އެމްޑީޕީ ކޮންގްރެސް: 400 އަށްވުރެ ގިނަ ގޮފި އުފައްދަން ހުށަހަޅައިފި
މިހާރު ހުރި ގޮފިތައް އިސްލާޙު ކުރުމަށް 15 ޖުލައި 2022 ވާ ބުދަ ދުވަހަށް ފުރުސަތު ހުޅުވާލި
މިހާރު ހުރި ގޮފިތައް އިސްލާޙު ކުރުމަށް 15 ޖުލައި 2022 ވާ ބުދަ ދުވަހަށް ފުރުސަތު ހުޅުވާލި
19 އޯގަސްޓް 2022 ގައި ބޭއްވުމަށް ހަމަޖެހިފައިވާ އެމްޑީޕީ ކޮންގްރެސް 2022 ގައި ބައިވެރިވުމަށް 400ށް ވުރެ ގިނަ ގޮފި އުފައްދަން ހުށަހަޅައިފިއެވެ.
އެމްޑީޕީ ކޮންގްރެސް 2022 ގައި ބައިވެރިވެވޭނީ، 15 ޖުލައި 2022 ގެ ނިޔަލަށް އުފައްދާފައިވާ ގޮފިތަކުގެ ރައީސުންނަށް ކަމަށް އެޕާޓީން ވަނީ ބުނެފައެވެ. ވުމާއެކު، ގޮފި އުފެއްދުމާއި މިހާރު ހުރި ގޮފިތައް އިސްލާޙު ކުރުމަށް 15 ޖުލައި 2022 ވާ ބުދަ ދުވަހަށް ފުރުސަތު ހުޅުވާލިއެވެ.
އެމްޑީޕީގެ ކޮންގްރެސް އޮގަސްޓް މަހު ބޭއްވުމަށް އެ ޕާޓީގެ ގައުމީ މަޖިލީހުން ނިންމާފައިވަނީ މިއަހަރުގެ ފެބްރުއަރީ މަހުގެ 10ގައި ބޭއްވި އެމްޑީޕީ ގައުމީ މަޖިލީހުގެ 4 ވަނަ ދައުރުގެ 2 ވަނަ ޖަލްސާގައެވެ.
ރާއްޖެއެމްވީއާ ވާހަކަ ދައްކަވަމުން ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވީ، ކޮންގްރެސްގައި ބައިވެރިވުމަށްޓަކައި 400ށް ވުރެ ގިނަ ގޮފި އުފެއްދުމަށް ހުށައަޅާފައިވާ ކަމަށެވެ. މިހާރު އެ ފޯމުތައް ކަށަވަރު ކުރުމުގެ މަސައްކަތް ކުރަމުންދާއިރު، ހަފްތާއެއްހާ ދުވަސް ތެރޭގައި އެ މަސައްކަތް ނިންމާލެވޭނެކަމަށް އޭނާ ވިދާޅުވިއެވެ.
މި އަހަރު ބާއްވާ މޯލްޑިވިއަން ޑިމޮކްރަޓިކް ޕާޓީގެ ކޮންގްރެސްގައި ބައިވެރިވެވޭނީ އިލެކްޝަންސް ކޮމިޝަނުން ބަލަހައްޓަވަމުން ގެންދާ އެޕާޓީގެ ދަފްތަރުގައި ރެޖިސްޓްރީ ވެފައިވާ މެމްބަރުން ހިމަނައިގެން އުފައްދާފައިވާ ގޮފިތަކުގެ ރައީސުންނަށް ކަމަށް އެ ޕާޓީން ވަނީ ބުނެފައެވެ. މިދެންނެވި ރައީސުން ވާންވާނީ ގޮފި ޤަވައިދުގެ 3.3 ވަނަ މާއްދާ ބުނާގޮތަށް އިންތިޚާބުވިތާ 5 އަހަރު ފުރިފައިނުވާ ގޮފި ރައީސުންނަށް ކަމަށްވެސް އެޕާޓީން ބުނެފައިވެއެވެ.
29 މެއި 2022 ގައި ބޭއްވި އެޕާޓީގެ ޤައުމީ މަޖިލިހުގެ މިދައުރުގެ 4 ވަނަ ޖަލްސާގައި ފާސްކޮށްފައިވާ ގޮތުން އެމްޑީޕީގެ މެންބަރުންގެ ގޮތުގައި ބަލަމުންދާ ޕާޓީގެ ދަފުތަރުގައި އެހެނިހެން ސިޔާސީ ޕާޓީތަކުގެ މެންބަރުން ހިމެނިފައިވުމުގެ ސަބަބުން އެ ޕާޓީގެ އިންތިހާބުތަކާއި ޕްރައިމަރީތަކުގައި އެ ޕާޓީއާއި ވާދަކުރާ ޕާޓީތަކުގެ މެންބަރުންނަށް ފަހިވާގޮތަށް ކެންޑީޑޭޓުން ހޮވުމުގެ ފުރުސަތު އޮތުމާއި، އެ ޕާޓީއަށް މާލީ އެއްވެސް މަންފާއެއް ނުކުރާގޮތަށް ހަމައެކަނި އިންތިހާބުތަކުގައި އެތައް ހާސް ބަޔަކު އެބަތިއްބެވެ.
އަދި އެމްޑީޕީގެ އަސާސީ ގަވާއިދުގެ 19 ވަނަ މާއްދާގެ (ހ) ގައި ޕާޓީގެ މެންބަރުކަން ބާތިލްވަނީ ޕާޓީގެ މެންބަރު އެމްޑީޕީ ފިޔަވައި އެހެން ސިޔާސީ ޕާޓީއެއްގައި ބައިވެރިވުމުން އަދި އެހެން ސިޔާސީ ޕާޓީއެއްގައި ހަރަކާތެރިވުމުންނެވެ. އަދި ސިޔާސީ ޕާޓީގެ މެންބަރަކަށް ނުހުރެވޭނެކަމަށް އޮންނާތީވެ މިވަގުތު އެމްޑީޕީއިން ބަލަހައްޓަމުން ގެންދާ ދަފްތަރުގައި ހިމެނޭ އިލެކްޝަންސް ކޮމިޝަންގެ އެމްޑީޕީގެ ދަފްތަރުގައި ހިމެނޭ 54،599 މެންބަރުންނަކީ އެމްޑީޕީގެ ރަސްމީ ދަފްތަރުކަމަށް ބަލައި، ދެންތިބި 39،911 މީހުންނަށް އެމްޑީޕީގެ މެންބަރުކަން ސައްހަކުރުމަށް ތިންމަސް ދިނުމަށާއި، މީގެ ތެރެއިން އިލެކްޝަންސް ކޮމިޝަންގައި އެހެންޕާޓީއެއްގެ ރަޖިސްޓްރީގައިވާ މީހުން އެމްޑީޕީން ވަކިކުރުމަށް ވަނީ ގަރާރުގައި ބުނެފައެވެ.
މީގެއިތުރުން އެމްޑީޕީގެ އަސާސީ ގަވާއިދުގެ 15 ވަނަ މާއްދާގެ (ށ) ގައިވާ ގޮތުގެ މަތިން މެންބަރުކަން ގަބޫލުކޮށް 18 ވަނަ މާއްދާގައި ބުނާ ހައްގުތައް ލިބޭނީ އިލެކްޝަންސް ކޮމިޝަންގައި އޮންނަ އެމްޑީޕީ ދަފްތަރުގައި ރަޖިސްޓްރީ ކުރުމުން ކަމަށް މި ގަރާރުގައި ބުނެފައިވެއެވެ.
