އީދު ބަންދާ ދިމާކޮށް ކުރިއަށްގެންދާ އޮޕަރޭޝަންގައި 60 ވަރަކަށް އުޅަނދު މިހާތަނަށް ބަލާފައިވާނެ: މޭޖަރ އާޒިމް ޝަރީފް
5 ޖުލައި 2022 | އަންގާރަ 02:16ގިނަ އުޅަނދުތަކުގައި ސަލާމަތީ ފިޔަވަޅުތައް ވަރަށް ރަނގަޅަށް އަޅާފައިވޭ
މޭޖަރ އާޒިމް ޝަރީފް
އަޟްހާ އީދު ބަންދާ ދިމާކޮށް އެމްއެންޑީއެފް ކޯސްޓްގާޑުން ކަނޑުދަތުރުކުރާ އުޅަނދުފަހަރު ޗެކްކުރުމުގެ އޮޕަރޭޝަނެއް ފަށާފައިވާއިރު މިހާތަނަށް 60 ވަރަކަށް އުޅަނދު ބަލާފައިވާނެ ކަމަށް މޭޖަރ އާޒިމް ޝަރީފް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ހޯމަ ދުވަހުގެ ރޭ ވާހަކަ ދައްކަވަމުން މޭޖަރ އާޒިމް ވިދާޅުވީ މިފަހަރުގެ އޮޕަރޭޝަން ދިމާވެފައިވަނީ އަޟްހާ އީދުގެ ބަންދާއި ބޮޑު ބަންދާ ކަމަށެވެ. އޮޕަރޭޝަން ރާވާފައިވަނީ ފުލުހުންނާއި ގުޅިގެން ކަމަށާއި އެއްގޮތަށް މަސައްކަތްކޮށް، އެއް މިންގަނޑަކަށް މަސައްކަތް ކުރުމަށް ނިންމާފައިވާކަމަށެވެ.
މޭޖަރ އާޒިމް ވިދާޅުވީ މިހާތަނަށް 60 ވަރަކަށް އުޅަނދު ބަލާފައިވާއިރު ގިނަ އުޅަނދުތަކުގައި ސަލާމަތީ ފިޔަވަޅުތައް ވަރަށް ރަނގަޅަށް އަޅާފައިވާ ކަމަށެވެ. އަދި ލައިފް ޖެކެޓް އަތުޖެހޭ ހިސާބުގައި ވެސް ހުންނަ ކަމަށެވެ.
އުޅަނދު ޗެކު ކުރާއިރު ފުރުން މަނާ ކުރާ ހަލާތްތަކަކީ މިންވަރަށް ވުރެން މީހުން އިތުރުވުމާއި ލައިފް ޖެކެޓް ނެތުމާއި މުވާސަލާތީ ނިޒާމު ނެތުން ކަމަށް އޭނާ ވިދާޅުވިއެވެ. އަދި ސަލާމަތީ ކަންކަމުގެ އިތުރުން އެ އުޅަނދެއްގައި ބޭސްފަރުވާގެ ކަންކަން ވެސް ހަމަޖެހިފައިވޭތޯ ބަލާ ކަމަށް ވެސް ވިދާޅުވިއެވެ.
މޭޖަރ އާޒިމް ވިދާޅުވީ އުޅަނދުތައް ބަލާއިރު އެބޭނުންވާ މިންގަނޑު ފުރިހަމަ ނުވާކަމަށް ވާނަމަ އެހުރިހާ ކަމެއް ހަމަކުރުމަށް އެ އުޅަނދުގެ ވެރި ފަރާތަަށް އަންގާ ކަމަށެވެ. އަދި އެކަންތައްތައް ރަނގަޅު ކުރުމަށްފަހު ގިނަ މީހުން ގުޅާ ކަމަށާއި އެއަށްފަހު އުޅަނދު ބެލުމަށްފަހު ފުރުމުގެ ހުއްދަ ދެވިގެންދާ ކަމަށް ވެސް ވިދާޅުވިއެވެ.
ދަތުރުފަތުރު ކުރާއިރު ބޮޑެތި އުޅަނދުތައް އިންޝުއަރެންސް ކޮށްފައި ހުރުން މުހިންމުކަން ފާހަގަކުރައްވާ މޭޖަރ އާޒިމް ވިދާޅުވީ ކަނޑުމަތީގެ ހަދިސާއެއް ދިމާވުމުން އެންމެ ފުރަތަމަ ބަލަނީ އޭގައި ތިބޭ މީހުން ސަލާމަތް ކުރެވޭތޯ ކަމަށެވެ. އަދި އެއަށްފަހު އުޅަނދު ސަލާމަތް ކުރުމަށް ކަމަށެވެ. އެހެންނަމަވެސް މޫސުން ގޯސްއިރު އުޅަނދު ސަލާމަތް ކުރުން އުނދަގޫ ކަމަކަށް ވެގެންދާ ކަމަށާއި އެހެންކަމުން ބޮޑެތި އުޅަނދުތަކަށް ވަރަށް ބޮޑެތި ގެއްލުންތައްވާތީ ބޮޑެތި އުޅަނދުތަކުގެ އިންޝުއަރެންސް ހެއްދުމަކީ މުހިންމު ކަމެއްކަމަށް ދެކިވަޑައިގަންނަވާ ކަމަށް އޭނާ ވިދާޅުވިއެވެ.
ކުރިއާ އަޅާބަލާއިރު މިހާރު ކަނޑުމަތީގެ ހާދިސާތައް މަދު ކަމަށާއި މޫސުން ގޯސް ދުވަސްވަރެއްގައި ދަތުރަށް ފުރުމުގެ ކުރިން ކޯސްޓްގާޑްގެ ލަފާ ހޯދުމަށް ގުޅާ މީހުންގެ ނިސްބަތް މިހާރު ގިނަ ކަމަށް ވެސް ވިދާޅުވިއެވެ.
ކޮންމެ އަހަރެއްގެ އީދު ބަންދާ ދިމާކޮށް އެމްއެންޑީއެފް ކޯސްޓްގާޑުން ކުރިއަށްގެންދާ މި އޮޕަރޭޝަނަކީ ކަނޑުމަގުން ގިނަ އަދަދެއްގެ ބަޔަކު ދަތުރުކުރާ ދުވަސްވަރަކަށްވުމާއެކު، ދަތުރުކުރާ އުޅަނދާއި ފަސިންޖަރުންގެ ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އަޅާފައިވޭތޯ ބެލުމުގެގޮތުން ކުރިއަށްގެންދާ އޮޕަރޭޝަނެކެވެ.
މިގޮތުން، ޖޫން 30 ވަނަ ދުވަހުން ފެށިގެން ކުރިއަށްގެންދާ މި އޮޕަރޭޝަންގައި އުޅަނދުފަހަރުގެ ސަލާމަތީ ސެޓްފިކެޓްގައި ބަޔާންކޮށްފައި ހުންނަ ކަންކަން ފުރިހަމަ ކުރެވިފައިވޭތޯ އެމްއެންޑީއެފް ކޯސްޓްގާޑުން ބަލަމުންދެއެވެ. އޭގެތެރޭގައި މެރިން ވީއެޗްއެފް ޗެކް ކުރުމާއި، އުޅަނދުފަހަރުގެ ކެޕްޓަންގެ އަތުގައި ކަނޑުއުޅަނދުފަހަރު ދުއްވުމުގެ ލައިސަންސް އޮތްތޯ ބެލުމުގެ އިތުރުން، ދަތުރުވެރިންގެ ސަލާމަތާއި ރައްކާތެރިކަމާގުޅޭ ގިނަ ކަންތައްތައް ބަލައެވެ.
އުޅަނދުފަހަރުތަކުގައި ސަލާމަތާއި ރައްކާތެރިކަމަށް އަޅަންޖެހޭ ފިޔަވަޅުތައް އަޅާފައިވޭތޯ ބެލުމަށް، މާލޭ ބަނދަރު ސަރަހައްދުގައި އެމްއެންޑީއެފް މާލޭ އޭރިއާ ކޯސްޓްގާޑު ސެކަންޑް ސްކޮޑްރަންގެ ސިފައިން ހަރަކާތްތެރިވާއިރު، އެމްއެންޑީއެފްގެ އޭރިއާ ކޮމާންޑުތަކުގައި ގާއިމްވެފައި ތިބޭ ކޯސްޓްގާޑު ސްކޮޑްރަންތަކުން އީދު ބަންދާ ދިމާކޮށް އަތޮޅުތަކުގެ ރަށްރަށުގައިވެސް މި އޮޕަރޭޝަން ދަނީ ހިންގަމުންނެވެ.
މިގޮތުން، އެމްއެންޑީއެފް ނޮދަރން އޭރިއާ ފަސްޓް ސްކޮޑްރަންއާއި، އެމްއެންޑީއެފް ސެންޓްރަލް އޭރިއާ ތަރޑް ސްކޮޑްރަން، އަދި އެމްއެންޑީއެފް ސަދަން އޭރިއާ ފޯރތު ސްކޮޑްރަންއިން، އެ އޭރިއާ ކޮމާންޑްތަކަށް ނިސްބަތްވާ ރަށްރަށުގެ ބަނދަރުން ފުރާ އުޅަނދުތަކާއި ބަނދަރަށް ވަންނަ އުޅަނދުފަހަރުތައް ޗެކްކުރަމުން ގެންދާނެއެވެ.
މި އޮޕަރޭޝަން ތިން ފިޔަވައްސަކަށް ބަހާލައިގެން ކުރިއަށްގެންދާ ގޮތަށް ހަމަޖެހިފައިވާއިރު، މި އޮޕަރޭޝަން ވިލިމާލޭ އާއި ހުޅުމާލެ އަދި ހުޅުލޭގައި ވެސް ކުރިއަށް ގެންދާނެއެވެ. އަދި އޮޕަރޭޝަން ކުރިއަށްދާނީ 30 ޖުލައިގެ ނިޔަލަށެވެ.
