ތިމަރަފުށީގައި ފެން ހިންދުމުގެ މަސައްކަތް ހުއްޓުމެއްނެތި ކުރިއަށް
އެމްއެންޑީއެފުން ދަނީ ގޭގޭގައި ވެލި ބަސްތާވެސް ޖަހަމުން
ތިމަރަފުށީގައި ފެން ހިންދުމުގެ މަސައްކަތްކުރަނީ
ތ. ތިމަރަފުއްޓަށް އުދައަރައި ފެން ބޮޑުވުމުގެ ސަބަބުން އެ ރަށުގެ މަގުތަކުން ފެން ހިންދުމުގެ މަސައްކަތް ހުއްޓުމެއްނެތި ކުރިއަށްގެންދާކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ބުނެފިއެވެ.
އެމްއެންޑީއެފުން ބުނީ ތިމަރަފުއްޓަށް އުދައެރުމާ ގުޅިގެން އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން އެ ރަށުގައި ހަރަކާތްތެރިވަމުންދާކަމަށެވެ. އެރަށުގައި ފެން ޕަމްޕު ބަހައްޓައިގެން ހުއްޓުމެއްނެތި ފެން ހިއްކުމުގެ މަސައްކަތް ކުރަމުންދާކަމަށް އެމްއެންޑީއެފުން ބުނެފައިވެއެވެ.
ތިމަރަފުށިން ގެއްލުން ލިބެމުންދާ ބައެއް ގޭގޭގައި ވެލިބަސްތާ ޖަހައިދީ، އެހީއަށް ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމުގައި ވެސް ސިފައިން ދަނީ ހަރަކާތްތެރިވަމުންނެވެ. ތިމަރަފުށީގައި ހަރަކާތްތެރިވާ ސިފައިންގެ ޓީމު މިރޭ އެ ރަށުގައި މަޑުކުރުމަށް ވަނީ ހަމަޖެހިފައެވެ.
އުދައެރުމާ ގުޅިގެން ބައެއް ރަށްތަކަށް ލިބެމުންދާ ގެއްލުންތައް ކުޑަކުރުމަށް އެހީތެރިވެދިނުމުގެ ގޮތުން އެމްއެންޑީއެފް ސެންޓްރަލް އޭރިއާ ކޮމާންޑުން ވަނީ 10 ރަށަކަށް، ގާތްގަނޑަކަށް 3800 ގޯނި ފޯރުކޮށްދީފައެވެ. މީގެ އިތުރުން، ސިފައިން ދަނީ ރަށްރަށަށް ގުޅައި އެ ރަށްރަށުގެ ހާލަތު ބަލަމުންނެވެ.
