އިންޖީނު ހުއްޓުނު ލޯންޗުގައި ތިބި މީހުން މާލެ ގެނެސްފި
އެންމެންގެ ހާލު ވެސް ރަނގަޅު
އިންޖީނު ހުއްޓުނު "އެރްވީނާ އަލޯހާ" ލޯންޗުގައި ތިބި 28 މީހުން މާލެ ގެނައުން
އިންޖީނު ހުއްޓުނު ލޯންޗުގައި ތިބި މީހުން މާލެ ގެނެސްފައިވާ ކަމަށް އެމްއެންޑީއެފުން ބުނެފިއެވެ.
އއ.ފެރިދޫން ފުރައިގެން 31 މީހުންނާއެކު މާލެ ދަތުރުކުރަމުންދިޔަ "އެރްވީނާ އަލޯހާ" ނަމަކަށް ކިޔާ ލޯންޗު ކ.ބޮލިފުށީގެ ހުޅަނގުން 14 ނމ. ބޭރުން ހުއްޓުނީ ތެޔޮ ހުސްވެ އިންޖީނު ހުއްޓިގެންނެވެ. އިންޖީނު ހުއްޓުމާ ގުޅިގެން، އެމްއެންޑީއެފް މާލޭ އޭރިއާ ކޯސްޓްގާޑު ސެކަންޑް ސްކޮޓްރަންގެ ސިފައިން ވަނީ ހަރަކާތްތެރިވެފައެވެ.
އަދި "އެރްވީނާ އަލޯހާ" ލޯންޗުގައި ތިބި 28 މީހުން، ކޯސްޓްގާޑުގެ ދެ އުޅަނދެއްގައި މިއަދު ހެނދުނު 10:16 ހާއިރު ވަނީ މާލެ ގެނެސްފައިވާ ކަމަށް އެމްއެންޑީއެފުން ބުނެއެވެ. އޭގެތެރޭގައި 4 ކުޑަކުދިންނާއި، 7 އަންހެނުން އަދި 17 ފިރިހެނުން ހިމެނޭއިރު އެންމެންގެ ހާލު ވެސް ރަނގަޅު ކަމަށް ވަނީ މައުލޫމާތު ދީފައެވެ.
އަޟްހާ އީދު ބަންދާ ދިމާކޮށް އެމްއެންޑީއެފް ކޯސްޓްގާޑުން ކަނޑުދަތުރުކުރާ އުޅަނދުފަހަރު ޗެކްކުރުމުގެ ހާއްސަ އޮޕަރޭޝަނެއް ވެސް ވަނީ ފަށާފައެވެ. ކޮންމެ އަހަރެއްގެ އީދު ބަންދާ ދިމާކޮށް އެމްއެންޑީއެފް ކޯސްޓްގާޑުން ކުރިއަށްގެންދާ މި އޮޕަރޭޝަނަކީ ކަނޑުމަގުން ގިނަ އަދަދެއްގެ ބަޔަކު ދަތުރުކުރާ ދުވަސްވަރަކަށްވުމާއެކު، ދަތުރުކުރާ އުޅަނދާއި ފަސިންޖަރުންގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އަޅާފައިވޭތޯ ބެލުމުގެގޮތުން ކުރިއަށްގެންދާ އޮޕަރޭޝަނެކެވެ.
މިގޮތުން، ޖޫން 30 ވަނަ ދުވަހުން ފެށިގެން ކުރިއަށްގެންދާ މި އޮޕަރޭޝަންގައި އުޅަނދުފަހަރުގެ ސަލާމަތީ ސެޓްފިކެޓްގައި ބަޔާންކޮށްފައި ހުންނަ ކަންކަން ފުރިހަމަ ކުރެވިފައިވޭތޯ އެމްއެންޑީއެފް ކޯސްޓްގާޑުން ބަލަމުންދެއެވެ. އޭގެތެރޭގައި މެރިން ވީއެޗްއެފް ޗެކް ކުރުމާއި، އުޅަނދުފަހަރުގެ ކެޕްޓަންގެ އަތުގައި ކަނޑުއުޅަނދުފަހަރު ދުއްވުމުގެ ލައިސަންސް އޮތްތޯ ބެލުމުގެ އިތުރުން، ދަތުރުވެރިންގެ ސަލާމަތާއި ރައްކާތެރިކަމާގުޅޭ ގިނަ ކަންތައްތައް ބަލައެވެ.
