މިއީ ޓީޖީއެސްޓީ ބޮޑުކުރަންވީ ވަގުތެއް ނޫން، އެހެން ގޮތްތައް ހޯދަންޖެހޭ – ވަލީދު
ޓީޖީއެސްޓީ ބޮޑުކުރުމާއި ގުޅިގެން މުޅި އިންޑަސްޓްރީގެ ކަންބޮޑުވުން އެބަހުރި
މަޓާޓޯގެ ނައިބް ރައީސް މުހައްމަދު ޝާޒް ވަލީދު
އިގްތިސާދީ މިފަދަ ހާލަތެއްގައި ފަތުރުވެރިކަމުގެ ހިދުމަތުން ނަގާ ޓެކްސް ބޮޑުކުރުމުގެ ބަދަލުގައި މިއީ، އެހެން ގޮތްތަކެއް ހޯދަންޖެހޭ ވަގުތެއް ކަމަށް މޯލްޑިވްސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއަރ އޮޕަރޭޓާރސް (މަޓާޓޯ) ގެ ނައިބް ރައީސް މުހައްމަދު ޝާޒް ވަލީދު ވިދާޅުވެއްޖެއެވެ.
ސަރުކާރުން ވަނީ ދާދި ފަހުން އާމްދަނީގެ ފިޔަވަޅުތަކުގެ ތެރޭގައި ޓީޖީއެސްޓީ ރޭޓު 16 އިންސައްތައަށް ބޮޑުކުރުމަށް ނިންމާފައެވެ. އަދި އަންނަ އަހަރުގެ ޖެނުއަރީ 1 ވަނަ ދުވަހުން ފެށިގެން ޓީޖީއެސްޓީ ބޮޑުކުރަން ނިންމާފައިވާތީ، އެކަމާއި ގުޅިގެން ފަތުރުވެރިކަމުގެ ހިދުމަތް ދެމުން އަންނަ ފަރާތްތަކުގެ ބޮޑު ކަންބޮޑުވުމެއް އެބަހުއްޓެވެ.
މިކަމާއި ގުޅިގެން ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން ވަލީދު ވިދާޅުވީ ޓީޖީއެސްޓީ ބޮޑުކުރުމާއި ގުޅޭ ގޮތުން މަޓާޓޯއިން ވަރަށް ބޮޑު ކަންބޮޑުވުންތައް އެބަހުރި ކަމަށެވެ. މިއީ މުޅި އިންޑަސްޓްރީގެ ވެސް ކަންބޮޑުވުމެއް ކަމަށާއި، އެންމެންގެ ތެރޭގައި ވެސް އުފެދޭ ސުވާލަކީ މިއީ އެންމެ ނާޒުކު ދަނޑިވަޅުތޯ ޓެކްސް ބޮޑުކުރަން ކަމަށް އޭނާ ވިދާޅުވިއެވެ. ވަލީދު ވިދާޅުވީ މަޓާޓޯއަކީ ރާއްޖޭގެ ޓްރެވަލް އިންޑަސްޓްރީގެ އެންމެ ބޮޑު އެއް ޖަމިއްޔާ ކަމަށާއި، ޖަމިއްޔާގެ ވަރަށް ބޮޑު ކަންބޮޑުވުންތައް އެބަހުރި ކަމަށެވެ.
ވަލީދު ވިދާޅުވީ ޓެކްސް ބޮޑުކުރަން މިއުޅެނީ ކޮން ބޭނުމެއްގައިތޯ އޭގެން ކޮންކަމަކާތޯ ޓެކްސްގެ އިންސައްތަ ބޮޑުކުރަން މިއުޅެނީ ސުވާލު އުފެދޭ ކަމަށެވެ. އަދި އެކަން ކުރަނީ ފަތުރުވެރިކަން ކުރިއަރުވަންތޯ ނުވަތަ ހުރި މިންވަރުގައި ހިފަހައްޓަންތޯ ނުވަތަ އިތުރު ފަތުރުވެރިން ރާއްޖެ ގެންނަންތޯ ވެސް ސުވާލު އުފެދޭ ކަމަށެވެ. ނަމަވެސް އެ ސުވާލަކަށް ޖަވާބެއް ނުލިބޭ ކަމަށާއި، ސަރުކާރުން ވެސް އެކަމަށް މާބޮޑު ޖަވާބެއް ދީފައި ނުވާ ކަމަށެވެ.
މީގެ ކުރިން ފިނޭންސް މިނިސްޓަރު އިބްރާހިމް އަމީރު ވިދާޅުވެފައިވަނީ ކުރީއްސުރެ އައިއެމްއެފް، ވޯރލްޑް ބޭންކުފަދަ ތަންތަނުގެ ރިޕޯޓްތަކުގައި ވެސް ފާހަގަކޮށްފައިވާ ގޮތަށް، ރާއްޖޭގެ ޖީއެސްޓީ އަދި ޓީޖީއެސްޓީގެ ރޭޓްތައްވެސް ދުނިޔޭގެ އެހެނިހެން ގައުމުތަކާއި، ސްމޯލް އައިލެންޑް ޑިވަލަޕިންގް ސްޓޭޓްތަކާއި، ޓުއަރިޒަމް ގައުމުތަކާ ބަލާއިރު ހުރީ ދަށްކޮށް ކަމަށެވެ.
އެހެންކަމުން ޓެކްސް ބޮޑުކުރުމުގެ ޖާގަ އެބައޮތްކަމަށާއި، އެކަންތައްތަކާއެކު ޒިންމާދާރު ސަރުކާރެއްގެ ގޮތުގައި އެ ނިންމުންތައް ނިންމަވަމުން ގެންދާނެ ކަމަށެވެ.
