ދިވެހި ޕްރިމިއަރ ލީގު ތާވަލްގެ ދެވަނައިގައި އޮތް އީގަލްސް ބަލިކޮށް, ޓީސީން ތިންވަނާގައި ހަމަޖެހުމެއް ހޯދައިފިއެވެ.

މެޗުން މޮޅުވެ ޓީސީން ވަނީ 26 ޕޮއިންޓް ހޯދާފައެވެ. އެއީ 17 މެޗުންނެވެ. ޓީސީގެ ފަހަތުގައި އޮތީ 22 ޕޮއިންޓާއެކު ވެލެންސިޔާއެވެ. ވެެލެންސިޔާ ކުޅެފައިވަނީ 16 މެޗެވެ. އީގަލްސް ބަލިވުމުން އެއްވަނައިގައި އޮތް މާޒިޔާއަށް ވަނީ މިހަފްތާގައި 8 ޕޮއިންޓްގެ ލީޑެއް ނެގުމުގެ ފުރުޞަތު ލިބިފައެވެ. މިހާރު ދެޓީމްގެ ދެމެދުގައި އޮތީ ފަސް ޕޮއިންޓްގެ ފަރަޤެކެވެ.

އީގަލްސްގެ މައްޗަށް ޓީސީން ކުރި ހޯދީ 1-0 ނެވެ. މެޗުން ޓީސީ މޮޅުވި ލަނޑަކީ ޑިފެންޑަރ އަހުމަދު ނޫމާން (ހެލްމެޓް) އަތުން ބައިކޮޅަށް ވަން ލަނޑެކެވެ. މިއީ އީގަލްސްގެ ކޯޗުކަމާ މުޙައްމަދު އާތިފް ހަވާލުވި ފަހުން ކުޅުނު ފަސް މެޗުގެ ތެރެއިން ބަލިވި ފުރަތަމަ މެޗެވެ.

ލީގުގައި ހޯމަދުވަހުގެރޭ ވާދަކުރާނީ ޔުނައިޓެޑް ވިކްޓްރީއާއި ދަ ގްރާންޑޭއެވެ. އަންގާރަ ދުވަހު ހަވީރު ވާދަކުރާނީ ކްލަބް ވެލެންސިޔާއާއި ގްރީން ސްޓްރީޓްސްއެވެ. އަންގާރަދުވަހުގެރޭ އެއްވަނައިގައި އޮތް މާޒިޔާ ނިކުންނާނީ ސުޕަރ ޔުނައިޓެޑް ސްޕޯރޓްސް (ސަސް)އާ ދެކޮޅަށެވެ.