އައިޖީއެމްއެޗްގެ ތަރައްޤީއާއި މީހުން ބިނާކުރުމާ ގުޅޭ އެއްބަސްވުމެއްގައި ސޮއިކޮށްފި
6 ޖުލައި 2022 | ބުދަ 02:23ޚާއްސަ ޑޮކްޓަރުން ބަލިމީހުން ބެލުމާއި ސާރޖަރީކުރަން ވަނީ ހަމަޖެހިފައި
އައިޖީއެމްއެޗާއި ގްލެންއީގަލްސް ގްލޯބަލް ހެލްތު ސިޓީއާ ދެމެދު އެއްބަސްވުމުގައި ސޮއިކުރުމުގެ ރަސްމިއްޔާތު
ހޮސްޕިޓަލުގެ ތަރައްޤީއާއި މީހުން ބިނާކޮށް ތަމްރީނު ކުރުމަށް އައިޖީއެމްއެޗް އާއި ގްލެންއީގަލްސް ގްލޯބަލް ހެލްތު ސިޓީ (ޖީޖީއެޗްސީ) އާ ދެމެދު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގެ ދަށުން އައިޖީއެމްއެޗްގެ ޑޮކްޓަރުންނާއި ނަރުހުންނަށް ތަމްރީނާއި އޮބްޒާވަރޝިޕް އާއި ހޭލުންތެރިކުރުމުގެ ޕްރޮގްރާމްތަކާއި ހޮސްޕިޓަލުގެ އެކި ޑިޕާޓްމަންޓުތަކަށް ބޭނުންވާ އެހީތެރިކަން ފޯރުކޮށްދެވޭނެއެވެ. މި ޕްރޮގްރާމްތައް ކުރިއަށް ގެންދިއުމަށްޓަކައި ވޯލްޑައިވްސްގެ ފަރާތުން ޖީޖީއެޗްސީ ރާއްޖޭގެ ރެޕްރެޒެންޓޭޓިވްގެ އެއްބާރުލުން ލިބިގެންދާނެއެވެ.
އައިޖީއެމްއެޗުން ބުނީ މި އެއްބަސްވުމުގެ ތެރެއިން ތަފާތު އެކި ދާއިރާތަކުން އޮބްޒާވަރޝިޕް ހެދުމުގެ ފުރުސަތު ލިބިގެންދާނެ ކަމަށެވެ. އަދި ވަކިން ޚާއްސަކޮށް ގޭސްޓްރޮސައިންސްއާއި ނިއުރޯސާރޖަރީގެ އިތުރުން ތަފާތު ސްޕެޝަލިސްޓް ދާއިރާތަކުންވެސް އެ ހޮސްޕިޓަލަށް އިތުރު އެހީތެރިކަން ފޯރުކޮށްދިނުމަށް ވަނީ ހަމަޖެހިފައެވެ. މި އެއްބަސްވުމުގެ ދަށުން އައިޖީއެމްއެޗުން ޚިދުމަތް ނުލިބޭ ދާއިރާތަކަށް ޚާއްސަ ޑޮކްޓަރުން ބަލިމީހުން ބެލުމާއި ސާރޖަރީކުރަން ވަނީ ހަމަޖެހިފައެވެ. އެހެންކަމުން ފަރުވާ ހޯދުމަށް ރާއްޖެއިން ބޭރަށް ދަތުރުނުކޮށް ބަލިމީހުންނަށް ލުއިފަސޭހަވާނޭހެން ރާއްޖޭގައި ތިބެގެން ޑޮކްޓަރަށް ދެއްކޭނެ އިންތިޒާމް ހަމަޖެހިގެންދާނެއެވެ.
ގްލެންއީގަލްސް ގްލޯބަލް ހޮސްޕިޓަލްސް އަކީ އައިއެޗްއެޗް ހެލްތުކެއަރގެ ދަށުން ހިންގޭ ހޮސްޕިޓަލުތަކެކެވެ. މުޅި ޖުމްލަ 84 ހޮސްޕިޓަލް ހިންގާ މި ގުރޫޕުގެ ހޮސްޕިޓަލްތައް ސިންގަޕޫރު، މެލޭޝިޔާ، ތުރުކީ އަދި އިންޑިއާގައި ވަނީ ގާއިމްކޮށްފައެވެ. ގްލެންއީގަލްސް ގްލޯބަލް ހޮސްޕިޓަލްސް އަކީ ދުނިއޭގެ ފެންވަރުގައިވެސް ފާހަގަކޮށްލެވޭ އެންމެ މަތީ ފެންވަރުގެ ޒަމާނީ ފަރުވާދެވޭ ހޮސްޕިޓަލްތަކެކެވެ.
މި އެމްއޯޔޫގެ އެންމެ މުހިންމު މަގްސަދަކީ އައިޖީއެމްއެޗުން ދެވޭ ފަރުވާއަކީ ޒަމާނީ އަދި އެންމެ ފުރިހަމަ ފަރުވާކަމުގައި ކަށަވަރުކުރުމެވެ.
