ޖަޕާނަށް އައި ވަރުގަދަ ކޮޅިގަނޑެއްގެ ސަބަބުން ބިންގަނޑު ކަނޑައިގެން ގޮސް، ބޯކޮށް ވާރޭވެހި ފެންބޮޑުވުމުގެ ނުރައްކާ އަދިވެސް އޮތްކަމަށް ބެލެވޭތީ އެޤައުމުގެ ހުޅަނގު ސަރަހައްދުގައި ދިރިއުޅޭ ގާތްގަނޑަކަށް 200000 (ދެ ލައްކަ)އެއްހާ މީހުން ގެދޮރު ދޫކޮށް ސަލާމަތުގެ އައްސޭރިފަށަށް ދިއުމަށް އަންގައިފިއެވެ.

ހޮނިހިރު ދުވަހު ޖަޕާނުގެ މޫސުމާބެހޭ އިދާރާއިން ބުނެފައިވަނީ ، "ކޮޅިގަނޑުގެ ބާރު ދަށްވެ، އެކްސްޓްރާ-ޓްރޮޕިކަލް ލޯ-ޕްރެޝަރ ސިސްޓަމަކަށް ބަދަލުވެފައިވާ ކޮންގް-ރޭގެ ސަބަބުން ވައިގަދަވެ، ޖަޕާނުގެ ހުޅަނގު ސަރަޙައްދަށް ގުގުރުމާއެކު ބޯކޮށް ވާރޭވެހެމުންދާ،" ކަމަށެވެ.

މޫސުމާ ބެހޭ އިދާރާއިން އިންޒާރުދީފައިވަނީ ހޮނިހިރު ދުވަހު ޖަޕާނުގެ ހުޅަނގު ސަރަޙައްދުގައި އަދި އާދީއްތަ ދުވަހު އިރުމަތީ ސަރަޙައްދުގައި ބިންގަނޑު ކަނޑައިގެން ދިއުމާއި ފެންބޮޑުވުމުގެ އަސަރު ކޮށްފާނެ ކަމަށެވެ.

މިކަމާ ގުޅިގެން މަޓްސުޔާމާ ސިޓީގެ އޮފިޝަލަކު އޭއެފްޕީއަށް މައުލޫމާތު ދެމުން ބުނެފައިވަނީ، "އެސިޓީން އެންމެ މަތީ ފެންވަރުގެ އިންޒާރަކާއެކު، އެ ސިޓީގެ 10 ސަރަޙައްދެއްގައި ދިރިއުޅޭ 189،552 ރައްޔިތުން އެ ސަރަޙައްދު ތަކުން ނެރެ، ވަގުތުން ސަލާމަތުގެ އައްސޭރިތަކަށް ދިއުމަށް އިލްތިމާސްކޮށްފައިވާ،" ކަމަށެވެ.

ބުރާސްފަތި ދުވަހު ތައިވާނަށް އެރި ކޮންގް-ރޭ ކޮޅިގަނޑަކީ ފާއިތުވި އެތައް އަހަރެއްގެ ތެރޭގައި ތައިވާނަށް އެރި އެންމެ ބޮޑު ކޮޅިގަނޑުގެ ތެރެއިން އެކެކެވެ. މި ކޮޅިގަނޑުގެ ސަބަބުން މަދުވެގެން ތިން މީހަކު މަރުވެ، 690 މީހުން ޒަޚަމްވެ، ގާތްގަނޑަކަށް 27,781 އިމާރާތްތަކަކުން ކަރަންޓު ކެނޑިފައިވާކަަމަށް ރިޕޯޓުތައް ބުނެއެވެ.