ހުކުރު އަދި ހޮނިހިރު ދުވަހު ތެޔޮ ނުވިއްކުމަށް ލަންކާ އައިއޯސީން ނިންމައިފި

ހުކުރު އަދި ހޮނިހިރު ދުވަހު ލަންކާގެ އައިއޯސީ އިން ތެޔޮ ވިއްކުމުގެ މަސައްކަތް ނުކުރާނެ ކަމަށް ބުނެފިއެވެ.

ލަންކާ އައިއޯސީގެ މެނޭޖިން ޑިރެކްޓަރާ މަނޯޖް ގުޕްތާ އާއި ހަވާލާދީ އެކުންފުނިން ހުކުރު އަދި ހޮނިހިރުގައި ތެޔޮ ވިއްކުމުގެ މަސައްކަތް ނުކުރާނެ ކަމަށް ލަންކާގެ ނޫސްތަކުން ވަނީ ރިޕޯޓުކޮށްފައެވެ.

އެގޮތުން ލަންކާގައި ކުރަން ރާވާފައިވާ މުޒާހަރާގެ ސަބަބުން އެކުންފުނީގެ ސްޓޭޝަންތަކަށް ލިބެންޖެހޭ ތެލުގެ ސްޓޮކް ނުލިބޭނެ ކަމަށް ގުޕްތާ ވަނީ ވިދާޅުވެފައެވެ. އާދިއްތަ ދުވަހު ސްޓޭޝަންތަކުން ތެޔޮ ވިއްކުމުގެ މަސައްކަތް ފަށާނެ ކަމަށް ގުޕްތާ ވިދާޅުވިއެވެ.

މީގެ އިތުރުން، މި ދެދުވަހު ސްޓޭޝަންތަކުން ތެޔޮ ވިއްކުމުގެ މަސައްކަތް ނުކުރި ނަމަވެސް ސީޕީސީ އަށާއި އެހެން އިންޑަސްޓްރީސް ތަކަށް ތެޔޮ ޑެލިވަރ ކުރުމުގެ މަސައްކަތްކުރާނެ ކަމަށް އޭނާ ވިދާޅުވިއެވެ.

ލަންކާގެ އިގުތިސާދީ ހާލާތު ގޯސްވެ، އެގައުމުގެ އާންމުންނަށް ކުރިމަތިވަމުންދާ ގޮންޖެހުންތަކާއެކު، އެގައުމުގެ ގިނަ އަދަދެއްގެ ރައްޔިތުން ދަނީ މަގުތަކަށް ނުކުމެ މުޒާހަރާކޮށް އަޑުއުފުލަމުންނެވެ.

ލަންކާގައި ތެލުގެ ސްޓޮކް ހުސްވަމުންދާއިރު، އެގައުމަށް ބޭނުންވާ ތެލުގެ އައު ޝިޕްމެންޓްތައް ގެންނަން ޚަރަދުކުރާނެ ފައިސާ ނެތްކަމަށް އެގައުމުގެ ޕަވަރ އެންޑް އެނަރޖީ މިނިސްޓަރު ކަންޗަނާ ވިޖެސެކެރަ ވަނީ ވިދާޅުވެފައެވެ.

ރިޕޯޓުތައް ބުނާގޮތުން ލަންކާއަށް ބޭނުންވާ ތެލުގެ ޝިޕްމެންޓަށް 587 މިލިއަން ޑޮލަރު ބޭނުންވާކަމަށް އާދިއްތަ ދުވަހު މިނިސްޓަރު ވަނީ ވިދާޅުވެފައެވެ. އެގޮތުން މިހަފުތާގައި ތެލުގެ އައު ޝިޕްމެންޓްތަކަށް 316 މިލިއަން ޑޮލަރު ދައްކަންޖެހޭކަމަށާއި, އެއަށް ކްރޫޑް އޮއިލްގެ ދެ ޝިޕްމެންޓް ލައިފިނަމަ ޖުމުލަ އަދަދު 587 މިލިއަން ޑޮލަރަށް އަރާނެކަމަށް މިނިސްޓަރު ވިދާޅުވިއެވެ.

މިނިސްޓަރު ވަނީ ތެލުގެ އައު ޝިޕްމެންޓްތައް ތައްޔާރުވެފައިވާކަމަށާއި އެހެންނަމަވެސް މި ޝިޕްމެންޓްތަކަށް ޚަރަދުކުރުމަށް ސެންޓްރަލް ބޭންކަށް ދެވެން އޮތީ 125 މިލިއަން ޑޮލަރު ކަމަށް މިނިސްޓަރު ވިދާޅުވެފައެވެ.

ލަންކާގައި މިވަގުތު ބާކީ ހުރީ 12،774 ޓަނު ޑީސެލްއާއި 4،061 ޓަނު ޕެޓްރޯލް ކަމަށްވެސް މިނިސްޓަރު ވަނީ ވިދާޅުވެފައެވެ.

މިމަހު ލަންކާއަށް އަންނަ ތެލުގެ ފުރަތަމަ ޝިޕްމެންޓް އަންނާނެ ކަމަށް ބުނެފައި ވަނީ ޖުލައި 9 ވަނަ ދުވަހުއެވެ. އަދި މި ހަފުތާގެ ބުރާސްފަތި ދުވަހަށް، އެގައުމަށް ގެންނަ ތެޔޮ ޝިޕްމެންޓަކަށްވާ ފައިސާގެ އެއްބަޔަށްވާ 49 މިލިއަން ޑޮލަރު ދައްކަންޖެހެއެވެ.