ފުރަތަމަ މެޗުގައި ތައިލެންޑް އަތުން ރާއްޖެ މޮޅު

މެލޭޝިޔާގައި މިހާރު ކުރިއަށްދާ އިންވިޓޭޝަނަލް ކްރިކެޓް މުބާރާތް "ކުއަޑްރަންގިއުލާ ޓީ20 ސީރީސް" ގައި ރާއްޖެއިން ތައިލެންޑް ބަލިކޮށްފިއެވެ.

ހަތަރު ޤައުމު ވާދަކުރާ މުބާރާތުގައި ރާއްޖޭގެ ފުރަތަމަ މެޗު ތައިލެންޑާ ވާދަކޮށް ކާމިޔާބުކުރީ ހަތް ވިކެޓުންނެވެ. މެޗުގައި ތައިލެންޑުން ފުރަތަމަ ކުޅެންއަރާ 19.3 އޯވަރުގެ ތެރޭގައި 10 ކުޅުންތެރިން ނުބައިވެގެން ހެދުނީ 81 ލަނޑެވެ. ރާއްޖޭގެ ޤައުމީ ޓީމުން ވަނީ 15.4 އޯވަރުގެ ތެރޭގައި ތިން ކުޅުންތެރިން ނުބައިވެގެން 82 ލަނޑު ހަދާ މެޗު ކާމިޔާބުކޮށްފައެވެ. މެޗުގައި ރާއްޖެއިން އެންމެ ރަނގަޅަށް ކުޅުނީ ނުބައިނުވެ 33 ބޯޅައިން 38 ލަނޑު ހެދި މުޙައްމަދު ރިޝްވާންއެވެ. އޭނާ ވަނީ ދެ ފަހަރު ހަޔަކަށް އަދި ހަތަރު ފަހަރު ހަތަރަކަށް ޖަހާފައެވެ. ރާއްޖޭގެ މުހައްމަދު އައްޒާމްވެސް މެޗުގައި ނުބައިނުވެ 17 ލަނޑު ހެދިއެވެ.

މުބާރާތުގައި މެލޭޝިޔާއިން ވަނީ 155 ލަނޑުން ބޫޓާން ބަލިކޮށްފައެވެ. މުބާރާތުގައި ވާދަކުރަނީ މި ހަތަރު ޤައުމެވެ. މުބާރާތުގައި ވާދަކުރާ އަނެއް ތިން ޤައުމަކީވެސް ރޭންކޮންގައި ރާއްޖެއަށްވުރެ ކުރީގައި އޮތް ތިން ޤައުމެވެ. ރާއްޖެއިން މުބާރާތަށް ދިޔައީ ސްރީލަންކާގައި ތަމްރީނުތަކެއް ފުރިހަމަކޮށް, މެޗުތަކެއް ކުޅެފައެވެ.