3 ރަށެއްގެ ޑަބްލިއުޑީސީ ގޮނޑި އެމްޑީޕީން ކާމިޔާބުކޮށްފި
3 ޖުލައި 2022 | އާދީއްތަ 02:554 ރަށެއްގެ އިންތިޚާބުން ޕީޕީއެމަށް އެއްވެސް ގޮނޑިއެއް ނުލިބޭ
ށ. ކޮމަންޑޫގައި ވޯޓުލަނީ
ތިންރަށެއްގެ ޑަބްލިއުޑީސީ ގޮނޑި އެމްޑީޕީން ކާމިޔާބުކޮށްފިއެވެ.
ހޮނިހިރު ދުވަހު ބޭއްވި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ ބައި-އިލެކްޝަން ކާމިޔާބުކުރީ އެމްޑީޕީގެ އއ. ތޮއްޑޫ ކެންޑިޑޭޓް އައިމިނަތު މަޖުދާ، ށ. ޅައިމަގު ކެންޑިޑޭޓް މަރިޔަމް ޒުހުރާ، އަދި ށ. ކޮމަންޑޫ ކެންޑިޑޭޓް އައިޝަތު ވަހީދާއެވެ.
އިލެކްޝަންސް ކޮމިޝަނުން އާންމުކޮށްފައިވާ ވަގުތީ ނަތީޖާތައް ދައްކާގޮތުން، ށ. ޅައިމަގު އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގޮނޑި އެމްޑީޕީގެ ކެންޑިޑޭޓް މަރިޔަމް ޒުހުރާ ކާމިޔާބުކޮށްފައިވަނީ ޕީޕީއެމްގެ ކެންޑިޑޭޓް މަރިޔަމް އަބްދުﷲއާ ވާދަކޮށްގެން 152 ވޯޓު ހޯދައިގެންނެވެ. އިދިކޮޅު ކެންޑިޑޭޓަށް ލިބުނީ 88 ވޯޓެވެ.
އއ. ތޮއްޑޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގޮނޑި އެމްޑީޕީގެ ކެންޑިޑޭޓް އާމިނަތު މަޖުދާ ކާމިޔާބުކުރީ އިދިކޮޅު ޕީޕީއެމްގެ ކެންޑިޑޭޓް އާމިނަތު އަރީފާއާ ވާދަކޮށްގެން 315 ވޯޓު ހޯދައިގެންނެވެ. އިދިކޮޅު ކެންޑިޑޭޓަށް ލިބުނީ 247 ވޯޓެވެ.
ށ. ކޮމަންޑޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ 2 މެންބަރުން ހޮވުމަށް ބޭއްވި އިންތިޚާބުގައި އެމްޑީޕީގެ ކެންޑިޑޭޓް އައިޝަތު ވަހީދާ ވަނީ އެއްގޮނޑި ކާމިޔާބުކޮށްފައެވެ. އޭނާއަށް ލިބުނީ 288 ވޯޓެވެ. ކޮމަންޑޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ދެވަނަ ގޮނޑި ކާމިޔާބުކުރީ އެމްއެންޕީގެ ކެންޑިޑޭޓް ޒައީމާ އާދަމެވެ. އޭނާއަށް ލިބުނީ 334 ވޯޓެވެ.
މީގެ އިތުރުން ކ. ތުލުސްދޫގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަން ކާމިޔާބުކުރީ އަމިއްލަގޮތުން ވާދަކުރި ކެންޑިޑޭޓް އާއިޝަތު ރަޝާދެވެ. އޭނާއަށް ލިބުނީ 300 ވޯޓެވެ.
