ޑިގްރީ ސަނަދަށްފަހު އެއްމާބަނޑު ދެބެން ވިޔަފާރި ފެށީ އެއް ފުރާޅެއްގެ މަތިންނާއި ދަށުން!

ޅަ ބަކަރިތަކަށް ކިރުފުޅިން ބޯންދިނުމާއި، އެނޫންވެސް ނާމްސޫފިތަކަށް ކާން އެޅުމަކީ، އާއިލީ ގޭގެ ފުރާޅުމަތިން ކިރުގެ އުފެއްދުންތައް ވިއްކަން ފެށި ލުޖައިން އަލް-ވާޒިރުގެ ކޮންމެ ދުވަހެއްގެ ދިރިއުޅުމުގެ ތާވަލުގައި އޮންނަ ކަމެކެވެ.

ޖަވާއާއި ލުޖައިން އަލް-ވާޒިރަކީ، ސަނާ ޔުނިވާސިޓީގެ ދަނޑުވެރިކަމާ ބެހޭ ކޮލެޖުގެ ގުރެޖުއޭޓުންނެވެ. އެއްމާބަނޑު އެ ދެބެން ވަނީ، ދެބެންނަށް ލިބިފައިވާ ހުނަރު އެއްކޮށްގެން، ފައިދާ ކުރަނިވި ވިޔަފާރިއެއް ފަށާފައެވެ. 

ލުޖައިން ވިޔަފާރި ވެށި މަދު އަދަދެއްގެ ކުކުޅާއި 5 ބަކަރިއާއެކުގައެވެ. ނާމްސޫފި ގެންގުޅުމުގެ މަސައްކަތް ފެށީ ފުރާޅުމަތީގައެވެ. ޖަވާރ ތައުލީމު ހާސިލު ކުރުމުގައި ހާއްސަ ވީ ކާބޯތަކެއްޗާއި ނިއުޓްރިޝަންގެ ރޮނގުންކަމަށްވާއިރު، އެ ރޮނގުންވެސް ވިޔަފާރިއަށް އެހީތައް ހޯދިއެވެ. ހުރިހާ ކަމެއް، އެއް ފުރާޅެއްގެ މަތިންނާއި ދަށުންނެވެ.

ޖަވާ ހާއްސަވީ ކިރުގެ އުފެއްދުންތައް ތައްޔާރުކުރުމަށެވެ. ކްރީމް ޗީޒްއާއި ޔޯގަޓާއި އަރަބި ބްރެޑް-ސްޕްރެޑްތައް ތައްޔާރު ކުރަނީ ޖަވާގެ އަމިއްލަ ބަދިގޭގައެވެ. 

ދެބެންގެ އުފެއްދުންތައް ވިއްކަނީ ސަރަހައްދީ ސުޕަމާޓުތަކުގައެވެ. އުފެއްދުންތައް އިޝްތިހާރު ކުރަނީ ސޯޝަލް މީޑިއާގައެވެ.

ބަލާ ބެލުމަށް ކިތަންމެ ފަސޭހަ ކަމުގައި ހީވި ނަމަވެސް ޖަވާއާއި ލުޖައިންއަށްވެސް ބޮޑެތި ގޮންޖެހުންތަކާ ކުރިމަތިލާން ޖެހެއެވެ. ކާބޯތަކެތި ބަންދު ކުރާ ސާމާނަކީ ގައުމަށް އިމްޕޯޓް ކުރަން ޖެހޭ ތަކެއްޗެވެ. ތެލުގެ އަގު ބޮޑުވުމަކީވެސް ވިޔަފާރި ހިންގަން އިތުރު ޚަރަދުތަކެއް ހިނގާ ކަމެކެވެ. 

ކަން މިހެން އޮތް ނަމަވެސް ދެބެންގެ އުއްމީދު ފަނޑެއް ނުވެއެވެ. އުފެއްދުންތައް ފުޅާކޮށް، ޔަމަނުގެ އިތުރުން ސަރަހައްދީ ފެންވަރުގެ ސުޕަމާޓުތަކަށް ސަޕްލައި ކުރަންވެސް ބޭނުންވެއެވެ. 

މި ދަނޑިވަޅަކީ ޔޫކްރެއިންގައި ކުރަމުންދާ ހަނގުރާމައިގެ އިތުރުން އިންޑިއާއިން ތަންފީޒު ކުރަމުންދާ އެކްސްޕޯޓް މަނާކުރުމުގެ ސިޔާސަތުގެ ސަބަބުން، ޔަމަނުގައި ބަނޑުހައި ހޫނުކަމުގެ ކާރިސާ އިތުރަށް ގަދަވަމުންދާ ދަނޑިވަޅެކެވެ. ބާޒާރުގައި ކާބޯތަކެތީގެ އަގުތައް އުފުލެމުން ދަނީ އިންތިހާއަށެވެ. ބައެއް ހިސާބުތަކުގައި، 2 އަހަރެއްހާ ދުވަހުގެ ތެރޭގައި އަގުތައް ދެގުނަ އުފުލިފައިވެސް އެބަހުއްޓެވެ.