އޭޝިއާގެ "ބެސްޓް އައިލެންޑް" ރާއްޖެއަށް

ވޯލްޑްސް ބެސްޓް އެވޯޑްސްގެ "ބެސްޓް އައިލެންޑް އިން އޭޝިއާ" އެވޯޑު ދިވެހިރާއްޖެ ކާމިޔާބުކޮށްފިއެވެ.

ރާއްޖެއަށް މި އެވޯޑު ލިބިފައިވަނީ މި މަހުގެ 20 ވަނަ ދުވަހު ނިއުޔޯކުގައި ބޭއްވި ޓްރެވަލް އެންޑް ލެޝަރ 2022 "ވޯލްޑްސް ބެސްޓް އެވޯޑް"ގައެވެ. ރާއްޖޭގެ ފަރާތުން މި އެވޯޑާ ހަވާލުވެވަޑައިގަތީ އެމެރިކާއަށް ރާއްޖޭން ކަނޑައަޅާފައި ހުންނަވާ ސަފީރު، އަދި އެކުވެރި ދައުލަތްތަކުގެ ޖަމްއިއްޔާއަށް ދިވެހިރާއްޖެއިން ކަނޑައަޅާފައި ހުންނަވާ ދާއިމީ މަންދޫބު ތިލްމީޒާ ހުސައިނެވެ. 

ޓްރެވަލް އެންޑް ލެޝަރ ގްލޯބަލް ވިޝަން އެވޯޑްސްއަކީ، ދެމެހެއްޓެނިވި އަދި ޒިންމާދާރު ފަތުރުވެރިކަމުގެ ޕްރޮޑަކްޓްތަކާއި ޕްރެކްޓިސްތަކާއި ތަޖުރިބާތައް ފޯރުކޮށްދޭ ކުންފުނިތަކާއި، ފަރާތްތަކާއި، މަންޒިލްތަކާއި ޖަމްއިއްޔާތައް ފާހަގަކޮށް އަގުވަޒަންކުރުމުގެ ގޮތުން ދޭ އެވޯޑެކެވެ.

މި އެވޯޑާ ގުޅޭގޮތުން މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ސީއީއޯ އަދި މެނޭޖިންގ ޑިރެކްޓަރ ތޮއްޔިބު މުހައްމަދު ވިދާޅުވީ، ބައިނަލްއަގުވާމީ މައިދާނުގައި މިފަދަ އެވޯޑުތައް ލިބުމަކީ މުޅި ގައުމަށް ލިބޭ ފަޚުރެއްކަމަށެވެ. އަދި ރާއްޖެ ޕްރޮމޯޓްކޮށް، ވީހާވެސް ގިނަ ފަތުރުވެރިން ގެނައުމަށް ކުރާ މަސައްކަތަކީ އެންމެން ގުޅިގެން އަބަދުމެ ދަމަހައްޓަންޖެހޭ މަސައްކަތެއް ކަމަށާއި، ގޮންޖެހުންތައް ގިނަނަމަވެސް، މަންޒިލެއްގެ ގޮތުގައި އަބަދުވެސް ވާދަވެރިންނަށްވުރެ ކުރީގައި ތިބެންޖެހޭކަމަށް އޭނާ ވިދާޅުވިއެވެ.

މިއަހަރުގެ މިހާތަނަށް ރާއްޖެއިން ވަނީ ބައިނަލްއަގުވާމީގޮތުން ފާހަގަކޮށްލެވޭ 4 އެވޯޑެއް ހާސިލްކޮށްފައެވެ. އޭގެ ތެރޭގައި ގްލޯބަލް މައިސް ކޮންގްރެސް އެންޑް އެވޯޑްސް 2022ގެ "މޯސްޓް ޕްރިފެއަރޑް ޓޫރިސްޓް ޑެސްޓިނޭޝަން 2021"އާއި، އެމްއެމްޕީއާރުސީގެ "ރީޑިފައިނިންގ މައިސް" ކެމްޕޭނަށް އަހަރުގެ އެންމެ މޮޅު މާކެޓިންގ އިނިޝިއޭޓިވްގެ މަގާމު ވަަނީ ލިބިފައެވެ. މީގެ އިތުރުން އޯޓީއެމް، މުމްބާއީ ހަރަކާތުގެ ބެސްޓް ސްޓޭންޑް ޑިޒައިން އެންޑް ޑެކަރޭޝަން އެވޯޑާއި، ޑަބްލިއުޓީއެމް އެފްރިކާ 2022ގެ ބެސްޓް ސްޓޭންޑް ފީޗަރވެސް ރާއްޖެއަށް ވަނީ ލިބިފައެވެ.

މި އަހަރުގެ ތެރޭގައި ވަކިވަކި ރިޒޯޓާއި ފަތުރުވެރިކަމުގެ ޕްރޮޕަޓީތަކަށްވެސް ވަނީ އެކި އެވޯޑުތައް ލިބިފައެވެ.