އެއްވެސް ތާކުން ލިބެން ނެތް، ބަޒްގެ ޖައްވީ ޖެކެޓް ނީލަމަށް!

އެމެރިކާގެ މަޝްހޫރު ޖައްވީ ފަޅުވެރިޔާ، ބަޒް އެލްޑަރީންގެ ދިރިއުޅުމާ ގުޅިފައިވާ ބައެއް ސަމާނު ނީލަންކިއުމަށް އެންމެ ފަހުގެ ތައްޔާރީތައްވެއްޖެއެވެ.

ނީލަން ކިއުމުގައި ގިނަ ބައެއްގެ އިތުބާރު ހޯދާފައިވާ ސޯތީބީޒްއިން ނިއުޔޯކްގައި ކުރިއަށް ގެންދާ ނީލަމުގައި، 1960 ވަނަ އަހަރުގެ އެޕޯލޯ 11ގެ މިޝަންގައި ބަޒް އެލްޑަރީން ބޭނުންކުރި ޖެކެޓެއްވެސް ނީލަންކިއުމަށް ވަނީ ހަމަޖެހިފައެވެ.

ބަޒް އެލްޑަރީންގެ ޖެކެޓް، 1 މިލިއަން ޑޮލަރާ 2 މިލިއަން ޑޮލަރާ ދެމެދު އަގެއްގައި ނީލަންކިއޭނެކަމަށް ވަނީ ލަފާކޮށްފައެވެ.

ސޯތީބީޒްއިން ކުރިއަށް ގެންދާ ނީލަމުގައި، ބަޒް އެލްޑަރީންގެ ބައެއް އެވޯޑްތަކުގެ އިތުރުން އޭނާގެ ހަޔާތާ ގުޅިފައިވާ ބައެއް ސިޓީތައްވެސް ވިއްކާލާނެކަމަށް މައުލޫމާތުލިބެއެވެ.

"ބަޒް އެލްޑަރީން: އެމެރިކަން އައިކަން"ގެ ނަމުގައި މި ޚާއްސަ ނީލަން ކުރިއަށްގެންދިއުމަށް ތާވަލުކޮށްފައިވަނީ ޖުލައި 26، 2022 ވާ އަންގާރަ ދުވަހަށެވެ.

އެޕޯލޯ 11ގެ މިޝަންއަކީ، ފުރަތަމަފަހަރަށް އިންސާނުން ހަނދުގައި ހިނގާލި މިޝަންގެ ގޮތުގައި ސިފަކުރަމުން އަންނަ މިޝަންއެވެ. އެޕޯލޯ 11 މިޝަންގައި އިންސާނަކު އެންމެ ފުރަތަމަ ހަނދަށް ދިޔައީ 1969 ވަނަ އަހަރުގެ ޖުލައި މަހުގެ 20 ވަނަ ދުވަހުއެވެ.

އިންސާނަކު ފުރަތަމަ ފަހަރަށް ހަނދުގައި ފައިޖެއްސިތާ 50 އަހަރު ފުރުން ދުނިޔޭގެ އެކި ހިސާބުތަކުގައި ފާހަގަކުރީ 2019 ވަނަ އަހަރުއެވެ. އެޕޯލޯ 11ގެ އީގަލް މޮޑިއުލް ހަނދުގެ ސަތަހާގައި ޖައްސައި، އޭގައި ތިބި 2 މީހުން ހަނދަށް ފޭބީ 1969 ވަނަ އަހަރުގެ ޖުލައި މަހުގެ 20 ވަނަ ދުވަހުގެ ރޭގަނޑުގެ ވަގުތެއްގައެވެ. ހަނދުގައި ފުރަތަމަ ފައިޖެއްސި އެސްޓްރޮނޯޓަކީ ނީލް އާމްސްޓްރޯންގްއެވެ.

ހަނދުގެ ސަތަހައިން ލިބިފައިވާ ބައެއް ކަހަލަ ސާމާނުތައް ނީލަން ކިއުމަށް، "މީޓިއޮރައިޓްސް: ސިލެކްޓް ސްޕެސިމަންސް ފްރޮމް ދަ މޫން، މާރސް، ވެސްޓަރ އެންޑް މޯ" ގެ ނަމުގައި އިތުރު ނީލަމެއް، ޖުލައި 27 ވަނަ ދުވަހަށްވެސް ވަނީ ތާވަލުކޮށްފައެވެ.

ޖުލައި 27 ވަނަ ދުވަހު ކުރިއަށްގެންދާ ނީލަމުގައި ވިއްކާލާ ހަނދުގެ ހިލަ ކޮޅަކީ، ދުނިޔޭގެ ސަތަހާގައި އޮތް ހަނދުގެ ދެވަނައަށް އެންމެ ބޮޑު ހިލަކޮޅުކަމަށް ސޯތީބީޒްއިން ބުނެއެވެ. އެ ހިލަކޮޅަކީ، ހަނދުގައި ގިނިހިލައެއް ޖެހިގެން އުފެދުނު ހިލަކޮޅެއްކަމަށް މައުލޫމާތުލިބެއެވެ.

އިންސާނުން ގޮވައިގެން ހަނދަށް ކުރި ފުރަތަމަ ދަތުރުގެ ކްރޫގައި ހިމެނުނު 3 މެމްބަރުންނަކީވެސް 1930ގެ އަހަރުތަކުގެ ތެރޭގައި އުފަންވެފައިވާ މީހުންނެވެ. އެ ތިން މީހުންގެ ތެރެއިން މިހާރު ދުނިޔޭގައިހުރި ހަމައެކަނި މީހަކީވެސް ބަޒްއެވެ.