ސްރީލަންކާއާއި ޒެމްބިއާއިން ދައްކަންޖެހޭ ލޯނުތައް އަނބުރާ ނުދެއްކި ދަރަނިވެރިވެފައިވާއިރު، ކުރިއަށްއޮތް ތަނުގައި މި ދަތިތަކާ ކުރިމަތިލާންޖެހޭ ގައުމުތަކުގެ ތެރޭގައި ޕާކިސްތާނު ހިމެނުން އެކަށީގެންވާކަމަށް އިންޓަރނޭޝަނަލް ރޭޓިންގ އެޖެންސީތަކުން ބުނެފިއެވެ.

ލޯނު އަނބުރާ ދެއްކެން ނެތް ގައުމުތަކުގެ ތެރޭގައި; ތުރުކީ، މިސްރު، ޓިއުނީޝިއާ، އިތިއޯޕިއާ، ޕާކިސްތާން، ގާނާ އަދި އެލް ސަލްވާޑޯރ ހިމެނެއެވެ. ބްލޫމްބަރގުން ލަފާކުރާގޮތުގައި މިހާރު ތެލާއި ކާނާގެ އަގުތައް މަތިވަމުންދާ މި ދަނޑިވަޅުގައި މާރކެޓްތައް ދަރަނިވެރިވެދާނެއެވެ.

ފިޗް ރޭޓިންގގެ ހޯދުންތަކުން ވަނީ، ޕާކިސްތާނުގެ ހިމެނޭހެން 17 ގައުމެއް ދަރަނިވެރިވުމާ ދިމާއަށް ދާކަން ދެނެގަނެވިފައެވެ. މި ލިސްޓުގައި ރަޝިއާވެސް ހިމެނިފައިވެއެވެ.

މިގޮތުން އެންމެ ފާހަގަކޮށްލެވޭ ދެ ގައުމަކީ ސްރީލަންކާއާއި ޒެމްބިއާ ކަމަށް ވާއިރު، ދަރަނިވެރިވުމުގެ މަގުމަތީގައި އޮތް ގައުމުތަކުގެ ތެރޭގައި ޕާކިސްތާން، ލުބުނާން، ޓިއުނީޝިއާ، ގާނާ، އިތިއޯޕިއާ، ޔޫކްރެއިން، ތަޖިކިސްތާން، އެލް ސަލްވާޑޯރ، ސުރުނާމް، އިކުއޭޑަރ، ބެލީޒް، އާޖެންޓީނާ، ރަޝިއާ، ބެލަރޫސް އަދި ވެނެޒުއޭލާ ހިމެނެއެވެ.