ފަސޭހައިން ގައިންގަޔަށް އަރާ ނުރައްކާތެރި މާރބަރގް ބަލި ގާނާއިން ފެނިއްޖެ
މާރބަރގް ވައިރަހަކީ ކޮންޓްރޯލް ނުކުރެވިއްޖެނަމަ ގިނަބަޔަކު މަރުވެގެން ހިނގައިދާނެ ބައްޔެއް
ޓެޑްރޮސް އަދަނޮމް - ޑަބްލިއެޗްއޯގެ ޗީފް
ފަސޭހައިން ގައިން ގަޔަށް އަރާ ނުރައްކާތެރި ބައްޔެއްކަމަށްވާ މާރބަރގް ވައިރަސް އެގައުމުން ފެނިއްޖެކަން ގާނާއިން އިއުލާންކޮށްފިއެވެ. ގާނާގެ ސިއްހީ އިދާރާތަކުން ވަނީ އެބޯލާ ބައްޔާ އެއްގޮތް އަލާމާތްތަކެއް ހުންނަ މާރބަރގް ވައިރަސް ދެމީހެއްގެ ގައިން ފެނިފައިވާކަމަށާއި، އެ ދެމީހުންވެސް މިހާރު ބަލީގައި މަރުވެފައިވާކަން ޔަގީންކޮށްދީފައެވެ. އެ ދެމީހުންގެ ޓެސްޓްތައް ބައްޔަށް ޕޮޒިޓިވްވެފައިވީނަމަވެސް ސެނެގޯލްގެ ލެބޯޓަރީއަކުންވެސް ނަތީޖާ ވެރިފައިކުރަންޖެހޭތީ މިކަން އިއުލާންކުރުން ލަސްވީކަމަށް ޑަބްލިއުއެޗްއޯއިން ބުނެފައިވެއެވެ.
މާރބަރގް ބަލި ޖެހުމުން ފެންނަ މައިގަޑު އަލާމާތްތަކަކީ; ގަދަޔަށް ހުންއައުން، ބޮލުގައި ރިއްސުން، ބޭރަށް ހިންގުން އަދި މޭނުބައިކޮށްފައި ހޮޑުލެވުމެވެ. ގާނާއަކީ ހުޅަނގު އެފްރިކާއިން މިފަހުން މިބަލި ފެނުނު ދެވަނަ ގައުމެވެ. މީގެ ކުރިން މިދިޔައަހަރު ގިނީންވެސް ވަނީ މާރބަރގް ބަލި ފެނިފައެވެ. އެފަހަރު ގިނީން އިތުރު ބަޔަކަށް ބަލި ނުޖެހޭކަމަށް ޑަބްލިއުއެޗްއޯއިން ބުނެއެވެ.
ޑަބްލިއުއެޗްއޯއިން ބުނެފައިވާގޮތުގައި ގާނާގައިވެސް ބަލި ފެތުރުނަނުދިނުމަށް އެޅެން ހުރި ހުރިހާ ފިޔަވަޅެއް ދަނީ އަޅަމުންނެވެ.
މާރބަރގް ބައްޔަކީ 1967ން ފެށިގެން އެފްރިކާގެ ބައެއް ގައުމު ތަކުން ފެންނަމުން އަންނަ ނުރައްކާތެރި ބައްޔެކެވެ. މިއީ ވާލުގެ ފުށުން އައި ބައްޔަކަށް ވާއިރު، ފުރަތަމަ ބަލި ފެނިފައިވަނީ ހޮހަޅަފަދަ ތަންތަނުގައި ދިރިއުޅެމުން އައި މީހުންގެ ކިބައިންކަމަށްވެއެވެ. މި ބައްޔަށް ފަރުވާއެއް އަދި ވެކްސިނެއްވެސް ހޯދިފައިނުވާއިރު، ކުރިން ބަލި ފެތުރެންފެށި ބައެއް ފަހަރުތަކުގައި ބަލިޖެހުނު މީހުންގެ 88 އިންސައްތަ މީހުންވެސް މަރުވެފައި އެބަހުއްޓެވެ.
