ބާސެލޯނާއިން ކުޅުންތެރިން ހޯދާ ގޮތުން ނާގަލްސްމަން ހުރީ ހައިރާންވެފައި

ސްޕެއިންގެ ބާސެލޯނާއިން ކުޅުންތެރިން ހޯދާ ގޮތާ މެދު ހައިރާންވާ ކަމަށް ބަޔާން މިއުނިކްގެ ކޯޗު ހޫލިއަން ނާގަލްސްމަން ބުނެފިއެވެ.

އޭނާ މި ގޮތަށް ބުނީ، ބަޔާންއަށް ކުޅެމުން އައި ޕޮލޭންޑުގެ އިތުބާރު ފޯވާޑް ރޮބާޓް ލެވަންޑޯސްކީ ބާސާއިން ހޯދުމުން އެކަމާ ގުޅޭ ގޮތުން ކުރި ސުވާލަކަށް ޖަވާބު ދެމުންނެވެ.

ނާގަލްސްމަން ބުނީ މުޅި ދުނިޔެއިން ވެސް އަތުގައި ފައިސާ ނެތް ނަމަވެސް، ބޭނުންވާ ކުޅުންތެރިޔަކު ގެންދާ ހަމައެކަނި ކުލަބަކީ ބާސެލޯނާކަމަށެވެ. އަދި ބާސާއިން އެކަން ކުރާ ގޮތެއް އޭނާ އަށް ނޭންގޭކަން ފާހަގަކުރަމުން ނާގަލްސްމަން ބުނީ، އެކަމާ ހައިރާންވާ ކަމަށެވެ.

ކުރިއަށް އޮތް ސީޒަނަށް ޓީމު ވަރުގަދަ ކުރުމަށް ބާސެލޯނާއިން ވަނީ ގިނަ ކުޅުންތެރިންތަކެއް ހޯދާފައެވެ. އެގޮތުން ލީޑްސް ޔުނައިޓެޑަށް ކުޅެމުން އައި ރަފީނިއާ އެ ކުލަބުން ހޯދީ 67 މިލިއަން ޔޫރޯ ދެއްކުމަށްފަހުއެވެ. އެއަށްފަހު ބާސެލޯނާއިން ލެވަންޑޯސްކީ ހޯދީ ބަޔާނަށް 50 މިލިއަން ޔޫރޯ ދެއްކުމަށްފަހުއެވެ.

މިހާ ބޮޑެތި ޚަރަދުތަކެއް ޓްރާންސްފާ މާކެޓުގައި ބާސެލޯނާއިން ކުރުމުން ނާގަލްސްމަން ބުނީ، އެ ޓީމުގެ މާލީ ހާލަތު ގޯސްކޮށް އޮއްވާ، އެހާ ބޮޑު ޚަރަދެއް ކޮށްގެން ކުޅުންތެރިން ގެންނަން ގަވާއިދުގެ ތެރެއިން ހުއްދަ އޮތްތޯ ބަލަން ވިސްނަން ޖެހޭ ކަމަށެވެ.

ބާސާއިން ވަނީ ހިލޭ ޓްރާންސްފާއެއްގައި  ޗެލްސީއަށް ކުޅެމުން އައި ޑެންމާކުގެ ޑިފެންޑަރު އަންދްރެސް ކްރިސްޓެންސަން އާއި އޭސީ މިލާނަށް ކުޅެމުން އަައި އައިވަރީ ކޯސްޓުގެ މިޑްފީލްޑަރު ފްރޭންކް ކެސިއޭ ވެސް ހޯދާފައެވެ.

ބާސެލޯނާއިން އެންމެ އިސްކަމެއް ދިން ލެވަންޑޯސްކީ ހޯދުމަށްފަހު އެ ކުލަބުގެ ރައީސް ޖޯން ލަޕޯޓާ ބުނީ އެހާ ހިސާބުން ނިންމާލީ ނޫން ކަމަށެވެ. ކުރިއަށް ދެން އޮންނާނީ ޑިފެންސް އަށް ރަނގަޅު ކުޅުންތެރިން ހޯދުން ކަމަށް އޭނާ ވަނީ ބުނެފައެވެ.