އަނބިމީހާއަށް ގެވެށި އަނިޔާކުރި މައްސަލަ: ޝަރީއަތުގެ ކުރީގެ ހުށައެޅުންތަކަށް ގޮތް ނިންމުން އަންނަ އަޑުއެހުމެއްގައި

މާލޭ ގެއެއްގައި ބިދޭސީ އަންހެނަކަށް ގެވެށި އަނިޔާކުރި މައްސަލައިގައި އޭނާގެ ފިރިމީހާގެ މައްޗަށް އުފުލާފައިވާ ދައުވާގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ދައުވާ އުފުލާފައިވަނީ އިންޑިއާގެ ރައްޔިތެއް ކަމަށްވާ ސްރިނިވަސަން ސުބްރަމަނިގެ މައްޗަށެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ. 

އަންގާރަ ދުވަހުގެ އަޑުއެހުމުގައި ދައުލަތާއި ދިފާއުންވެސް ވަނީ ޝަރީއަތުގެ ކުރީގެ ހުށައެޅުންތަކަށް ވާހަކަ ދައްކާފައެވެ. މައިގަނޑު ގޮތެއްގައި ހިމެނެނީ ބައެއް ހެކިތައް ބަލައިނުގަތުން ފަދަ ހުށައެޅުންތަކެވެ.

އެހެންނަމަވެސް، މި ދައުވާ ކުރިއަށް ގެންދެވޭނެ ތަނެއް ނެތްކަމަށް ކަނޑައެޅުއްވުމާއި ގުޅޭ ހުށައެޅުމެއް ދެފަރާތުންވެސް ހުށައަޅާފައެއް ނުވެއެވެ.

މި އަޑުއެހުމުގައި ދެފަރާތުންވެސް ހުށައެޅުންތަކާއި ގުޅޭގޮތުން ވާހަކަ ދައްކާފައިވާއިރު، ދެން އޮންނަ އަޑުއެހުމެއްގައި އޮންނާނީ އެ ހުށައެޅުންތަކަށް ގޮތެއް ނިންމެވުމެވެ. ގާޒީ ވަނީ ހުށައެޅުންތަކަށް ގޮތެއް ނިންމެވުމާއެކު، ޝަރީއަތުގެ މަރުޙަލާވެސް އެ ދުވަހު ފެށުމަށް ނިންމަވާފައެވެ.

މި އަޑުއެހުމުގައި އޭނާ ވަނީ އޭނާގެ މަންމަ ބަލިކަން ފާހަގަކޮށް، ވީހާވެސް އަވަހަށް މައްސަލަ ނިންމައިދިނުމަށް އެދިފައެވެ.

މިހާރު އޭނާ ހުރީ ޝަރީއަތް ނިމެންދެން ބަންދުކޮށްފައެވެ. އެގޮތުން މައްސަލަ ބައްލަވާ ގާޒީ ވަނީ ހެއްކަށް ނުފޫޒު ފޯރުވުމުގެ އިހްތިމާލު އޮތުމާއި، މައްސަލައިގެ ބާވަތަށް ބަލައި، ޝަރީއަތް ނިމެންދެން އޭނާ ބަންދު ކުރުމަށް ނިންމަވާފައެވެ.

މި މައްސަލައިގެ ހެކިންގެ ތެރޭގައި އަނިޔާ ލިބުނު ފަރާތާއި، މަންޒަރު ދުއް ފަރާތުގެ އިތުރުން، ސީންއަށް ދިޔަ ފުލުހުންވެސް ހިމެނެއެވެ.

އޭނާއަށް ދައުވާ އުފުލަމުން ޕްރޮސެކިއުޓަރ ޖެނެރަލް އޮފީހުން ބުނެފައިވަނީ، 02 ފެބްރުވަރީ 2022 ދުވަހު، މާލޭ ގެއެއްގެ ތެރޭގައި، އޭނާގެ އަނބިމީހާއަށް ވަޅިން ހަމަލާދިން މައްސަލައިގައި ސްރިނިވަސަން ސުބްރަމަނިގެ މައްޗަށް، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާ ކުރުމަށް 10 މާރިޗު 2022 ގައި ކްރިމިނަލް ކޯޓަށް ހުށައަޅާފައިވާ ކަމަށެވެ.

މި ޙާދިސާއާ ގުޅޭ ވީޑިއޯއެއް އާންމުވެފައިވާއިރު، ވީޑިއޯއިން ފެންނަނީ ގެއެއްގެ ސިޑިމަތިން ފުލުހުންގެ އެހީތެރިކަމާއެކު އެ އަންހެންމީހާ ފައިބައިގެންދާ މަންޒަރެވެ. އޭނާ ލައިގެން ހުރި ހެދުމުގެ ފަސްބައިގައި ވަރަށް ގިނަ ލޭ ހުއްޓެވެ.