ސަސް އަތުން އީގަލްސް މޮޅުވުމުން މާޒިޔާއަށް އިތުރު އިންތިޒާރެއް!

ދިވެހި ޕްރިމިއަރ ލީގު ތާވަލްގެ ދެވަނައިގައި އޮތް އީގަލްސްއިން ސުޕަރ ޔުނައިޓެޑް ސްޕޯރޓްސް (ސަސް) އަތުން މޮޅުވުމުން ލީގު ޗެމްޕިއަންކަން ކަށަވަރުކުރަން މާޒިޔާއަށް އިތުރު އިންތިޒާރެއް ކުރަން ޖެހިއްޖެއެވެ.

އާދިއްތަ ދުވަހު ހަވީރު ސަސް އަތުން އީގަލްސްއަށް މޮޅުނުވެވުނު ނަމަ މާޒިޔާއަށް ލީގު ޗެމްޕިއަންކަން ޔަޤީންވީހެވެ. އެކަމަކު މިނަތީޖާއާއެކުވެސް މާޒިޔާ ކުރިއަށް އޮތް މެޗު ކާމިޔާބުކުރުމުން އެޓީމަށް ލީގު ޗެމްޕިއަންކަން ދިފާއުކުރެވޭނެއެވެ. ސަސް އަތުން އީގަލްސް މިއަދު މޮޅުވީ 2-1 ނެވެ. މެޗުގެ 11 ވަނަ މިނިޓްގައި އީގަލްސްއަށް ކުރި ހޯދައިދިނީ ހަސަން ރާއިފް ހަސަންއެވެ. އެކަމަކު މިނިޓެއް ފަހުން އިބްރާހީމް އަތީގު ހަސަން ލަނޑެއް ޖަހާ ސަސްއަށް ނަތީޖާ ހަމަހަމަކޮށްދިނެވެ. އީގަލްސް މެޗުން މޮޅުވީ 87 ވަނަ މިނިޓްގައި ޑިފެންޑަރ އަހުމަދު ނޫމާން ޖެހި ލަނޑުންނެވެ.

މިނަތީޖާއާއެކު އީގަލްސް ދެވަނައިގައި އޮތީ 18 މެޗުން 43 ޕޮއިންޓާއިއެކުއެވެ. އެއްވަނަގައި އޮތް މާޒިޔާއާއި ދެމެދު އަށް ޕޮއިންޓްގެ ފަރަޤެއް އެބައޮތެވެ. ސަސް އޮތީ ތާވަލްގެ ހަތް ވަނައިގައެވެ. އެއީ 14 ޕޮއިންޓާއިއެކުއެވެ. ކޮލިފިކޭޝަނުން ސަލާމަތްވާން ސަސްއަށް މިހާރު އޮތީ ހަނި ފުރުޞަތެކެވެ. އަމިއްލަ ބާރެއް ނެތެވެ. އާދިއްތަ ދުވަހުގެރޭ ގްރީން ސްޓްރީޓްސްއާއި, ޔުނައިޓެޑް ވިކްޓްރީ މެޗު އެއްވަރުވެއްޖެނަމަ ސަސް ކޮލިފިކޭޝަން ކުޅެން ޖެހޭނެކަން ކަށަވަރުވާނެއެވެ.