އާރްޓީއެލްއާއެކު، ގިނަ ވަޒީފާތަކެއް އުފަންކޮށްފި

ޒުވާނުން ބާރުވެރިކޮށް، ޒުވާނުންނަކީ ދެއަތް އުރާލައިގެން ތިބޭ ބައެއް ނޫންކަން ޔަގީންކުރުމަށް މި ސަރުކާރުން އެތައް މަސައްކަތެއް ކުރެއެވެ. އެކި ދާއިރާތަކުން ވަޒީފާ އުފެއްދުމަށް އިސްކަންދެއެވެ. އެކި ލެވެލްތަކުން އިތުރު ވަޒީފާތައް އުފެދިގެން އަންނައިރު، މިއަދު ވަޒީފާއެއް ނުލިބިފައި ހުންނަންނުޖެހޭ މިންވަރަށް ވަޒީފާތައް އަންނަނީ އިތުރުވަމުންނެވެ. އާމްދަނީ ހޯދުމަށް އަދާކުރަން "ހަޑި" ވަޒީފާއެއް ނޯންނާނެއެވެ. ހަލާލު އެއްވެސް މަސައްކަތަކީ "ހަޑި" މަސައްކަތެއް ނޫންކަން ދަންނަންޖެހެއެވެ.

ކޮވިޑް-19ގެ ތެރޭގައި އެތައް ބައެއްގެ ވަޒީފާ ގެއްލިގެންދިޔައެވެ. އެހެންނަމަވެސް މި ސަރުކާރުން ތައާރަފުކޮށްފައިވާ ޖޮބް ސެންޓަރ މެދުވެރިކޮށް އެތައް ބަޔަކަށް ވަޒީފާ ހޯދައިދީފައިވެއެވެ. މީގެއިތުރުން ގައުމުގެ ތަރައްގީއަށް އެތައް މަސައްކަތެއް ކުރެވިގެންދާއިރު، މިއިން ކޮންމެ މަސައްކަތަކުންވެސް އުފެދެނީ އިތުރު ވަޒީފާތަކެކެވެ. އެކި ލެވެލްތަކުން ވަޒީފާތައް އުފެދިގެން އަންނައިރު، މިވަގުތު އެންމެ ގިނަ އައު ވަޒީފާތައް އުފެދެމުން އަންނަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ތެރެއިންނޭ ބުންޏަސް މިއީ ދޮގަކަށް ނުވާނެއެވެ.

ރާއްޖޭގައި މިވަގުތު ހިންގާ އެންމެ ބޮޑު ތަރައްގީގެ މަޝްރޫއުތައް އެމްޓީސީސީން ހިންގަމުންދާއިރު، އެކުންފުނިން ގެންދަނީ ދޭތެރެދޭތެރެއިން ކުންފުނީގެ އެކި މަސައްކަތްތަކަށް މުވައްޒަފުން ނަގަމުންނެވެ. އަދި އެކި ދާއިރާތަކުން މީހުން ބިނާކުރުމުގެ ޕްރޮގްރާމްތައް ހިންގަމުންނެވެ. އެމީހުންނަށް ދޭންވާ ތަމްރީނުތައް ދިނުމަށްފަހު އެމީހުންނަށް ވަޒީފާވެސްދެއެވެ. ވަޒީފާގައި އިތުރަށް ކުރިއަށްދިއުމުގެ ފުރުސަތުތައް ހުޅުވާލައެވެ. އިތުރަށް ކިޔެވުމުގެ ފުރުސަތުދެއެވެ. އެތައް މަޝްރޫއެއް އަލަށް ފަށައިގެން ކުރިއަށްގެންދާއިރު، މިއިން ކޮންމެ މަޝްރޫއެއްގެ މަސައްކަތަށް އަނެއްކާވެސް އިތުރު މުވައްޒަފުން ނަގައެވެ.

މީގެ އިތުރުން ސަރުކާރުގެ ދަތުރުފަތުރުގެ ސިޔާސަތު ތަންފީޒުކުރުމުގެ މަސައްކަތް އެމްޓީސީސީއާ ހަވާލުކޮށްގެން ކުރިއަށްގެންދާއިރު، ރާއްޖެ ޓްރާންސްޕޯޓް ލިންކް (އާރްޓީއެލް) ތައާރަފުވުމާއެކު އަނެއްކާވެސް އިތުރު ވަޒީފާތަކެއް އުފެދިގެން ހިނގައްޖެއެވެ. އާރްޓީއެލްގެ ބަހުގެ ޚިދުމަތާއި ފެރީގެ ޚިދުމަތް ތައާރަފުކޮށްފައިވާއިރު، މި މަސައްކަތްތައް ފަށައިގަތުމަށްވެސް އެމްޓީސީސީން ވަނީ މީހުން ބިނާކޮށްފައެވެ. ތަމްރީނުކޮށްފައެވެ. އިތުރު ބަސް ޑްރައިވަރުންނާއި، ފަޅުވެރިންނާއި، ކައްޕިން ތަމްރީނުކުރުމުގެ މަސައްކަތް އެމްޓީސީސީން ކޮށްފައިވެއެވެ.

އާރްޓީއެލް ފެރީގެ ޚިދުމަތުގެ ފުރަތަމަ ފިޔަވަހީގެ ތެރެއިން ހއ އަތޮޅާއި ހދ އަތޮޅަށް މި ޚިދުމަތް ވަނީ ތައާރަފުކޮށްފައެވެ. އަދި ށ އަތޮޅަށް އާރްޓީއެލް ތައާރަފުކުރުމުގެ މަސައްކަތް އެމްޓީސީސީން ދަނީ ކުރަމުންނެވެ. އެމްޓީސީސީން ބުނެފައިވާގޮތުގައި މި ޚިދުމަތުގެ ފޭސް 1ގައި ޖުމްލަ 83 ވަޒީފާ އިތުރަށް ހުޅުވިގެންދާނެއެވެ. ލޯންޗު ދުއްވާ ކައްޕިން ފެށިގެން ފަޅުވެރިންނާއި އަދިވެސް އެނޫން މަސައްކަތްތަކަށް މުވައްޒަފުން ނަގާއިރު، މި ހުރިހާ ވަޒީފާއަކަށްވެސް ދިވެހިން ނެގުމަށް އެމްޓީސީސީން ޚާއްސަ އިސްކަމެއްދެއެވެ.

އާރްޓީއެލް ފެރީގެ ޚިދުމަތް 6 ޒޯނަކަށް ބަހާލައިގެން ތައާރަފުކުރުމުގެ މަސައްކަތް އެމްޓީސީސީން ކުރަމުންދާއިރު، މިއިން ކޮންމެ ފިޔަވައްސެއްގެ ތެރެއިންވެސް އިތުރު ވަޒީފާތަކެއް އުފެދިގެންދާނެއެވެ. ފޭސް 2 އަދި ފޭސް 3ގެ ޚިދުމަތް ފެށުމާއެކު އަނެއްކާވެސް 356 ވަޒީފާ އުފެދިގެންދާނެކަމަށް އެމްޓީސީސީން ބުނެފައިވެއެވެ.

މީގެ އިތުރުން އާރުޓީއެލް ބަހުގެ ޚިދުމަތް މާލެ ސަރަހައްދަށް މިހާރު ތައާރަފުކޮށްފައިވާއިރު، އެމްޓީސީސީން މަސައްކަތްކުރަމުންދަނީ އަތޮޅުތެރެއަށް މި މަސައްކަތް ތައާރަފުކުރުމަށެވެ. އަދި މާލެއަށް މިނީ ބަހުގެ ޚިދުމަތް ތައާރަފުކުރުމަށް މަސައްކަތްކުރަމުންދާއިރު، އެމްޓީސީސީން ގެންދަނީ ބަސް ޑްރައިވަރުން ތަމްރީނުކުރުމުގެ މަސައްކަތް ހުއްޓުމެއްނެތި ކުރަމުންނެވެ. މި ޚިދުމަތުގެ ތެރެއިންވެސް އެތައް ބައިވަރު ވަޒީފާތަކެއް އުފެދިގެންދާނެއެވެ.

އެ ދާއިރާތަކުން ތައުލީމު ހާސިލްކޮށްފައި ނެތަސް މިއަދު މިވަނީ އެ ދާއިރާތަކުން ތަމްރީނު ހޯދުމުގެ ފުރުސަތުވެސް ހުޅުވާލެވިފައެވެ. އެންމެންނަކީ އޮފީހެއްގެ ތެރޭގައި އިށީނދެތިބެގެން މަސައްކަތްކުރަންޖެހޭ ބައެއްވެސް ނޫނެވެ. އަދި ބުރަ މަސައްކަތުން، ދާ އޮހޮރުވައިގެން ކުރާ މަސައްކަތްތަކަކީ ހަޑި މަސައްކަތްތަކެއްވެސް ނޫނެވެ.