ބޮރޫޝިއާ ޑޯޓްމުންޑް ފަރިތަކުރުންތަކުގެ ތެރެއިން ޞިއްހީ މައްސަލައެއް ކުރިމަތިވި ސެބާސްޓިއަން ހޭލަރއަށް ޓެސްޓިކިއުލަރ ކެންސަރު ޖެހިފައި ހުރިކަން އެ ޓީމުން ޔަޤީންކޮށްދީފިއެވެ.

އަޔެކްސް ދޫކޮށް ސެބާސްޓިއަން ހޭލަރ ޑޯޓްމަންޑާ ގުޅުނީ މި ހިނގާ ޖުލައި މަހުގެ ތެރޭގައެވެ. 31 މިލިއަން ޕައުންޑަށް ޑޯޓްމުންޑާ ގުޅުނު ސެބާސްޓިއަން ހޭލަރއަށް ވަނީ ހޯމަ ދުވަހު ޑޯޓްމަންޑުން ކުރިއަށް ގެންދިޔަ ފަރިތަކުރުންތަކުގެ ތެރެއިން ޞިއްހީ މައްސަލައެއް ދިމާވެފައެވެ. އެއާއެކު އޭނާއަށް ފަރުވާދީ، ޓެސްޓުތައް ހެދުމަށްފަހު އެ ޓީމުން ވަނީ އެކަމާ ގުޅޭ ފަހުގެ މައުލޫމާތު ހިއްސާކުރުމަށް ސްޓޭޓްމަންޓެއް ނެރިފައެވެ.

އެ ސްޓޭޓްމަންޓުގައި ޑޯޓްމުންޑުން ބުނެފައިވަނީ އެ ޓީމުން ސްވިޒަލޭންޑުގެ ބޭޑް ރަގާޒްގައި ކުރިއަށް ގެންދިޔަ ފަރިތަކުރުންތަކުގެ ތެރޭގައި ދިމާވި ސިއްހީ މައްސަލައަކާ ހެދި އޭނާ ޓްރެއިނިން ކޭމްޕު ދޫކޮށްލަން ޖެހުނު ކަމަށެވެ. އެކަމުގެ ސަބަބުން އޭނާ މިހާރު ވަނީ ޑޯޓްމަންޑަށް ދަތުރުކޮށްފައި ކަމަށް ކުލަބުން ބުނެފައިވެއެވެ. ޑޯޓްމަންޑުން ބުނީ ދިމާވި މައްސަލައާ ގުޅިގެން އާނާގެ މެޑިކަލް ޓެސްޓުތަކެއް ހަދާފައިވާ ކަމަށާއި، ނަތީޖާއިން ފެންނަ ގޮތުގައި އޭނާއަށް ޓެސްޓިކިއުލަރ ކެންސަރު ޖެހިފައިވާކަމަށެވެ.

އެކަމާ ގުޅިގެން ޑޯޓްމުންޑުން ވަނީ ކުޅުންތެރިޔާއަށާއި އޭނާގެ އާއިލާއަށް ޕްރައިވަސީ ދޭން އެ ޓީމުން އެދޭ ކަމަށް ބުނެފައެވެ. މީގެ އިތުރުން މިކަމާ ގުޅޭ ގޮތުން ކުޅުންތެރިޔާއާއި އޭނާގެ އާއިލާއާ އެއްވެސް ސުވާލެއް ނުކުރުމަށް އެދޭ ކަމަށާއި، ފަހުގެ މައުލޫމާތު ލިބެމުންދާ ވަރަށް ޓީމުން އެކަން ހިއްސާކުރަމުންދާނެ ކަމަށް ބުނެފައިވެއެވެ.

މިކަމާ ގުޅިގެން ޑޯޓްމުންޑުގެ ސްޕޯޓިން ޑިރެކްޓަރު ބުނީ އެ ޚަބަރަކީ ޓީމުގެ އެންމެނަށް ޝޮކެއް ލިބިގެން ދިޔަ ޚަބަރެއް ކަމަށެވެ. މީގެ އިތުރުން ސެބާސްޓިއަން ހޭލަރގެ ފަރުވާގެ ކަންތައްތަކާއި، އެކަމުން އަރައިގަތުމަށް ޑޯޓްމަންޑުން އެންމެ ފުރިހަމައަށް އެއްބާރުލުން ދޭނެ ކަމަށް ވެސް އޭނާ ވަނީ ބުނެފައެވެ. ފަރުވާގެ ކަންކަމާ ގުޅޭ ގޮތުން އިތުރަށް އޭނާ ބުނީ ކުޅުންތެރިޔާއަށް ލިބޭ ފަރުވާއަކީ އެންމެ ރަނގަޅު ފަރުވާތޯ ވެސް ޑޯޓްމުންޑުން ޔަގީން ކުރާނެ ކަމަށެވެ.

ޑޯޓްމުންޑުން ސެބާސްޓިއަން ހޭލަރ ހޯދީ އެ ޓީމަށް ކުޅެމުން އައި އާލިން ހާލަންޑު ޓީމު ދޫކޮށްލުމުންނެވެ. ޑޯޓުމަންޑަށް ބަދަލުވުމުގެ ކުރިން ސެބާސްޓިއަން ހޭލަރ ކުޅުނީ އަޔެކްސްއަށެވެ. އޭނާ ވަނީ އަޔެކްސްއަށް ކުޅެދިން 66 މެޗުގައި 47 ލަނޑު ޖަހާފައެވެ.