ޕާކިސްތާނުގެ ބޮޑުވަޒީރުގެ ދަރިކަލުން ސުލެއިމާން ކޯޓަށް ފިއްލަވައިގެން އުޅުއްވާކަމަށް ނިންމައިފި

މަނީ ލޯންޑަރިންގގެ ތުހުމަތުގައި ޕާކިސްތާނުގެ ބޮޑުވަޒީރު ޝަހްބާޒް ޝަރީފްގެ ދަރިކަލުން ސުލެއިމާން ޝަހްބާޒް ކޯޓަށް ފިއްލަވައިގެން އުޅުއްވާ ކަމަށް އެ ޤައުމުގެ ކޯޓުން ނިންމައިފިއެވެ.

ޕާކިސްތާނުގެ ލާހޫރުގެ ސްޕެޝަލް ކޯޓް ސެންޓްރަލް އިން މިގޮތަށް ނިންމީ ސުލެއިމާން ކޯޓަށް ހާޒިރުވުމަށް އެންގި ތާރީހުގައި ކޯޓަށް ހާޒިރުވެފައި ނުވާތީއެވެ. އޭނާ މިވަގުތު ޤައުމުގައި ވަޑައިގެން ނެތް ކަމަށް ވެސް ބައެއް މީޑިއާތަކުން ރިޕޯޓް ކުރެއެވެ.

ސުލެއިމާންގެ އިތުރުން ތާހީރު ނަޤްވީ ނަމަކަށް ކިޔާ މީހަކު ވެސް އެ މައްސަލައިގައި ކޯޓަށް ހާޒިރުނުވުމުން ކޯޓަށް ފިލައިގެން އުޅޭ ކަމަށް އެ ކޯޓުން ވަނީ ނިންމާފައެވެ. އަދި ސުލެއިމާން އާއި ތާހީރުގެ މިލްކިއްޔާތާ ގުޅޭ މައުލޫމާތު ހޯދުމަށް ވެސް އެ ކޯޓުން ވަނީ އަމުރުކޮށްފައެވެ.

ޕާކިސްތާނުގެ ފެޑަރަލް އިންވެސްޓިގޭޝަން އޭޖެންސީ (އެފްއައިއޭ) އިން މަނީ ލޯންޑަރިންގގެ ތުހުމަތު ބޮޑުވަޒީރު ޝަހްބާޒް އާއި އެމަނިކުފާނުގެ ދެ ދަރިކަލުން ހަމްޒާ އަދި ސުލެއިމާންގެ މައްޗަށް ކުރީ 2020 ވަނަ އަހަރުގެ ނޮވެމްބަރު މަހުއެވެ. އެ ތިންބޭފުޅުންގެ މައްޗަށް ކުރަނީ ހަކުރުގެ ވިޔަފާރީގެ ނަމުގައި 16 ބިލިއަން ޕާކިސްތާން ރުޕީސް ލޯންޑަރ ކުރެއްވި މައްސަލައެއްްގެ ދައުވާއެވެ.

ޕާކިސްތާނުގެ ބޮޑުވަޒީރު ޝަހެބާޒް ދެން އޮންނަ އަޑުއެހުމަކަށް ކޯޓަށް ހާޒިރުވުމަށް ވެސް މިހާރު އެ ޤައުމުގެ ކޯޓުން ވަނީ އަމުރު ކޮށްފައެވެ. އެ އަޑުއެހުން އޮންނާނީ މި މަހުގެ 30 ވަނަ ދުވަހުއެވެ.