ރެފްރީންގެ ނިންމުންތަކާއި މެދު ރޯމާގެ ކޯޗު ހިތްހަމަނުޖެހިފައި

ޔުއެފާ ޗެމްޕިއަންސް ލީގުގެ ސެމީ ފައިނަލުގެ ދެވަލަ ލެގުގައި ލިވަޕޫލާއި ދެކޮޅަށް ކުޅުނު މެޗުގައި ރެފްރީގެ ފަރާތުން ފެނުނު ބައެއް ނިންމުންތަކުގެ ސަބަބުން މެޗުގެ ނަތީޖާއަށް އަސަރުކުރި ކަމަށް އިޓަލީގެ ރޯމާގެ ކޯޗު ޔޫސޭބިއޯ ޑި ފްރެންޗެސްކޯ ބުނެފިއެވެ.

1984 ވަނަ އަހަރުގެ ފަހުން ފުރަތަމަ ފަހަރަށް ޗެމްޕިއަންސް ލީގުގެ ސެމީ ފައިނަލުން ފެނިގެންދިޔަ ރޯމާ މި ސީޒަނުގެ މުބާރާތުން ކެޓީ 7-6 ގެ އެގްރިގޭޓް ނަތީޖާއަކުން ލިވަޕޫލް އަތުން ބަލިވެގެންނެވެ. މި ދެ ޓީމު ލިވަޕޫލްގެ ދަނޑުގައި ކުޅުނު މެޗުން 5-2 އިން ރޯމާ ބަލިވި ނަމަވެސް އެ ޓީމުން ވަނީ އަމިއްލަ ދަނޑުގައި ރޭ ކުޅުނު މެޗު 4-2 އިން ކާމިޔާބުކޮށްފައެވެ. މި މެޗުގައި ފެނިގެންދިޔަ ބައެއް ނިންމުންތަކާއި ގުޅިގެން ރޯމާގެ ކުޅުންތެރިންނާއި އޮފިޝަލުން ވަނީ ހިތްހަމަނުޖެހުން ފާޅުކުރަމުންނެވެ.

ނޫސްވެރިންނާއި ވާހަކަ ދައްކަމުން ފްރެންޗެސްކޯ ބުނީ ޔުއެފާއާ ދެކޮޅަށް ބަސް ބުނުމަކީ އޭނާ ކުރަން ބޭނުންވާ ކަމެއް ނޫން ކަމަށާއި އެކަން ކުރާނީ ކްލަބްއިން ކަމަށެވެ. އޭނާ ބުނީ އޭނާއަށް އެއްޗެއް ބުނެވޭނީ ކުޅުންތެރިންނާއި ދިމާލަށް ކަމަށާއި ފަހުވަގުތު ވެސް ޝަކުވާ ކުރުމުގެ ބަދަލުގައި ކުޅުންތެރިން ޖެހޭނީ ހިތްވަރުކޮށް މަސައްކަތްކުރަން ކަމަށެވެ.

އޭނާ ބުނީ ރެފްރީންގެ ނިންމުންތަކާއި ގުޅިގެން ޒުވާބު ކުރަން ނުޖެހޭ ކަމަށާއި އެކަމާއި ގުޅިގެން މެޗުތެރޭ ރުޅިވެސް އައި ކަމަށެވެ. އެގޮތުން މެޗުގައި ބާކީ 20 މިނެޓު އޮއްވާ ލިބެންޖެހޭ ޕެނަލްޓީއެއް ވެސް ނުލިބޭ ކަމަށާއި ލިވަޕޫލްގެ ކުޅުންތެރިޔަކަށް ރަތް ކާޑު ވެސް ދައްކަން ޖެހޭ ކަމަށެވެ. އެގޮތަށް ކަންކަން ނިމިގެންދިޔަނަމަ ނަތީޖާ ބަދަލުވުމަކީ ވެސް އެކަށީގެންވާ ކަމެއް ކަމަށާއި އެހެން ނަމަވެސް އަމިއްލަ އަތުން ވެސް ހެދުނު ގޯސްތަކެއް ހުރި ކަމަށް ގަބޫލުކުރާ ކަމަށް ފްރެންޗެސްކޯ ބުނެފައިވެއެވެ.

އޭނާ ބުނީ މިއީ ލިބުނު ބޮޑު ތަޖުރިބާއެއް ކަމަށައި އެހެން ނަމަވެސް އަދިވެސް ހިތްހަމަނުޖެހޭ ކަންކަން އެބަހުރި ކަމަށެވެ. އެގޮތުން ލިވަޕޫލް ކޮޅަށް އިތުރު ލަނޑުތަކެއް ވެސް ޖެހުމަށް ފުރުސަތު ލިބުނު ކަމަށާއި ދެވަނަ ހާފުގައި ފެނިގެންދިޔައީ ވަރަށް ފުރިހަމަ ކުޅުމެއް ކަމަށެވެ. އެހެން ނަމަވެސް ކުޅުންތެރިން ދެއްކި ކުޅުމަށް ޝުކުރު އަދާކުރަން ބޭނުންވާ ކަމަށާއި އެ ކުޅުންތެރިންގެ ފަރާތުން ފެނުނީ އޭނާއަށް ފަހުރުވެރިވެވޭ ފެންވަރުގެ ކުޅުމެއް ކަމަށް ފްރެންޗެސްކޯ ބުނެފައިވެއެވެ.

އަންނަ ސީޒަނުގައި ވެސް ޗެމްޕިއަންސް ލީގުގައި ރޯމާ ފެންނަންޖެހޭ ކަމަށާއި އެކަމަށްޓަކައި ކުރަން ޖެހޭ ކަމަކީ ސެރީއޭގެ ހަތަރު ވަނަ މަގާމު ކަށަވަރުކުރުން ކަމަށް ފްރެންޗެސްކޯ ބުނެފައިވެއެވެ. މުބާރާތުގައި ވާދަކުރެވޭނެކަން އެންމެނަށް ވެސް ދެއްކިއްޖެ ކަމަށާއި މިއީ ވަރަށް ތާރިހީ ސީޒަނެއް ކަމަށް ފްރެންޗެސްކޯ ބުނެފައިވެއެވެ. މިހާ ހިސާބުން ހުއްޓާލަން ބޭނުންނުވާ ކަމަށާއި އަދިވެސް ބޭނުންވަނީ އިތުރަށް ކުރިޔަށްދާން ކަމަށް ނޫސްވެރިންގެ ބައްދަލުވުން ނިންމާލަމުން ފްރެންޗެސްކޯ ބުނެފައިވެއެވެ.

ރޯމާ މިވަގުތު އޮތީ ކުޅުނު 35 މެޗުން ލިބުނު 70 ޕޮއިންޓާއެކު އިޓާލިއަން ސެރީއޭގެ ތިންވަނައިގައެވެ.