ދުނިޔޭގައި މިވަގުތު އޮތް އެންމެ ބޮޑު، އަނގަމަތި ހާ، ޖަލުގެ ގޮތުގައި ބައިނަލްއަގުވާމީ ލީޑަރުންވެސް ސިފަކުރައްވާ ފަލަސްތީނުގެ ޣައްޒާއަށް ނިސްބަތްވާ، އުމުރުން 35 އަހަރުގެ ފާޚިރު ހަމަދަކީ، މިއަދު އޭނާގެ މަސައްކަތަށް ގިނަ ބައެއްގެ ސަމާލުކަން ހުއްޓިފައިވާ، ފަންނުވެރި ކަނބުރެކެވެ.

އަޑު އިވުމުގެ ނިއުމަތުން މަހްރޫމްވެފައި ހަމަދުގެ މަސައްކަތަކީ، ޔަހޫދީ އިޒްރޭލުގެ އިންސާނިއްޔަތުކަމުގެ ޒައްރެއްގެ މިންވަރުވެސް ނެތް އަސްކަރީ ފައުޖުތަކުން ދޭ ވައިގެ ހަމަލާތަކުގައި ސުންނާފަތިވެފައިވާ ގެތަކުގެ ބައިތަކާއި ބާ ދަނޑު ހޮވައިގެން އާ އީޖާދުތައް ކުރުމެވެ. އަލުން ބޭނުން ކުރެވެން ހުރި ބައިތައް ބޭނުންކޮށްގެން އޭނާ ފަރުނީޗަރު އުފައްދައެވެ. ތަފާތު އެކި އުޅަނދުތަކާއި ޖަނަވާރުތަކުގެ މޮޑެލްތައް ހަދައެވެ.

އުމުރުން އެންމެ 13 އަހަރުން ފެށިގެން ކަނބުރުވެރިކަން ކުރަމުން އަންނަ ހަމަދު، ޣައްޒާގައި ހިންގާ ވޯކްޝޮޕްގައި، ކަނބުރުވެރިކަމުގެ ރޮނގުން ނުކުރާ މަސައްކަތެއް ނޯވެއެވެ. އޭނާއަކީ އުކާލާ ބާ ދަގަނޑު ބޭނުން ކޮށްގެން، ގޭތެރޭގެ އެކި ބޭނުންތަކަށް އެކި ކަހަލަ ސާމާނު އުފައްދާ މަދު ކަނބުރުންގެ ތެރޭގައި ގުނާލެވޭ ފަންނުވެރިއެކެވެ.

ނަގުލަންދާއްޓާއި، އެކި ކަހަލަ ސައިކަލް، ގަސް އަދި ޖަނަވާރުތަކާއި އެނޫންވެސް ގޮތް ގޮތުން ގޭތެރެ ޒީނަތްތެރި ކުރަން ބޭނުން ކުރެވިދާނެ އެކި ކަހަލަ ސާމާނު، ހަމަދު އުފައްދަނީ އޭނާގެ އަމިއްލަ ދެ އަތުން ހޮވާ ބާ ދަގަނޑުގެ އިތުރުން މީހުންގެ އަތުން އޭނާ ގަންނަ ސަމާނުތައް ބޭނުން ކޮށްގެންނެވެ.

5 ދަރިންގެ ބައްޕަގެ މަސައްކަތަށް ތައުރީފު ހައްގެވެ. ހަމަދު ދެއްކި ވާހަކަތައް ތަރުޖަމާ ކޮށްދެމުން ދިޔަ އޭނާގެ ކޮއްކޮ، ޚާމިސްގެ ވާހަކަތަކުންވެސް އެކަން ހާމަވެއެވެ.

ކޮންމެ ވައްތަރަކުންވެސް ހަމަދަ ތައްޔާރު ކުރާ ފުރަތަމަ ފަރުމާ ވިއްކާލުމަށް ހަމަދު އިންކާރު ކުރެއެވެ. ނަމަވެސް އޭނާގެ ކަސްޓަމަރުންނަށް، އޭގެ ނަކަލުތައް ތައްޔާރު ކޮށްދެއެވެ. ހަމަދު ފަރުމާ ކުރި ސައިކަލެއް ގަތުމަށް، އޭނާގެ ކަސްޓަމަރަކު 1000 ޝެކްލްސް ނުވަތަ 285.7 ޑޮލަރު ހުށަހެޅިއެވެ. ނަމަވެސް އެ ފުރަތަމަ އީޖާދު ވިއްކާލުމަށް ހަމަދު އިންކާރު ކުރިއެވެ.

ކުޑައިރު ދިމާވި އެކްސިޑެންޓަކަށްފަހު، އަޑުއިވުމުގެ ނިއުމަތުން ހަމަދު މަހްރޫމުވިއެވެ. ވާހަކަ ދެއްކުމުގައިވެސް އުނދަގޫތަކެއް ހުރެއެވެ. ހަމަދު ދައްކާ ވާހަކަތައް ކަސްޓަމަރުންނަށް ކިޔާދިނުމުގައި، ހަމަދާއެކު މަސައްކަތުގައި އުޅޭ މީހުންގެ އެހީ، ބައެއް ފަހަރު ހޯދަން ޖެހުނެއް ކަމަކު، އެކަމުގެ ސަބަބުން އޭނާގެ ކަނބުރުވެރި ފަންނުގެ މަސައްކަތަށް އެޅޭ ކުޑަ ނަމަވެސް ހިޔަންޏެއް ނޯވެއެވެ.

އެންމެ ކުރީއްސުރެ ހަމަދު މަސައްކަތް ކުރި ވޯކްޝޮޕްވެސް ވަނީ އިޒްރޭލުގެ އުދުވާންތަކުގައި ސުންނާފަތިވެފައެވެ. ނަމަވެސް އެކި ގޮތް ގޮތުން އޭނާއަށް ލިބުނު ކުޑަ އެހީތެރިކަމުގެ ބޭނުންކޮށްގެން ހަމަދު މިހާރު ވަނީ، ކަނބުރުވެރިކަމުގެ މަސައްކަތް ކުރާނެ އާ ވޯކްޝޮޕެއް ހުޅުވާފައެވެ.

375 އަކަ ކިލޯމީޓަރުގެ ޣައްޒާއަކީ 2.3 މިލިއަން މީހުން ދިރިއުޅެމުންދާ ސަރަހައްދަކަށްވާއިރު، އޭގެ ތެރެއިން 2 ބައިކުޅަ 1 ބައި މީހުންނަކީ ވަޒީފާ ނެތް މީހުންނެވެ. ނުވަތަ ފަޤީރުންނެވެ.