އަލަމްގިރްއާއެކު ފެންނަ ފުލުސް އޮފިސަރު ވަޒީފާއިން ސަސްޕެންޑުކޮށްފި
ޖިނާއީ ތަހުގީގުގައި ފުރިހަމަ ކުރަންޖެހޭ އިޖުރާއަތުތައް ފުރިހަމަ ކުރުމުގެ މަސައްކަތް ކުރަމުންދޭ
އެއްޖިންސުން ގުޅުން ހިންގި މައްސަލައިގައި ލިކްވި ވީޑީއޯއެއްގައި ފެންނަ ކޮޓަރިި
އެއް ޖިންސުން ގުޅުން ހިންގުމުގެ މައްސަލަތަކެއްގައި ހިމެނޭ އަލަމްގީރާއެކު ފެންނަ ފުލުސް އޮފިސަރު ވަޒީފާއިން ސަސްޕެންޑްކޮށްފިއެވެ.
އެކަމާ ގުޅޭގޮތުން ފުލުހުން ބުނީ، ސޯޝަލް މީޑިއާގައި ދައުރުވަމުންދާ ފުލުހަކު ހިމެނޭ ވީޑިއޯއަކާއި ގުޅިގެން ބަލަންޖެހޭ ކަންކަން ފުލުހުންގެ ކަމާބެހޭ އިދާރާތަކުން ބަލަމުންދާ ކަމަށެވެ. މި މައްސަލައިގެ ޖިނާއީ ތަހުގީގުގެ އިތުރުން، އަޚްލާޤީ މައްސަލަ ޕްރޮފެޝަނަލް ސްޓޭންޑަރޑްސް ކޮމާންޑުން ބަލަމުންދާކަމަށް ފުލުހުން މައުލޫމާތު ދެއެވެ.
ފުލުހުން ބުނާ ގޮތުގައި މި މައްސަލައިގައި ތުހުމަތު ކުރެވޭ އޮފިސަރު ހުރީ މުސާރަ ނުލިބޭ ގޮތަށް ވަޒީފާއިން ސަސްޕެންޑްކޮށްފައެވެ.
މި މައްސަލައިގެ ޖިނާއީ ތަހުގީގުގައި ފުރިހަމަ ކުރަންޖެހޭ އިޖުރާއަތުތައް ފުރިހަމަ ކުރުމުގެ މަސައްކަތް ކުރަމުންދާކަމަށްވެސް ފުލުހުން މައުލޫމާތު ދެއެވެ.
އެއް ޖިންސުން ގުޅުން ހިންގާ ވީޑިއޯތަކެއްގެ މައްސަލައިގައި ފުލުހުން މިހާރުވެސް ވަނީ އަލަމްގިރުގެ އިތުރުން އިތުރު ދެ މީހެއްގެ ޕާސްޕޯޓު ހިފަހައްޓައި ފުރުން މަނާކޮށްފައެވެ. އެއީ ޤާނޫނީ ވަކީލު ނާޒިމް ސައްތާރުއާއި، ކާނަލް މުޙައްމަދު ނަޝީދެވެ.
އެކަމާ ގުޅިގެން ފުލުހުން މީގެ ކުރިން ބުނެފައިވަނީ ސޯޝަލް މީޑިއާގައި ދައުރުވަމުންދާ ވީޑިއޯގައި ހިމެނޭ މީހުންގެ މައްސަލަތައް ތަހުގީގު ކުރަމުންދާ ކަމަށެވެ. ހަމައެއާއެކު، ފުލުހުންނަށް ހުށައެޅިފައިވާ ބްލެކްމެއިލިންގ ގެ މައްސަލައެއްވެސް ތަހުގީގު ކުރަމުންދާކަން ވަނީ ފާހަގަކޮށްފައެވެ.
ސޯޝަލް މީޑިއާގައި ދައުރުވި ވީޑިއޯގައި ފެންނަނީ އޭނާ ނޫންކަމަށް ނާޒިމް ސައްތާރު ފުރަތަމަ ބުނެފައިވެއެވެ. އެ ވީޑިއޯގައި ފެންނަނީ ނާޒިމް ކަމަށް ބެލެވޭ މީހަކާއި އިތުރު ފިރިހެނަކު އެއް ޖިންސުން ގުޅުން ހިންގާ މަންޒަރެވެ. އެ ވީޑިއޯއިން ފެންނަނީ ބަންގްލަދޭޝްގެ ރައްޔިތެއްކަމަށްވާ އަލަމްގިރްއެވެ.
ނާޒިމްއަކީ ރައްޔިތުންގެ މަޖިލީހުގެ ރައީސް، މުޙައްމަދު ނަޝީދުގެ ކޮއްކޮއެވެ.
މީގެ އިތުރުން، މުޙައްމަދު ނަޝީދު (ކާނަލް) ގެ އެފަދަ ވީޑިއޯއެއްވެސް އާންމުވެފައިވާއިރު، އެ ވީޑިއޯއިން ކާނަލްއާއި އަލަމްގީރް ފެނިގެންދެއެވެ. އެ ވީޑިއޯއާ ގުޅިގެން ކާނަލް މީގެ ކުރިން ވިދާޅުވެފައިވަނީ، އެ ވީޑިއޯއިން ފެންނަ ކޮޓަރިއަށް އޭނާ ވަޑައިގެންނެވި ކަމަށާއި، ނަމަވެސް އޭރު އެތަނަށް ވަޑައިގެންނެވީ ވިޔަފާރީގެ ބައްދަލުވުމަކަށް ކަމަށެވެ.
