ރަޝިއާއިން ގޫގުލް 373 މިލިއަން ޑޮލަރުން ޖޫރިމަނާކޮށްފި
18 ޖުލައި 2022 | ހޯމަ 17:40މިކަމާގުޅިގެން ގޫގުލްގެ ބަހެއް އަދި ލިބިފައިނުވާކަމަށް ރޮއިޓަރސްއިން ބުނޭ
ރަޝިއާއިން ގޫގުލް ޖޫރިމަނާކޮށްފައި ވަނީ އެގައުމުގައި ދެއްކުން މަނާ ކޮންޓެންޓް ތަކުރާރުކޮށް ދައްކާކަމަށް ބުނެ
ރަޝިއާއިން ގޫގުލް 373 މިލިއަން ޑޮލަރުން ޖޫރިމަނާކޮށްފިއެވެ.
ރޮއިޓަރސްގައި ރިޕޯޓުކޮށްފައިވާގޮތުން، އެގައުމުން މަނާކޮށްފައިވާ ކޮންޓެންޓެއް ގޫގުލްއިން ތަކުރާރުކޮށް ދެއްކުމުން، ހޯމަ ދުވަހު ރަޝިއާއިން ވަނީ އެކުންފުނި 21.1 ބިލިއަން ރުބެލް (373 މިލިއަން ޑޮލަރު)ން ޖޫރިމަނާކޮށްފައެވެ.
ރަޝިއާއިން އެގައުމުގައި މަނާކޮށްފައިވާ ކޮންޓެންޓުގެ ތެރޭގައި; ޔޫކްރެއިން-ރަޝިއާ ހަނގުރާމައާ ގުޅިގެން "ފޭކް ނިއުސް" ނުވަތަ ދޮގު މައުލޫމާތުތައް ހިމެނޭ ކޮންޓެންޓް ހިމެނެއެވެ.
ރަޝިއާއިން ވަނީ މީގެ ކުރިންވެސް އެގައުމުން މަނާކޮށްފައިވާ ކޮންޓެންޓް، ގޫގުލްފަދަ ބޭރުގެ ޕްލެޓްފޯމްތަކުގައި ދައްކަމުންދާކަމަށް ބުނެ ނުރުހުންފާޅުކޮށްފައެވެ. އަދި ޔޫކްރެއިން-ރަޝިއާ ހަނގުރާމައާއެކު އެގައުމުގެ މިފަދަ ޝަކުވާތައް ވަނީ އިތުރުވެފައެވެ.
ޔޫޓިއުބަށްވެސް ރަޝިއާ ސަރުކާރުގެ ނުރުހުން އަމާޒުވެގެންދާއިރު، ޓްވިޓަރާއި ފޭސްބުކް އަދި އިންސްޓަގްރާމާ އެއްގޮތަށް އެގައުމުން އަދި ޔޫޓިއުބް ބްލޮކެއް ނުކުރެއެވެ.
ގޫގުލް ޖޫރިމަނާކޮށްފައި ވަނީ ރަޝިއާގެ ޓަގަންސްކީ ޑިސްޓްރިކްޓް ކޯޓުންނެވެ. ކޯޓުން ބުނިގޮތުގައި ގޫގުލް ޖޫރިމަނާކޮށްފައި ވަނީ ތަކުރާރުކޮށް އެގައުމުގައި މަނާ ކޮންޓެންޓް ދައްކަމުން ގެންދިއުމުންނެވެ. ކޯޓުން ވަނީ ޔޫޓިއުބްގެ ނަން ވަކިން ފާހަަގަކޮށްފައިކަމަށްވެސް ރިޕޯޓުތައް ބުނެއެވެ.
އެގޮތުން ރަޝިއާއިން ޔޫކްރެއިންގައި ކުރިއަށްގެންދާ "ޚާއްސަ އަސްކަރީ އޮޕަރޭޝަނާ" ގުޅޭގޮތުން ދޮގު މައުލޫމާތު ހިމެނޭ ކޮންޓެންޓް ޔޫޓިއުބުން ޑިލީޓްކޮށްފައިނުވާކަން ވަނީ ފާހަގަކޮށްފައެވެ. މީގެ އިތުރުން ހައްދުފަހަނާއަޅާގައިވާ މީހުންގެ ވިސްނުން ޔޫޓިއުބުން ކުޑަކުދިންގެ މެދުގައި ޕްރޮމޯޓުކޮށް، ހުއްދަ ނެތް މުޒާހަރާތަކާއި އަޑުއުފުލުންތަކުގައި ބައިވެރިވުމަށް އެކުދިންނަށް ބާރުއަޅަމުންދާކަމަށްވެސް ވަނީ ބުނެފައެވެ.
މިކަމާގުޅިގެން ގޫގުލްގެ ބަހެއް އަދި ލިބިފައިނުވާކަމަށް ރޮއިޓަރސްއިން ބުނެއެވެ.
