އަންނަ އަހަރަށް ކުރިން ޝެޑިއުލްގައި އޮތް އެފްރިކަން ކަޕް ޖެހިގެން އަންނަ 2024 ވަނަ އަހަރަށް ފަސްކޮށްފިއެވެ.
މުބާރާތް ފަސްކުރީ މޫސުމީ ކަންބޮޑުވުންތަކުގެ ސަބަބުންނެވެ. 2024 ވަނަ އަހަރު އެފްރިކަން ކަޕް އޮފް ނޭޝަންސް އޮންނާނީ އައިވަރީ ކޯސްޓްގައެވެ. ޖޫން, ޖުލައިއަށް ޝެޑިއުލްކޮށްފައިވާ މުބާރާތް ފަސްކުރީ އެދުވަސްވަރަކީ އައިވަރީ ކޯސްޓަށް ވިއްސާރަ ދުވަސްވަރަކަށްވާތީއެވެ. މުބާރާތް ފަސްކުރި މައިގަނޑު ސަބަބަކީ ރިސްކެއް ނަގަން ބޭނުން ނުވުންކަމަށް ކޮންފެޑެރޭޝަން އޮފް އެފްރިކަން ފުޓްބޯލްއިން ބުންޏެވެ. މިބަދަލާއެކު އައިވަރީ ކޯސްޓްގައި މުބާރާތް އޮންނާނީ ޖެނުއަރީ, ފެބުރުއަރީގައެވެ. މިއަހަރު ވަރލްޑްކަޕް ޤަތަރުގައި ބާއްވަނީވެސް ޢާއްމުކޮށް ބާއްވާ ތާރީޚުގެ ބަދަލުގައި ނިވެމްބަރު, ޑިސެމްބަރުގައެވެ. އެއީ ޤަތަރުގެ މޫސުމަށް ބެލުމަށްފަހު ގެނައި ބަދަލެކެވެ.
ޖެނުއަރީގައި އެފްރިކަޕް ކަޕް ބޭއްވުމަކީ ފަސޭހަކަމަކަށް ނުވެއެވެ. އެއީ ޔޫރަޕްގެ ކްލަބްތަކުން ކުޅުންތެރިން ރިލީޒް ކުރަން ބޭނުން ނުވާތީއެވެ. އެކަމަކު ޖެނުއަރީ މަހު މުބާރާތް ފެށުން ނޫންގޮތެއް ނެތްކަމަށް ފެޑެރޭޝަނުން ބުންޏެވެ. މިއީ ދާއިމީ ބަދަލެއް ނޫންނެވެ.
އެފްރިކަން ކަޕް އެންމެފަހުން ކާމިޔާބުކުރީ ސެނެގާލެވެ.
