ސިވިލް ސަރވިސް ކޮމިޝަންގެ ކައުންސިލް ޖެނެރަލަކަށް އުސްތާޛު އިބްރާހިމް ރަޝީދު
19 ޖުލައި 2022 | އަންގާރަ 08:35އޭނާ އެ މަޤާމަށް އައްޔަނު ކުރެއްވީ 17 ޖުލައި 2022 ގައި
ސިވިލް ސަރވިސް ކޮމިޝަންގެ ކައުންސިލް ޖެނެރަލަކަށް އިބްރާހިމް ރަޝީދު
ލީގަލް އެފެއާޒް އެންޑް ސިވިލް ސަރވިސް އެމްޕްލޯއީ ރިލޭޝަންސް ޑިވިޜަންގެ ކައުންސެލް ޖެނެރަލްގެ މަޤާމަށް ބޭފުޅަކު އައްޔަނު ކުރައްވައިފިއެވެ.
އެ މަޤާމަށް އައްޔަނު ކުރައްވާފައިވަނީ އުސްތާޛު އިބްރާހިމް ރަޝީދެވެ. ސިވިލް ސަރވިސް ކޮމިޝަނުން އޭނާ އެ މަޤާމަށް އައްޔަނު ކުރެއްވީ 17 ޖުލައި 2022 ގައެވެ.
އިބްރާހިމް ރަޝީދަކީ ޤައުމީ ޔުނިވަރސިޓީން ބެޗެލަރ އޮފް ޝަރިއާ އެންޑް ލޯ ޙާސިލު ކުރައްވާފައިވާ ފަރާތެކެވެ. އޭގެ ފަހުން ވިލާ ކޮލެޖުން މާސްޓަރސް އިން ޝަރިއާ އެންޑް މާސްޓަރސް އިން ޝަރިއާ އެންޑް ލޯ ޙާސިލު ކުރައްވާފައިވެއެވެ.
އޭނާ ވަނީ މޯލްޑިވްސް ކަސްޓަމްސް ސަރވިސްގައި 9 އަހަރު މަސައްކަތް ކުރައްވާފައެވެ. ކަސްޓަމްސްގައި ސުޕްރިންޓެންޑެންޓުގެ މަޤާމުގައި ޤާނޫނީ ވަކީލެއްގެ ގޮތުގައި މަސައްކަތް ކުރައްވާފައެވެ.
އޭގެ އިތުރުން، ދިވެހިރާއްޖޭގެ އިސްލާމިކް ޔުނިވަރސިޓީގައި ފުލްޓައިމް ލެކްޗަރަރ އެއްގެ ގޮތުގައިވެސް މަސައްކަތް ކުރައްވާފައިވެއެވެ.
ސިވިލް ސަރވިސް ކޮމިޝަންގެ ކައުންސިލް ޖެނެރަލްގެ މައިގަނޑު މަސްއޫލިއްޔަތަކީ ސިވިލް ސަރވިސް ކޮމިޝަނާއި ކޮމިޝަނުގެ އިދާރާއަށް ބޭނުންވާ ޤާނޫނީ ލަފާ ދިނުމާއި، ކޮމިޝަނުގެ މަސައްކަތާއި ގުޅުންހުރި ޤާނޫނުތަކާއި ގަވާއިދުތަކާއި އުސޫލުތައް ދިރާސާކޮށް ގެންނަންޖެހޭ އިސްލާޙްތައް ގެނައުމެވެ.
އޭގެ އިތުރުން، ކޮމިޝަނުން ދައުވާކުރާ އަދި ކޮމިޝަނަށް ދައުވާ ރައްދުވާ މައްސަލަތަކުގައި ޓްރައިބިއުނަލްތަކާއި ކޯޓުތަކުގައި ކޮމިޝަން ތަމްސީލު ކުރުމަށްޓަކައި އެ ކަމާ ގުޅޭގޮތުން ކުރަންޖެހޭ އެންމެހައި މަސައްކަތްތައް ކުރުންވެސް މަސްއޫލިއްޔަތުތަކުގެ ތެރޭގައި ހިމެނެއެވެ.
ކޮމިޝަނުގެ މަސައްކަތްތަކާ ގުޅިގެން ރައްޔިތުންގެ މަޖިލީހަށް މައުލޫމާތުދޭންޖެހޭ ޙާލަތްތަކުގައި އެ މައުލޫމާތު ދިނުމާއި، މަޢުލޫމާތު ދިނުމަށްޓަކައި ރައްޔިތުންގެ މަޖިލީހަށް މަޢުލޫމާތުދޭން ހާޟިރުވާންޖެހޭ ބައްދަލުވުންތަކަށް ހާޟިރުވެ ޤާނޫނާއި ގަވާއިދާ ގުޅޭ ކަންކަމުގައި ޖަވާބުދާރީން ވާންޖެހޭ ހާލަތްތަކުގައި ޖަވާބުދާރީވުމާއި ބޭނުންވާ ލަފާ ދިނުމަކީވެސް ކައުންސިލް ޖެނެރަލްގެ ޒިންމާއެކެވެ.
