މި ސަރުކާރުން ކުޅުދުއްފުށީގެ ސިއްޙީ ނިޒާމަށް ހެޔޮ ބަދަލުތަކެއް ގެނެސްފައިވޭ: މޭޔަރު
ކުރިން ތާރު އަޅާފައި ހުރި މަގުތަކުގައި ރަނގަޅު ސްޓޯމް ވޯޓަރ ސިސްޓަމެއް ގާއިމްކޮށްފައި ނެތް
ކުޅުދުއްފުށީ ސިޓީގެ މޭޔަރު މުޙައްމަދު އާތިފް
މި ސަރުކާރުން ކުޅުދުއްފުށީގެ ސިއްޙީ ނިޒާމަށް ހެޔޮ ބަދަލުތަކެއް ގެނެސްފައިވާކަމަށް ކުޅުދުއްފުށީ ސިޓީގެ މޭޔަރު މުޙައްމަދު އާތިފް ވިދާޅުވެއްޖެއެވެ.
ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން ކުޅުދުއްފުށީ ސިޓީގެ މޭޔަރު މުޙައްމަދު އާތިފް ވިދާޅުވީ، މިވަގުތުވެސް ސަރުކާރުން އެ ރަށުގައި މަޝްރޫއުތައް ހިންގަމުންދާކަމަށެވެ.
ޑީވޯޓަރިންގގެ ނިޒާމާއި ފަޔަރ ހައިޑްރެންޓް ސިސްޓަމް ހިމެނޭ ގޮތަށް ފޭސް 2 ގެ މަސައްކަތްތައް ބަޖެޓުގައި ހިމަނާފައިވާކަމަށް މޭޔަރު އާތިފް ވިދާޅުވިއެވެ. އަދި ކުޅުދުއްފުށީ ސިޓީގައި ކުރިން ތާރު އަޅާފައި ހުރި މަގުތަކުގައި ރަނގަޅު ސްޓޯމް ވޯޓަރ ސިސްޓަމެއް ގާއިމް ކޮށްފައި ނެތްކަންވެސް އޭނާ ފާހަގަކުރެއްވިއެވެ.
ބޯހިޔާވަހިކަމަށް އަލިއަޅުވާލައްވާ މޭޔަރު އާތިފް ވިދާޅުވީ، ކުޅުދުއްފުށީގައި ބޯހިޔާވަހިކަން ބޭނުންވާ 1200-1500 އެއްހާ އާއިލާ އެބަތިބި ކަމަށެވެ. ވުމާއެކު، މިހާރު ހުރި ބިންތައް އެންމެ ބޭނުންތެރި ގޮތުގައި ދޫކުރުމަކީ މުހިއްމު ކަމެއްކަމަށެވެ. އެންމެ ފަހުންވެސް ކުޅުދުއްފުށީގައި ބޯހިޔާވަހިކަމުގެ މަޝްރޫއެއް ފަށާފައި އޮތީ ނިމިދިޔަ އެމްޑީޕީ ވެރިކަމުގައިކަން ވެސް ކުޅުދުއްފުށި ސިޓީގެ މޭޔަރު ފާހަގަ ކުރެއްވިއެވެ.
މި ސަރުކާރުން އަތޮޅުތެރޭގެ އެންމެ ބޮޑު ހައުސިން ޕްރޮޖެކްޓް ހިންގަނީ ކުޅުދުއްފުށީގައި ކަމަށްވެސް މޭޔަރު ވިދާޅުވިއެވެ.
މޭޔަރު އާތިފް ވިދާޅުވީ، މި ސަރުކާރުން ކުޅުދުއްފުށީގެ ސިއްޙީ ނިޒާމަށް ހެޔޮ ބަދަލުތަކެއް ގެނެސްފައިވާ ކަމަށެވެ. މިހާރުވެސް ހޮސްޕިޓަލުގެ ޕްރޮޖެކްޓުތަކެއް ކުރިއަށްދާއިރު، ޚާއްސަކޮށް އޯޕީޑީ އާއި ވޯޑުގެ މަސައްކަތްތައް މޭޔަރު ފާހަގަ ކުރެއްވިއެވެ.
އޭގެ އިތުރުން، ކުޅުދުއްފުށި ހޮސްޕިޓަލުގައި އަލަށް ގިނަ ޚިދުމަތްތަކެއް ފެށިގެން ގޮސްފައިވާކަމަށްވެސް އޭނާ ވިދާޅުވިއެވެ.
