ފަރުވާ ހޯއްދަވަމުން ގެންދަވަނިކޮށް ޖަޕާނުގެ ކުރީގެ ބޮޑުވަޒީރު ޝިންޒޯ އަބޭ އަވަހާރަވެއްޖެ

ކެމްޕެއިން ހަރަކާތެއްގައި ހުންނަވަނިކޮން ދެވުނު ބަޑީގެ ހަމަލާއެއްގައި ހަށިކޮޅަށް ލިބިވަޑައިގެންނެވި ޒަޚަމްތަކަށް ފަރުވާ ހޯއްދަވަމުން ގެންދަވަނިކޮށް ޖަޕާނުގެ ކުރީގެ ބޮޑުވަޒީރު ޝިންޒޯ އަބޭ އަވަހާރަވެއްޖެއެވެ.

އެލްޕީޑީއާއި ހަވާލާދީ ޖަޕާނުގެ ގައުމީ ނޫސްއެޖެންސީން ބުނެފައިވަނީ ހޮސްޕިޓަލް އަށް ގެންދެވުނު އިރުވެސް އަބޭ އަވަހާރަވެފައިވާ ކަމަށެވެ. އަވަހާރަވި އިރު ޝިންޒޯ އަބޭގެ އުމުރުފުޅަކީ 67 އަހަރެވެ.

ޖަޕާންގައި އެންމެ ގިނަ ދުވަސްވަންދެން ބޮޑުވަޒީރުކަން ކުރައްވާފައިވާ ޝިންޒޯ އަބޭއަށް ބަޑިން ހަމަލާދީފައިވަނީ ހުކުރު ދުވަހުގެ ހެނދުނުގެ ވަގުތެއްގައި ނާރާ ސިޓީގައޮތް އިވެންޓެއްގައި ވާހަކަފުޅު ދައްކަވަން ހުންނަވަނިކޮންނެވެ. ހަމަލާ އަމާޒުވިއިރު އަބޭ ހުންނެވީ މަޖިލިސް އިންތިހާބުގެ ކެމްޕެއިން ކުރެއްވުމުގައެވެ. އަބޭ ކެމްޕެއިން ކުރައްވަމުން ގެންދެވީ އާދީއްތަ ދުވަހު އޮންނަ ޖަޕާންގެ މަތި ގޭގެ އިންތިހާބަށެވެ.

ޖަޕާންގެ ދައުލަތުގެ މީޑިއާ އެންއެޗްކޭއިން ރިޕޯޓްކޮށްފައިވާ ގޮތުން، އަބޭ އަށް ހަމަލާދިނީ ފިރިހެނެކެވެ. އަދި އޭނާ ހަމަލާދިނުމަށް ބޭނުންކުރި ބަޑިއަކީ އަމިއްލައަށް ހަދާފައިވާ އެއްޗެކެވެ. މި ހަމަލާއާއި ގުޅިގެން 41 އަހަރުގެ ފިރިހެނަކު ވަނީ ހައްޔަރުކޮށްފައެވެ. ޓެޓްސުޔާ ޔަމަގާމި ނަމަކަށް ކިޔާ މި މީހާ ފުލުހުން ކައިރި ބުނެފައިވަނީ އޭނާ އަބޭ އާއި ދޭތެރޭ ހިތްހަމަ ނުޖެހޭ ކަމަށާއި، ބޭނުންވީ އަބޭ މަރާލަން ކަމަށެވެ.

އަބޭއަށް ދިން ހަމަލާ ޖަޕާންގެ ބޮޑުވަޒީރު ފުމިއޯ ކިށީޑާ ވަނީ ހަރުކަށި އިބާރާތުން ކުށްވެރިކުރައްވާފައެވެ. އަދި ހާދިސާއާއި ގުޅިގެން ހިތާމަފާޅުކުރައްވާފައިވެއެވެ. މީގެ އިތުރުން ގައުމުތަކުގެ ވެރިން އަންނަނީ މި ފިނޑި އަމަލު ކުށްވެރިކުރަައްވަމުންނެވެ.

ހޮސްޕިޓަލުގެ އޮފިޝަލަކާއި ހަވާލާދީ ރޮއިޓަރސްގައި ބުނެފައިވަނި އަބޭ ހޮސްޕިޓަލަށް ގެނެވުނު އިރު ވެސް އެއްވެސް މުހިންމު ގުނަވަނެއް ނުހިނގާ ކަމަށާ ހިތްޕުޅުވެސް ހުއްޓިފައިވާ ކަމަށެވެ.

ޖަޕާންގެ ދައުލަތުގެ މީޑިއާއިން ބުނެފައިވަނީ އަބޭއަށް ހަމަލާދިން އިރު، އެމަނިކުފާނު ހުންނެވީ ރޭލު ސްޓޭޝަނެއްގެ ބޭރުގައި ސްޕީޗެއް ދެއްވާށެވެ. އަދި ދެ ފަހަރަށް ބަޑީގެ އަޑު އިވުނު ކަމަށާއި، އޭގެ އިރުކޮޅެއް ފަހުން އަޅި ކުލައިގެ ޓީޝާޓެއް ލައިގެން ހުރި މީހަކު ހިފެހެއްޓުނު ކަމަށެވެ. ރިކޯޑްކުރެވުނު އިތުރު ވީޑިއޯއަކުން ފެންނަ ގޮތުން އަބޭ ހުންނެވިތާ ފަހަތުން ބޯ ދުންގަނޑެއް ފެނިގެންދިޔައެވެ.

އާންމުވެފައިވާ ބައެއް ފޮޓޯތަކުން ފެންނަ ގޮތުން ހަމަލާގެ ސަބަބުން ވެއްޓިވަޑައިގެން އަބޭ އޮންނެވީ އުއްޑުން ގާޑް ރެއިލް ކައިރީގައެވެ. އަދި އެމަނިކުފާނުގެ ހެދުންކޮޅުގައި ލޭ ހުރި މަންޒަރު ފެނެއެވެ. އަދި އަބޭ ވަށައިގެން މީހުން އެއްވެ އެހީތެރިކަން ފޯރުކޮށްދެމުން ގެންދިޔަ އިރު، އެތަނުން އެކަކު ފަސްޓްއެއިޑް ދެމުންދިޔަތަން ފެނިފައިވެއެވެ.