުންދާ މައްސަލަތަކާމެދު ކަންބޮޑުވުން ފާޅުކުރައްވާފައެވެ. އަދި ކުއްލި ކުއްލިއަށް ގެންނަ ބައެއް ކަހަލަ ބަދަލުތައް ފިޔަވައި މައްސަލައަށް ހައްލު ހޯދުމަށް ދުރާލާ ރޭވިގެން ކަމެއް ކުރަމުންދާތަން ނުފެންނަ ކަމަށް ވިދާޅުވި އެވެ.
މީޑިޔާގައި ހިންގާ ކެންގަރޫ ކޯޓުތަކާއި ބެހޭ ގޮތުން އަވަށްޓެރި އިންޑިޔާގެ ޗީފް ޖަސްޓިސް ވާހަކަފުޅު ދައްކަވާފައިވާއިރު ރާއްޖޭގައިވެސް ވަނީ މިމައްސަލަ ވަރަށް ބޮޑުވެފައެވެ.
