ލީގު ޗެމްޕިއަންކަން ދިފާއުކުރަން މާޒިޔާ ފަހު ފިޔަވަޅަށް!

ދިވެހި ލީގު ޗެމްޕިއަންކަން ދިފާއުކުރަން މާޒިޔާއިން ފަހު ފިޔަވަޅާ ހަމައަށް ދަތުރުކޮށްފިއެވެ.

ލީގުގެ ފަހުވިޔަޅާ ހަމައަށް މާޒިޔާ ދަތުރުކުރީ ޓީސީ އަތުން ހޯދި ބޮޑު މޮޅާއެކު 11 ޕޮއިންޓްގެ ލީޑެއް ނަގައިގެންނެވެ. 5-0 ން ޓީސީ ބަލިކޮށް, ހޯދި މޮޅާއެކު މާޒިޔާ ވަނީ 18 މެޗުން 51 ޕޮއިންޓް ހޯދާފައެވެ. ދެވަނާގައި އީގަލްސް އޮތީ 17 މެޗުން 40 ޕޮއިންޓާއެކުއެވެ. އެހެންކަމުން އީގަލްސްއަށް މިއަދު ސުޕަ ޔުނައިޓެޑް ސްޕޯރޓްސް އަތުން މޮޅުނުވެވުނަސް މާޒިޔާއަށް ލީގު ޔަޤީންވާނެއެވެ. އަދި އީގަލްސް މޮޅުވިޔަސް މާޒިޔާ ކުރިއަށް އޮތް މެޗުން މޮޅުވެގެން ލީގު ޔަޤީން ކުރެވޭނެއެވެ.

ޓީސީ އަތުން މާޒިޔާ މޮޅުވީ ފުރަތަމަ ހާފްގައި 15 މިނިޓްގެ ތެރޭގައި ފަސް ލަނޑު ޖަހައިގެންނެވެ. ފަސް ލަނޑުގެ ތެރެއިން ތިން ލަނޑު ޖެހީ ޓަނާއެވެ. އަނެއް ދެ ލަނޑު ޖެހީ އައިސަމްއާއި, ޑިފެންޑަރ ސަމޫހު އަލީއެވެ. މެޗުގެ 80 ވަނަ މިނިޓްގައި އައިސަމްއަށް ރަތްކާޑް ދައްކާ ދަނޑުން ފޮނުވާލިއެވެ.

ލީގުގައި އާދިއްތަ ދުވަހުގެރޭ ވާދަކުރާނީ ޔުނައިޓެޑް ވިކްޓްރީއާއި ގްރީން ސްޓްރީޓްސްއެވެ.