ބަޔާން މޮޅުވިއިރު ފުރަތަމަ މެޗުގައި މާނޭ އާއި ޑި ލައިޓް ލަނޑު ޖަހައިފި

އައު ސީޒަނަށް ތައްޔާރުވުމުގެ ގޮތުން ބަޔާން މިއުނިކުން ކުޅުނު ފުރަތަމަ މެޗު ކާމިޔާބުކުރިއިރު، ސަޑިއޯ މާނޭ އާއި މަތައިސް ޑި ލިޓް ލަނޑު ޖަހައިފިއެވެ.

މިއީ މިފަހަރުގެ ޓްރާންސްފާ މާކެޓުގައި ބަޔާނަށް ބަދަލުވިފަހުން، މާނޭ އާއި ޑި ލިޓް އެ ޓީމަށް ކުޅުނު ފުރަތަމަ މެޗެވެ. ބަޔާނުން ވަނީ އެމެރިކާގެ ޑީސީ ޔުނައިޓެޑުގެ މައްޗަށް 6-2 ން ކުރި ހޯދާފައެވެ.

ފުރަތަމަ ހާފުގައި ބަޔާނުން ވަނީ ތިން ލަނޑު ޖަހާފައެވެ. އަނެއް ތިން ލަނޑު އެ ޓީމުން ޖެހީ ދެވަނަ ހާފުގައެވެ. މެޗު ފަށައިގެން ފުރަތަމަ ފަސް މިނެޓުގެ ތެރޭގައި ބަޔާނުން ލީޑު ނެގީ ލިބުނު ޕެނަލްޓީއަކުންނެވެ. އެ ޕެނަލްޓީ ކާމިޔާބުކޮށްދިނީ މާނޭއެވެ. އޭގެ ފަހުން މެޗުގެ 12 ވަނަ މިނެޓުގައި އެ ޓީމަށް ލީޑު ފުޅާކޮށްދިނީ މާސެލް ސަބިޓްޒާއެވެ. ފުރަތަމަ ހާފު ނިމުމުގެ އެއް މިނެޓު ކުރިން ސާޖް ގްނަބްރީ ވަނީ އެ ޓީމުގެ ތިން ވަނަ ލަނޑު ޖަހާފައެވެ.

ދެވަނަ ހާފު ފަށައިގެން ކުރީ ކޮޅު ބަޔާނުން ވަނީ އިތުރު ދެ ލަނޑު ޖަހާފައެެވެ. ފުރަތަމަ ލަނޑު 47 ވަނަ މިނެޓުގައި ޑި ލިޓް ޖެހިއިރު، ދެވަނަ ލަނޑު ޒާކްޒީ ޖެހީ 52 ވަނަ މިނެޓުގައެވެ. އޭގެ ފަހުން ޑީސީ ޔުނައިޓެޑުން ވަނީ ދެ ލަނޑު ޖަހާފައެވެ. އެއީ އެ ޓީމުގެ ލީލަންޑާއި، ޑީޕިއެޓްރޯ ޖަހައިދިން ލަނޑެވެ. ބަޔާންގެ ހަވަނަ ލަނޑު މެޗުގެ ފަހު ވަގުތު ޖަހައިދިނީ ތޯމަސް މުލާއެވެ.

އައު ސީޒަނަށް ތައްޔާރުވުމުގެ ގޮތުން ކުޅޭ ދެ ވަނަ މެޗުގައި ބަޔާނުން ނުކުންނާނީ މި މަހުގެ 24 ގައި ޕްރިމިއަރ ލީގުގެ ޗެމްޕިއަން މެންޗެސްޓަރ ސިޓީއާ ދެކޮޅަށެވެ.