ލިވަރޕޫލްގެ ޑިފެންޑަރު ގޮމޭޒްގެ ކޮންޓްރެކްޓް އައުކޮށްފި
7 ޖުލައި 2022 | ބުރާސްފަތި 17:05ގޮމޭޒްއަކީ ތަޖުރިބާހުރި ޒުވާން ކުޅުންތެރިއެއް
ލިވަޕޫލްގެ ޑިފެންޑަރު ޖޯ ގޮމޭޒް
އިނގިރޭސިވިލާތުގެ ލިވަޕޫލްއަށް ކުޅެމުން އަންނަ ޖޯ ގޮމޭޒްގެ ކޮންޓްރެކްޓް އައުކޮށްފިއެވެ.
2017 ވަނަ އަހަރު ލިވަޕޫލުން ގޮމޭޒްގެ ކޮންޓްރެކްޓް އައުކުރީ އިތުރު ފަސް އަހަރުގެ މުއްދަތަކަށެވެ. ލިވަޕޫލްގައި 142 މެޗު ގޮމޭޒް ކުޅެފައިވާއިރު، އޭނާ ވަނީ ކަކުލަށް ލިބުނު އަނިޔާއެއްގެ ސަބަބުން ގިނަ ދުވަސްތަކެއް ކުޅުމާ ދުރުގައި މަޑުކޮށްފައެވެ.
ކޮންޓްރެކްޓް އައުކުރުމަށްފަހު ގޮމޭޒް ބުނީ، އޭނާގެ ކެރިއަރުގެ އެންމެ ކާމިޔާބު އަހަރުތައް އަދި ކުރިއަށް އޮތީ ކަމަށެވެ. އަދި ކުރިއަށް އޮތްތަނުގައި އިތުރު އެއްޗެހި ދަސްކޮށް ގިނަ ކާމިޔާބީތަކެއް ހޯދުމަށް މަސައްކަތްކުރާނެކަމަށެވެ. އަދި ކޯޗިންގ ސްޓާފުންނާއި ކުޅުންތެރިންގެ ފަރާތުން އޭނާއަށް ލިބޭ އެއްބާރުލުން ގޮމޭޒް ފާހަގަކުރިއެވެ.
ގޮމޭޒްއާ ގުޅޭގޮތުން ޓީމުގެ ކޯޗު ޔާގަން ކްލޮޕް ބުނީ، ގޮމޭޒްއަކީ ތަޖުރިބާހުރި ޒުވާން ކުޅުންތެރިއެއްކަމަށެވެ. އަދި ޓީމަށް އެންމެ ގިނަ ދުވަހު ޚިދުމަތްކޮށްދޭ ކުޅުންތެރިންގެ ތެރޭގައި ގޮމޭޒް ހިމެނޭނެކަން ކްލޮޕް ފާހަގަކުރިއެވެ.
