އެކްސިޑެންޓް ހިނގުމުގެ މައިގަނޑު ސަބަބަކީ ޑްރައިވަރު ފަރުވާ ކުޑަވުން: ފުލުހުން
މަގުމަތީގެ ގަވާއިދުތަކާ އެއްގޮތަށް އަމަލުކުރާނަމަ އެކްސިޑެންޓުތައް މަދުވާނެކަމަށް ފުލުހުން ބުނޭ
އެކްސިޑެންޓްތަކާ ގުޅިގެން ފުލުހުން ބޭއްވި ނޫސްވެރިންގެ ބައްދަލުވުން
މާލެ ސަރަހައްދުގައި އެކްސިޑެންޓުތައް ހިނގުމުގެ މައިގަނޑު ސަބަބަކީ އުޅަނދު ދުއްވަން އިންނަ ޑްރައިވަރު ފަރުވާކުޑަވުންކަމަށް ފުލުހުން ބުނެފިއެވެ.
މާލޭގައި މި ދުވަސްވަރު އެކްސިޑެންޓްތައް ގިނަވެފައިވާތީ ބުރާސްފަތި ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ސުޕްރިޓެންޑެންޓް އޮފް ޕޮލިސް ހުސައިން ސަމީރު ވިދާޅުވީ، އެކްސިޑެންޓުތައް ހިނގާ ގިނަ ސަބަބުތަކެއް ހުންނަކަމަށެވެ. އޭގެ ތެރޭގައި އެންމެ ބޮޑަށް ފާހަގަކުރެވެނީ އުޅަނދު ދުއްވަން އިންނަ ޑްރައިވަރު ފަރުވާކުޑަވުންކަމަށާއި، އޭގެ އިތުރުން އޯވަރޓޭކްކުރުމާއި ބާރު ސްޕީޑުގައި އުޅަނދުތައް ދުއްވުން ހިމެނޭކަމަށްވެސް އޭނާ ވިދާޅުވިއެވެ.
ހުސައިން ސަމީރު ވިދާޅުވީ ވިއްސާރަ މޫސުމާ ގުޅިގެން މިދިޔަ ހަފްތާގައި މާލޭގައި ހިނގި އެކްސިޑެންޓުތައް އިތުރުކަން ފާހަގަކުރެވިފައިވާކަމަށެވެ. މިއީ އުޅަނދުގެ ރައްކާތެރިކަން ކަށަވަރު ނުކުރެވި ހުރުމާއި މަގުމައްޗަށް ދޭން ޖެހޭ ސަމާލުކަން އެންމެ ރަނގަޅަށް ނުދެވުމުގެ ސަބަބުން ދިމާވާ ހާދިސާތައް ކަމަށާއި، ދޭން ޖެހޭ ސަމާލުކަން ދޭނަމަ އެކްސިޑެންޓުތައް މަދުކުރެވޭނެ ކަމަށްވެސް އޭނާ ވިދާޅުވިއެވެ.
ނުރައްކާތެރިކޮށް ދުއްވާ ފަރާތްތަކާމެދު ފިޔަވަޅުއެޅުމަށް މަސައްކަތްތައް ކުރަމުން އަންނަކަން ފާހަގަކުރައްވައި ސަމީރު ވިދާޅުވީ، ފާއިތުވި 6 މަސް ދުވަހުގެ ތެރޭގައި 40ށްވުރެ ގިނަ އުޅަނދު ފުލުހުންގެ ބެލުމުގެދަށަށް ގެންގޮސްފައިވާކަމަށެވެ. އަދި އުޅަނދު ދުއްވުމުގެ ލައިސެންސް ނެތިގެން ފާއިތުވި 6 މަސް ދުވަހުގެ ތެރޭގައި 1030 އުޅަނދު ފުލުހުންގެ ބެލުމުގެ ދަށަށް ގެންގޮސްފައިވާކަމަށްވެސް ސަމީރު ވިދާޅުވިއެވެ. ބާރު ސްޕީޑުގައި ދުއްވާ ފަރާތްތައް ވީޑިއޯ ފުޓޭޖްގެ ޒަރީއާއިން ހޯދައިގެން ވެސް ފިޔަވަޅު އަޅަމުންގެންދާ ކަމަށް ފުލުހުން ބުންޏެވެ.
ބްރިޖްމަތީގައި ހިނގާ އެކްސިޑެންތުތަކުގައި، ކަނޑައަޅާފައި އޮންނަ ސްޕީޑަށްވުރެ މަޑުން ނުވަތަ އެއަށްވުރެ ބާރަށް ދުއްވުމުގެ ސަބަބުން ނުރައްކާތެރި އެކްސިޑެންޓުތައް ހިނގާފައިވާކަން ފާހަގަކުރެވޭ ކަމަށްވެސް ފުލުހުން ބުންޏެވެ. އަދި ކަނޑައަޅާފައި އޮންނަ ގަވާއިދާ ޚިލާފަށް އޯވަރޓޭކްކުރަން އުޅެގެންވެސް އެކްސިޑެންޓުތައް ހިނގާފައިވާކަމަށް ސަމީރު ވިދާޅުވިއެވެ.
ބްރިޖުމަތީގައި ދުއްވާ އުޅަނދުތަކުގެ ސްޕީޑް ލިމިޓެއްގެ ގޮތުގައި ކަނޑައަޅާފައި އޮންނަނީ 25 ކިލޯމީޓަރާ 50 ކިލޯމީޓަރާ ދެމެދުގެ ސްޕީޑެކެވެ.
ޗީފް އިންސްޕެކްޓަރ އޮފް ޕޮލިސް އަބްދުލް މަތީން އަބްދުލް ކަރީމް ވިދާޅުވިގޮތުގައި ހުޅުމާލޭގައި އެންމެ ގިނައިން މަގުމަތީގެ ހާދިސާތައް ހިނގާފައިވަނީ ޔޫ ޓަރން ނެގުމުގައި މަގަށް ސަމާލުކަން ނުދިނުމުގެ ސަބަބުން ކަމަށެވެ. އަދި ޖަންކްޝަންތަކާއި ގޯޅިތަކުން އަޅާއިރު އެއް އުޅަނދު އަނެއް އުޅަނދަށް ޖާގަ ނުދިނުމުގެ ސަބަބުންވެސް ހާދިސާތައް ދިމާވާކަމަށް އޭނާ ވިދާޅުވިއެވެ.
މަތީން ވިދާޅުވީ، ތާރު އަޅާފައި ހުންނަ މަގުތަކުގައި ހިނގާ ކުޑަ އެކްސިޑެންޓެއްގެ ސަބަބުން ވެސް ބޮޑެތި އަނިޔޔާތަކެއް ވުމަކީ އެކަށީގެންވާ ކަމެއް ކަމަށެވެ. އެހެންކަމުން ހުރިހާ އެންމެންވެސް ދުއްވާއިރު އެހެން އުޅަނދުތަކާއި ހިނގާބިގާވެ އުޅޭ މީހުންނަށް ސަމާލުކަން ދިނުމަށް އޭނާ އެދިވަޑައިގެންނެވިއެވެ.
އެކްސިޑެންޓުތައް ހިނގުމަށް ދިމާވާ އިތުރު ސަބަބެއްގެ ގޮތުގައި ފުލުހުން ފާހަގަކޮށްފައިވަނީ ގަވާއިދާ ޚިލާފަށް ޕާކުކުރުމެވެ. އެގޮތުން، މަގުން ދާ ބޮޑެތި އުޅަނދުތަކަށް ޖާގަ ނުލިބޭގޮތަށް ބައެއް އުޅަނދުތައް ޕާކުކޮށްފައި ހުންނަކަން ފާހަގަކުރެވޭކަމަށާއި، އޭގެ ސަބަބުން އެ އުޅަނދު ލޭނުން ބޭރަށް ޖެހެން މަޖުބޫރުވެ، އެކްސިޑެންޓުތައް ހިނގުމަކީ އެކަށީގެންވާ ކަމެއް ކަމަށް ފުލުހުން ވަނީ ފާހަގަކޮށްފައެވެ.
